Friday, 11 May 2018

ಶ್ರದ್ಧ ಮೇಧಾಮ್ ಯಶಃ ಪ್ರಜ್ಞಾಮ್.. ವಿದ್ಯಾ ಬುದ್ಧಿಮ್ ಶ್ರಿಯಂ ಬಲಂ ...


ಶ್ರದ್ಧೆ ಎಂದರೆ ಒಂದು ವಿಷಯವನ್ನು ತಿಳಿಯುವಲ್ಲಿ ಇರಬೇಕಾದ ಬದ್ಧತೆ. ಮೇಧಾ ಎಂದರೆ ತಿಳಿದುಕೊಂಡ ವಿಷಯವನ್ನು ನೆನಪಿನಲ್ಲಿ ಇಟ್ಟುಕೊಳ್ಳುವಿಕೆ. ಪ್ರಜ್ಞಾ ಎಂದರೆ ಅರಿತು, ಮನಸ್ಸಿನಲ್ಲಿ ಇಟ್ಟುಕೊಂಡ ವಿಷಯವನ್ನು ತಕ್ಕ ಕಾಲದಲ್ಲಿ ಸರಿಯಾಗಿ ಬಳಸುವಿಕೆ. ಆದ್ದರಿಂದ ಶೃದ್ಧಾ, ಮೇಧಾ ಮತ್ತು ಪ್ರಜ್ಞಾ ಶಕ್ತಿ ಪ್ರತಿ ಮನುಷ್ಯನಿಗೆ ಅತಿ ಅಗತ್ಯ.

ನಾವು ಪ್ರತಿದಿನ ನಿತ್ಯೆ ಪೂಜೆಯ ಕೊನೆಯಲ್ಲಿ ಪುರುಷೋತ್ತಮ ನನ್ನ (ದೇವರನ್ನು) ಪ್ರಾರ್ಥಿಸುತ್ತೇವೆ ..

" ಶ್ರದ್ಧ ಮೇಧಾಮ್ ಯಶಃ ಪ್ರಜ್ಞಾಮ್.. ವಿದ್ಯಾ ಬುದ್ಧಿಮ್ ಶ್ರಿಯಂ ಬಲಂ ... ಆಯುಷ್ಯಮ್ ತೇಜ ಆರೋಗ್ಯಮ್ ದೇಹಿ ಮೇ ಪುರುಷೋತ್ತಮ .."

ಏನಂತೀರಿ ?



ಕಂಕುಳಲ್ಲಿ ಮಗು ಇಟ್ಟುಕೊಂಡು ಬಾವಿಯಲ್ಲಿ ಮಗುವನ್ನು ಹುಡುಕಿದ್ದಳಂತೆ. ....... ಗಾದೆ.

ತನ್ನ ಸೊಂಟದ ಮೇಲೆ ಮಗುವನ್ನು ಇಟ್ಟುಕೊಂಡ ತಾಯಿ ಅದನ್ನು ಮರೆತು ಮಗುವನ್ನು ಹುಡುಕುತ್ತಾಳೆ. ಎಲ್ಲಿಯೂ ಸಿಗದೇ ಕೊನೆಗೆ ಬಾವಿಯಲ್ಲಿ ಒಮ್ಮೆ ಬಿದ್ದಿದೆಯಾ ಅಂತ ಹಣುಕುತ್ತಾಳೆ. ಬಾವಿಯ ತಿಳಿನೀರಿನಲ್ಲಿ ತನ್ನ ಸೊಂಟದ ಮೇಲೆ ಇರುವ ಮಗುವಿನ ಬಿಂಬ ಕಾಣುತ್ತದೆ. ಅದನ್ನು ಕಂಡು ಭ್ರಮೆಯಿಂದ ' ಅಯ್ಯೋ ನನ್ನ ಮಗು ಬಾವಿಯಲ್ಲಿ ಬಿದ್ದು ಬಿಟ್ಟಿದೆ ಎಂದು ಕೈಯೆತ್ತಿಬಿಡುತ್ತಾಳೆ. ಆಗ ಕಂಕುಳಲ್ಲಿ ಇದ್ದ ಮಗು ನಿಜವಾಗಿಯೂ ಬಾವಿಗೆ ಬಿದ್ದುಬಿಡುತ್ತದೆ. ಇದರ ಇಂಗಿತಾರ್ಥ ಅಂದರೆ ನಾವು ನಮ್ಮ ಆಸೆಯನ್ನು ತೀರಿಸುವ ಸಾಧನವನ್ನು ನಮ್ಮ ತೊತೆಗೆ ಇಟ್ಟುಕೊಂಡು ಮತ್ತೆಲ್ಲೋ ಅರಸಲು ಹೋಗಿ ಅದನ್ನು ಕಳೆದುಕೊಂಡು ಬಿಡುತ್ತೇವೆ.

Saturday, 21 April 2018

#### ಸಲಹೆ, ಭೋಧನೆಯ ಮಾತುಗಳು ಹೇಗೆ, ಎಲ್ಲಿ, ಯಾರಿಗೆ ? ####

~~~~ ಎಂ. ಗಣಪತಿ ಕಾನುಗೋಡು. ಯಾವುದೇ ಮಾತನ್ನಾದರೂ ಅದನ್ನು ಕೇಳುವವನ ಶಕ್ತಿ, ತಾಳ್ಮೆ ಮತ್ತು ಅವನ ಅಗತ್ಯವನ್ನು ಗ್ರಹಿಸಿ ಆಡಬೇಕಾಗುತ್ತದೆ. ಅದಿಲ್ಲದಿದ್ದರೆ ನಮ್ಮ ಆ ಮಾತು ವ್ಯರ್ಥ, ಕೆಲವೊಮ್ಮೆ ಅನರ್ಥಕ್ಕೂ ಎಡೆಮಾಡಿಕೊಡುತ್ತದೆ. ಅಪಹಾಸ್ಯಕ್ಕೆ ಗುರಿಯಾಗುತ್ತದೆ. ಸಮಯ , ಸಂದರ್ಭವನ್ನು ತಿಳಿಯದೆಯೇ ನಮ್ಮ ದೃಷ್ಟಿಯಲ್ಲಿ ಸರಿಯೆನಿಸಿದ ಮಾತುಗಳನ್ನು ಕೂಡಾ ಯೋಚಿಸಿ ಮಾತನಾಡಬೇಕಾಗುತ್ತದೆ. ಒಬ್ಬನಿಗೆ ತನ್ನದೇ ಕೆಲಸದ, ಸಮಸ್ಯೆಯ ಒತ್ತಡವಿದ್ದಾಗ ಇನ್ನೊಬ್ಬರ ಮಾತನ್ನು ಕೇಳುವಷ್ಟು ತಾಳ್ಮೆ ಇರುವುದಿಲ್ಲ. ಯಾವುದೋ ಒಂದು ನಿಲುವಿಗೆ ತಳಿಕೆ ಹಾಕೊಂಡವನಿಗೆ ಇನ್ನೊಬ್ಬರ ಮಾತನ್ನು ಅನುಸರಿಸುವ ಮನೋಭಾವ ಇರುವುದಿಲ್ಲ. ತಿಳಿವಳಿಕೆ ಕಡಿಮೆ ಇದ್ದವನಿಗೆ ಇನ್ನೊಬ್ಬರ ಮಾತನ್ನು ಜೀರ್ಣಿಸಿಕೊಳ್ಳುವ ಶಕ್ತಿ ಇರುವುದಿಲ್ಲ. ಯೌವನದ ಮದ, ಅಲ್ಪಜ್ಞಾನದ ಮದ [ ಮೂರ್ಖತನ ] ], ಹಣ, ಅಧಿಕಾರದ ಮದ, ಸ್ವಪ್ರತಿಷ್ಠೆಯ ಮದ ಹೀಗೆ ಯಾವುದೇ ಮದ ಇದ್ದವನಿಗೆ ಸಲಹೆ, ಬೋಧನೆ, ಹಿತವಚನ ಎಲ್ಲವೂ ನಂಜಾಗಿ ವ್ಯತಿರಿಕ್ತವಾಗುತ್ತದೆ. ಯಾವುದೇ ವಿಚಾರಕ್ಕೂ ಕರಾರುವಾಕ್ಕಾಗಿ ಮಾತನಾಡಬೇಕೆಂಬುದು ತಾರ್ಕಿಕ ವಿಚಾರ ಹೌದು. ಆದರೆ ವಾಸ್ತವಿಕ ಜೀವನದಲ್ಲಿ ಅದು ವಿರೋಧಭಾವವಾಗುತ್ತದೆ. ಯಾವುದೇ ಸನ್ನಿವೇಶದಲ್ಲಿ, ಯಾವುದೇ ವ್ಯಕ್ತಿಗೆ ಅಥವಾ ಯಾವುದೇ ಘಟನೆಗೆ ಸಂಬಂಧ ಪಟ್ಟಂತೆ ಮಾತನಾಡಬೇಕಾದರೆ ಬಹಳ ಸೂಕ್ಷ್ಮ ದೃಷ್ಟಿ ಬೇಕು,. ಹಿಂದುಮುಂದಿನ ವಿಷಯಗಳ ಅರಿವು ಇರಬೇಕು. ಇದ್ದುದನ್ನು ಇದ್ದ ಹಾಗೆ ಮಾತನಾಡುವುದು ಸಲ್ಲದು. ಅನೇಕ ಸಂದರ್ಭಗಳಲ್ಲಿ ಮಾತೂ ಮೂಕವಾಗಬೇಕಾಗುತ್ತದೆ ತಾರೀಖು 20 -- 4 -- 2018

Sunday, 18 March 2018

###### ಚಾಂದ್ರಮಾನ ಯುಗಾದಿ ######


~~~~~ ಎಂ. ಗಣಪತಿ ಕಾನುಗೋಡು.
ನಮ್ಮಲ್ಲಿ ಹಬ್ಬದ ಆಚರಣೆಗೂ ಒಂದು ಅರ್ಥ ಇದೆ. ಮನುಷ್ಯನಿಗೆ ಬದುಕಿನಲ್ಲಿ ನಿತ್ಯ ಜೀವನದ ಒತ್ತಡದಲ್ಲಿ ಸಂತೋಷವನ್ನು ಕಾಣಲಿಕ್ಕಾಗಿ ಒಂದೊಂದು ದಿನವನ್ನು ನಿರ್ಣಯಿಸಿ ಆ ದಿನದಂದು ಒಂದೊಂದು ಹಬ್ಬವನ್ನು ಆಚರಿಸಲಾಗುತ್ತದೆ. ಒಂದು ಹಬ್ಬದ ಆಚರಣೆಯ ಮಿಥಿಗೂ ಒಂದು ಅರ್ಥ ಇದೆ. ಸಾಂಪ್ರದಾಯಿಕ , ಪೌರಾಣಿಕ ಹಿನ್ನೆಲೆ ಇದೆ. ಆ ದಿನದಂದು ನಾವು ನಮ್ಮ ಎಷ್ಟೇ ತೊಂದರೆ ಇದ್ದರೂ ಸಮಯವನ್ನು ಹೊಂದಿಸಿಕೊಂಡು ಸಂಭ್ರಮವನ್ನು ಆಚರಿಸುತ್ತೇವೆ. ಕೆಲವು ಹಬ್ಬಗಳಿಗಂತೂ ಇಂಥಾದ್ದೇ ಭಕ್ಷ್ಯ ಆಗಬೇಕೆಂಬ ರೂಢಿ ಬಂದಿದ್ದು ಇದೇ ಕಾರಣಕ್ಕಾಗಿ. ತೀರಾ ಬಡತನದ ಒಂದು ಕಾಲದಲ್ಲಿ ಸಾಲ ಮಾಡಿಯಾದರೂ ನಮ್ಮ ಹಿಂದಿನವರು ವಿಶೇಷ ಭಕ್ಷ್ಯವನ್ನು ತಿನ್ನುತ್ತಿದ್ದರು. ಇಂದು ನಮಗೆ ಅಂಥಹ ಬಡತನ ಇಲ್ಲ. ಆದರೆ ನಮಗೆ ಯಾವುದಕ್ಕೂ ಪುರುಸೊತ್ತೇ ಇರುವುದಿಲ್ಲ. ಅಂಥಹ ಆಚರಣೆಯಲ್ಲಿ ಯುಗಾದಿಯೂ ಒಂದು.
ಚೈತ್ರ ಶುದ್ಧ ಪಾಡ್ಯಮಿಯಂದು ಚಾಂದ್ರಮಾನ ಯುಗಾದಿ ಹಬ್ಬವನ್ನು ಆಚರಿಸಲಾಗುತ್ತದೆ. ಸೌರಮಾನ ಯುಗಾದಿ ಎನ್ನುವ ಮತ್ತೊಂದು ಆಚರಣೆ ಬೇರೆ ಇದೆ. ಅದನ್ನು ಮೇಷ ಮಾಸದ ಸಂಕ್ರಮಣದ ದಿನ ಆಚರಿಸಲಾಗುತ್ತದೆ. ನಮ್ಮಲ್ಲಿ ರೂಢಿಯಲ್ಲಿ ಇರುವುದು ಚಾಂದ್ರಮಾನ ಯುಗಾದಿ.
ಹಿಂದೂ ಸಂಪ್ರದಾಯದಲ್ಲಿ ಯುಗಾದಿಯಿಂದ ಹೊಸ ವರ್ಷ ಪ್ರಾರಂಭವಾಗುತ್ತದೆ. ರೋಮನ್ ಸಂಪ್ರದಾಯದ ಪ್ರಕಾರ ಜನವರಿಯ ಮೊದಲನೆಯ ದಿನವನ್ನು ಪಾಶ್ಚಿಮಾತ್ಯರು ಹೊಸ ವರ್ಷದ ದಿನವೆಂದು ಆಚರಿಸುತ್ತಾರೆ.
ಯುಗ ಎಂದರೆ ಇಲ್ಲಿ ವರ್ಷ ಎಂದು ಅರ್ಥೈಸಲಾಗಿದೆ. ಹೊಸ ವರ್ಷದ ಮೊದಲನೆಯ ದಿನವನ್ನು ಯುಗಾದಿ [ ಯುಗದ ಆದಿ ] ಎಂದು ಕರೆಯಲಾಗಿದೆ.
ಕರ್ನಾಟಕ, ಆಂಧ್ರ, ಮಹಾರಾಷ್ಟ್ರಗಳಲ್ಲಿ ಚೈತ್ರ ಶುದ್ಧ ಪಾಡ್ಯಮಿಯಂದು ಯುಗಾದಿಯನ್ನು ಆಚರಿಸುತ್ತಾರೆ. ಉತ್ತರ ಭಾರತದವರು ವಿಕ್ರಮ ಶಕದ ಆರಂಭದ ದಿನ ಅಂದರೆ ಕಾರ್ತಿಕ ಶುದ್ಧ ಪಾಡ್ಯಮಿಯಂದು ಯುಗಾದಿಯನ್ನು ಆಚರಿಸುತ್ತಾರೆ. ಹಿಂದೆ ದಕ್ಷಿಣ ಭಾರತದಲ್ಲಿ ಆಳುತ್ತಿದ್ದ ದೊರೆ ಶಾಲಿವಾಹನನು ತನ್ನ ವಿಜಯದ ಸಂಕೇತವಾಗಿ ಶಕೆ ಪ್ರಾರಂಭಿಸಿದುದೂ ಚೈತ್ರ ಶುದ್ಧ ಪಾಡ್ಯಮಿಯಂದು.
ಋತುಗಳ ರಾಜ ವಸಂತನು ಈ ದಿನದಂದು ತನ್ನ ಶುಭ ಪಾದಾರ್ಪಣ ಮಾಡುತ್ತಾನೆ. ಗಿಡಮರಗಳಿಂದ ಎಲೆಗಳನ್ನು ಉದುರಿಸಿದ ಶಿಶಿರ ಋತು ಹೋಗಿ ಹೊಸ ಚಿಗುರು ಎಲೆ, ಹೂಗಳಿಗೆ, ಕಾಯಿಗಳಿಗೆ ಕಾರಣವಾಗುವ ವಸಂತ ಋತು ಇಂದಿನಿಂದ ಪ್ರಾರಂಭ ಆಗುತ್ತದೆ.
ಯುಗಾದಿಯ ದಿನ ಮನೆಮಂದಿಯೆಲ್ಲಾ ಬೆಳಗಿನ ಜಾವವೇ ಅಭ್ಯಂಜನ ಮಾಡಬೇಕೆಂಬುದು ಎಂದಿನ ಸಂಪ್ರದಾಯ. ಇಂದು ಹೊಸ ಬಟ್ಟೆಯನ್ನು ಧರಿಸಬೇಕು. ಇಷ್ಟದೇವತಾ ಪೂಜೆಯನ್ನು ಮಾಡಿ ಬೇವು -- ಬೆಲ್ಲ ತಿಂದು ಸಿಹಿ ಊಟವನ್ನು ಮಾಡಬೇಕು. ದೇವಸ್ಥಾನಗಳಲ್ಲಿ, ಗುರುಮನೆಗಳಲ್ಲಿ ಉತ್ಸವ ವಿಶೇಷಗಳು ನಡೆದು ಪಂಚಾಗ ಶ್ರಾವಣ ಕಾರ್ಯಕ್ರಮವೂ ನಡೆಯುತ್ತದೆ. ಇಂದಿನ ದಿನ ಚಂದ್ರ ದರ್ಶನವನ್ನು ಮುಖ್ಯವಾಗಿ ಮಾಡಬೇಕು.
ಬೇವು -- ಬೆಲ್ಲದ ಸೇವನೆಗೆ ಒಂದು ಅರ್ಥ ಇದೆ. ಸಿಹಿ ಕಹಿಗಳು , ಸುಖ ದುಃಖಗಳನ್ನೂ ಸಮನಾಗಿ ನೋಡಿ ಪ್ರತಿಯೊಬ್ಬನೂ ಸಮದರ್ಶಿಯೂ, ಸ್ಥಿತಪ್ರಜ್ನನೂ ಆಗಬೇಕೆಂಬುದು ಇದರ ಸಂದೇಶ.
ತಾರೀಖು : 17 -- 3 -- 2018
ಯುಗಾದಿಯ ಮುನ್ನಾದಿನ.

Sunday, 11 February 2018

ಅಡಿಕೆ ಸುಗ್ಗಿ

ಮರದ ಮೇಲಿರುವ ಅಡಿಕೆಯ ಬೆಳೆ, ಅಡಿಕೆಯನ್ನು ಮರದಿಂದ ಕೊಯ್ದು ಕೆಳಗೆ ಇಳಿಸುವ ಬಗೆ, ತೋಟದಲ್ಲಿ ಕೊಯ್ಯುವಾಗ ಉದುರಿದ ಅಡಿಕೆಯನ್ನು ಆರಿಸುವುದು, ಅಡಿಕೆಯನ್ನು ಬೆತ್ತದ ಕಲ್ಲಿಯಲ್ಲಿ ಹೊತ್ತು ತೋಟದಿಂದ ಮನೆಗೆ ತರುವುದು, ತೋಟದಲ್ಲಿ ಅಡಿಕೆ ಸುಗ್ಗಿಯ ಕೂಲಿಕಾರರ ಚಹಾ ವಿಶ್ರಾಂತಿ, ಸಾಗರ ಸೀಮೆಯ ಪದ್ಧತಿ ಪ್ರಕಾರ ಅಡಿಕೆ ಗೊನೆಯನ್ನು ಜಜ್ಜಿ ಬೇರ್ಪಡಿಸಿ ಹಸಿರು ಅಡಿಕೆಯನ್ನು ಸುಲಿಯಲಿಕ್ಕೆ ರಾಶಿ \ ಉದಿ ಹಾಕುವುದು, ಮೆಟ್ಟುಗತ್ತಿ \ ಹಾಯಗತ್ತಿಯಿಂದ ಹಸಿರು ಅಡಿಕೆಯನ್ನು ಸುಲಿಯುವುದು, ಸಾಗರ ಸೀಮೆಯ ಪದ್ಧತಿಯಂತೆ ಹಸಿರಡಿಕೆಯನ್ನು ಗೊನೆಯಿಂದ ಬೇರ್ಪಡಿಸಿ ಉದಿ ಹಾಕಿ ಸಾಲಿನಲ್ಲಿ ಕುಳಿತು ಅಡಿಕೆಯನ್ನು ಸುಲಿಯುತ್ತಿರುವುದು, ತಾಯಂದಿರ ಜೊತೆಗೆ ಮಧ್ಯಾಹ್ನದ ಊಟ ಸವಿಯಲು ಬಂದ ಅವರ ಮಕ್ಕಳ ಸುಲಿತದ ಮೇಳ, ಹಾಯಗತ್ತಿಯಿಂದ ಸುಲಿದ ಅಡಿಕೆಯ ಸಿಪ್ಪೆಯ ಗುಪ್ಪೆ -- ಎರಡೇ ಸಿಪ್ಪೆಯಾಗಿರುವುದು ಮತ್ತು ಮೆಟ್ಟುಗತ್ತಿಂದ ಸುಲಿದ ಸಿಪ್ಪೆಯ ಗುಪ್ಪೆ - ಮೂರು ಸಿಪ್ಪೆಯಾಗಿರುವುದು [ ಹದಿನಾಲ್ಕನೇ ಚಿತ್ರ ]. ಸುಲಿದ ಸಿಪ್ಪೆಯನ್ನು ಹೊತ್ತು ಹೊರಗೆ ಹಾಕುತ್ತಿರುವುದು, ಸುಲಿದ ಅಡಿಕೆಯನ್ನು ಬೆಂಕಿಯಿಂದ ಬೇಯಿಸುವುದು, ಬೇಯಿಸಿದ ಅಡಿಕೆಯನ್ನು ಚಾಪೆಯ ಮೇಲೆ ಪ್ರತಿನಿತ್ಯ ಬಿಸಿಲಿಗೆ ಹರವಿ ಒಂದು ವಾರ ಒಣಗಿಸುವುದು. ಒಣಗಿದ ಅಡಿಯಲ್ಲಿ ಕೆಂಪುಗೋಟು, ಕಸರು, ಕಲ್ಲುಬೆಟ್ಟೆ, ಆಪಿ, ಚಿಕಣಿ ಅಡಿಕೆಯನ್ನು ಆರಿಸಿ ಬೇರ್ಪಡಿಸುವುದು. ಚೀಲಗಳಲ್ಲಿ ತುಂಬಿಟ್ಟು ಮಾರಾಟ ಮಾಡಲು ಸಿದ್ಧಪಡಿಸಿದ ಕೆಂಪು ಅಡಿಕೆ [ ರಾಶಿ ಅಡಿಕೆ ]. ಇದು ಅಡಿಕೆ ಸುಗ್ಗಿಯ ಒಂದು ಸಾಮಾನ್ಯ ಚಿತ್ರಣ. ಚಾಲಿ ಅಡಿಕೆ ಸುಲಿಯುವ ಪ್ರಕ್ರಿಯೆ ಬೇರೆ ಇದೆ.





Tuesday, 16 January 2018

#### ಮಕರ ಸಂಕ್ರಾಂತಿ ####

ಎಂ. ಗಣಪತಿ. ಕಾನುಗೋಡು.

ಮಕರ ಸಂಕ್ರಾಂತಿ ಅಥವಾ ಮಕರ ಸಂಕ್ರಮಣವು ಸೂರ್ಯನ ಪಥ ಬದಲಾವಣೆಗೆ ಸಂಬಂಧಿಸಿದ ಪರ್ವದಿನ [ Transition Day ]. ಸೂರ್ಯನು ಮಕರ ರಾಶಿಗೆ ಪ್ರವೇಶಿಸಿ ದಕ್ಷಿಣದಿಂದ ಉತ್ತರಾಭಿಮುಖವಾಗಿ 6 ತಿಂಗಳು ಪ್ರಯಾಣ ಬೆಳಸುತ್ತಾನೆ. ಪೌಷ್ಯ ಲಕ್ಷ್ಮಿಯ ಆಗಮನದ ತರುವಾಯ ಸೂರ್ಯನು ಮಕರ ರಾಶಿಗೆ ಪ್ರವೇಶಿಸುತ್ತಾನೆ. ಈ ದಿನವನ್ನೇ ಮಕರ ಸಂಕ್ರಾಂತಿ ಎಂದು ಕರೆಯುವುದು. ಹೀಗೆ ಸೂರ್ಯಪಥ ಗಮನದಿಂದ ಭಾರತವಲ್ಲದೆ ಅರೇಬಿಯಾ, ಸಿರಿಯಾ, ಬೆಬಿಲೋನ್, ರೋಮ್ ಮೊದಲಾದ ದೇಶಗಳಿಗೆ ರಾತ್ರಿ ಕಡಿಮೆ ಆಗಿ ಹಗಲು ಹೆಚ್ಚು ದೊರಕುತ್ತದೆ.
ಮದುವೆಯಾದ ಮೊದಲ ವರ್ಷದಲ್ಲಿ ಮಕರ ಸಂಕ್ರಾಂತಿಯಂದು ಹತ್ತಿರದ ನೆಂಟರಿಷ್ಟರೊಂದಿಗೆ ಸೊಸೆಯನ್ನು ತವರಿಗೆ ಕರೆದೊಯ್ದು ತಾಯಿಗೆ ಸೋಸೆಯಿಂದ ಬಾಗೀನ ಕೊಡಿಸುವ ಪದ್ಧತಿ ಕೆಲವೆಡೆ ಇದೆ. ಕರ್ಕಾಟಕ ಸಂಕ್ರಾಂತಿಯಂದು ತವರ ಮನೆಯವರು ತಮ್ಮ ಹತ್ತಿರದ ಬಂಧು ಮಿತ್ರರೊಂದಿಗೆ ಬಂದು ಮಗಳ ಕೈಯಿಂದ ಗಂಡನ ಮನೆಯ ಹೊಸ್ತಿಲ ಪೂಜೆಯನ್ನು ಮಾಡಿಸುತ್ತಾರೆ.
ಹಿಂದೂ ಪದ್ಧತಿಯಲ್ಲಿ ಪ್ರತಿಯೊಂದು ಮಾಸಕ್ಕೆ ತಕ್ಕಂತೆ ಒಂದೊಂದು ರಾಶಿ ಹಾಗೂ ಸಂಕ್ರಮಣ ಇದೆ. ಒಂದು ರಾಶಿಯಿಂದ ಮತ್ತೊಂದು ರಾಶಿಗೆ ಸೂರ್ಯನು ಹೋಗುವುದೇ ಸಂಕ್ರಮಣ. ಅಂತೆಯೇ ಹನ್ನೆರಡು ರಾಶಿಗಳಿಗೆ ತಕ್ಕಂತೆ ಹನ್ನೆರಡು ಸಂಕ್ರಮಣಗಳು ಇವೆ. ಇವುಗಳಲ್ಲಿ ಮಕರ ಸಂಕ್ರಮಣ [ ಜನವರಿ 14 ] ಮತ್ತು ಕರ್ಕಾಟಕ ಸಂಕ್ರಮಣ [ ಜುಲೈ 16 ] ಗಳನ್ನು ಮುಖ್ಯವಾಗಿ ಆಚರಿಸಲಾಗುತ್ತದೆ.
ಎಲ್ಲ ಸಂಕ್ರಮಣಗಳು ಪ್ರತಿ ತಿಂಗಳು 14 , 15 ಅಥವಾ 16 ನೆ ತಾರೀಖಿನಂದು ಮಾತ್ರ ಬರುತ್ತವೆ. ಈ ದಿನಗಳು ಶುಭ ಕಾರ್ಯಗಳಿಗೆ ಪ್ರಶಸ್ತವಲ್ಲ ಎನ್ನುತ್ತಾರೆ. ಸಂಕ್ರಮಣ ಕಾಲದಲ್ಲಿ ಶೃದ್ಧಾಭಕ್ತಿ ವಿವೇಕಗಳಿಂದ ಮಾಡುವ ಸ್ನಾನ, ಧ್ಯಾನ, ಹೋಮ, ಪೂಜೆ, ತರ್ಪಣ, ಶ್ರಾದ್ಧ , ಉಪವಾಸ ವ್ರತಗಳನ್ನು ನಡೆಸುವುದು ಒಳ್ಳೆಯದು ಎಂದು ಹೇಳಲಾಗಿದೆ.
ಸಂಕ್ರಾಂತಿಯು ಪುಣ್ಯಕಾಲವೆಂದು ಪರಿಗಣಿತವಾದುದರಿಂದ ಅಂದು ಪುಣ್ಯತೀರ್ಥಗಳಲ್ಲಿ ಸ್ನಾನ ಮಾಡುವುದು ಅತ್ಯಂತ ಪ್ರಶಸ್ತ. ಹೀಗೆ ಮಾಡುವ ಸ್ನಾನವು ಶರೀರದ ಕೊಳೆಯನ್ನು ತೊಳೆಯುವ ಮಲಾಪಕರ್ಷಣ ಸ್ನಾನವಲ್ಲ. ಮಾನಸಿಕ ದೋಷಗಳನ್ನು ತೊಳೆಯುವ ಪುಣ್ಯಸ್ನಾನ. ಅದಕ್ಕಾಗಿ ಬಿಸಿನೀರಿನಿಂದ ಮಾಡುವ ಅಭ್ಯಂಜನಕ್ಕಿಂತ ಗಂಗಾದಿ ಪುಣ್ಯತೀರ್ಥಗಳಿಗೆ ಹೋಗಿ ಸಂಕಲ್ಪ ಪೂರಕವಾಗಿ ತಣ್ಣೀರಿನ ಸ್ನಾನ ಮಾಡುವುದು ಒಳ್ಳೆಯದು. ಪುಣ್ಯ ಸ್ನಾನವಾದ ನಂತರ ಶ್ರಾದ್ಧಕ್ಕೆ ಅಧಿಕಾರವುಳ್ಳವರು ಪಿತೃಗಳನ್ನೂ ಕುರಿತು ತರ್ಪಣಾದಿ ರೂಪದಲ್ಲಿ ಶ್ರಾದ್ಧ ಮಾಡಬೇಕು. ದಾನಧರ್ಮಗಳನ್ನು ಮಾಡಬೇಕು.
ಧ್ಯಾನ ಧೀಕ್ಷೆ ಮತ್ತು ಮಂತ್ರಧೀಕ್ಷೆಯನ್ನು ಪಡೆಯುವುದಕ್ಕೆ ಇದು ಉತ್ತಮವಾದ ಕಾಲ. ಹಿಂದೂಗಳು ಮಕರ ಸಂಕ್ರಾಂತಿಯ ದಿನವನ್ನು ' ಉತ್ತರಾಯಣ ಪುಣ್ಯಕಾಲ ' ಎಂದು ಕರೆಯುತ್ತಾರೆ. ಏಕೆಂದರೆ ಸೂರ್ಯನಾರಾಯಣನು ದಕ್ಷಿಣದಿಂದ ಉತ್ತರ ದಿಕ್ಕಿಗೆ ಹೆಜ್ಜೆಯಿಡಲು ಪ್ರಾರಂಭಿಸುವ ಪವಿತ್ರ ಸಮಯವಾಗಿರುತ್ತದೆ. ಈ ದಿನ ಸ್ವರ್ಗದ ಬಾಗಿಲು ತೆರೆಯುತ್ತದೆ ಎಂದು ನಮ್ಮವರ ನಂಬಿಕೆ. ಶರಶಯ್ಯೆಯ ಮೇಲೆ ಮಲಗಿದ್ದ ಇಚ್ಛಾಮರಣಿ ಭೀಷ್ಮರು ಸಹ ಕೊನೆಯುಸಿರನ್ನು ಎಳೆಯುವುದಕ್ಕಾಗಿ ಉತ್ತರಾಯಣ ಬರುವವರೆಗೆ ಕಾಯ್ದಿದ್ದರು. ಮಕರ ಸಂಕ್ರಾಂತಿಯ ದಿನದಿಂದ ದೇವತೆಗಳಿಗೆ ಹಗಲು ರಾಕ್ಷಸರಿಗೆ ರಾತ್ರಿ ಆಗುವುದೆಂದು ಪುರಾಣಗಳ ಹೇಳಿಕೆ. ಮಧ್ಯಾಹ್ನದ ಬೋಜನವಾದ ನಂತರ ಪರಿಕರ ಸಹಿತವಾದ ಎಳ್ಳು ಬೆಲ್ಲವನ್ನು, ಕಬ್ಬಿನ ಜಲ್ಲೆಯನ್ನು, ಸಕ್ಕರೆಯಿಂದ ಮಾಡಿದ ವಿಗ್ರಹಗಳನ್ನು ಹಂಚುವ ಪದ್ಧತಿ ಇದೆ. ಇವೆಲ್ಲವನ್ನೂ ಹಂಚಿ ಇಷ್ಟಮಿತ್ರರೊಂದಿಗೆ ಮಧುರ ಮಾತುಗಳನ್ನು ಆಡುತ್ತಾರೆ. ಸಾಮಾಜಿಕ ಸಂಬಂಧವನ್ನು ಘಟ್ಟಿಗೊಳಿಸಲು ಇದು ಒಂದು ಮಾರ್ಗ. ಸಾಗರದ ಕೆಲವು ಕಡೆ ಮದ್ಯಾಹ್ನದ ಊಟಕ್ಕೆ ಸಿಹಿ ಹೆಸರುಬೇಳೆ ಹುಗ್ಗಿ [ ಪೊಂಗಲ್ ] ಮತ್ತು ಸಿಹಿ ಬೆರಸದ ಪೊಂಗಲ್ , ಜೊತೆಗೆ ಹೊಸ ಹುಣಿಸೆ ಹಣ್ಣಿನ ಹುಳಿಗೊಜ್ಜನ್ನು ಮಾಡುತ್ತಾರೆ. ಭೋಗಿ, ಸಂಕ್ರಮಣ ಮತ್ತು ಕನು ಹಬ್ಬ ಎಂದು ಮೂರು ದಿನಗಳ ಕಾಲ ಈ ಹಬ್ಬವನ್ನು ಆಚರಿಸುವ ಪದ್ಧತಿ ಕೆಲವೆಡೆ ಇದೆ. ಸುಗ್ಗಿಯ ಕಾಲದ ಹಿಗ್ಗು ಬಂದಿರುತ್ತದೆ. ಕಬ್ಬು ಸಮೃದ್ಧಿಯಾಗಿ ಈ ವೇಳೆಗೆ ಬೆಳೆದಿರುತ್ತದೆ. ಮನೆಯಲ್ಲಿ ಮಕ್ಕಳಿಗೆ ಅಭ್ಯಂಜನ ಮಾಡಿಸಿ ಮಕ್ಕಳ ತಲೆಯ ಮೇಲೆ ಭೋಗಿ ಹಣ್ಣು [ ಬದರೀಫಲ] [ ಬೋರೆಯ ಹಣ್ಣು,ಎಲಚಿಹಣ್ಣು ] , ಕಬ್ಬು ಮೊದಲಾದುವುಗಳನ್ನು ಎರೆದು ಆರತಿ ಮಾಡುವ ಪದ್ಧತಿ ಕೆಲವೆಡೆ ಇದೆ. ಕೆಲವು ಕಡೆ ಹಸು , ಎಮ್ಮೆ ಮೊದಲಾದ ಜಾನುವಾರುಗಳಿಗೆ ಸ್ನಾನ ಮಾಡಿಸಿ ಅವುಗಳ ಕೋಡಿಗೆ , ಮೈಗೆ ಬಣ್ಣ ಬಳಿದು ಅಲಂಕರಿಸುತ್ತಾರೆ. ಅವುಗಳಿಗೆ ಪ್ರಿಯವಾದ ಹುಲ್ಲುಕಡ್ಡಿ, ಧಾನ್ಯ, ಕಾಯಿ, ಬೆಲ್ಲವನ್ನು ತಿನ್ನಿಸುತ್ತಾರೆ. ದೃಷ್ಟಿದೋಷ, ಪೀಡೆಯ ನಿವಾರಣೆಗಾಗಿ ಬೆಂಕಿಯ ಮೇಲೆ ದಾಟಿಸುವ ಪದ್ಧತಿ ಇದೆ. ಇದಕ್ಕೆ ಕಿಚ್ಚು ಹಾಯಿಸುವುದು ಎನ್ನುತ್ತಾರೆ.
ಇನ್ನು ಕೆಲವು ಕಡೆ ದೇವಸ್ಥಾನಗಳಲ್ಲಿ ದೇವರ ಮುಂದೆ ಮೊಲಕ್ಕೆ ಅರಿಸಿನ - ಕುಂಕುಮ ಬಳಿದು ಹೂವು ಮುಡಿಸಿ ಪೂಜೆ ಮಾಡಿ ಬಿಡುವ ಪದ್ಧತಿ ಇದೆ.
ಆಂದ್ರದಲ್ಲಿಯೂ ಈ ಹಬ್ಬವನ್ನು ಸಂಭ್ರಮದಿಂದ ಆಚರಿಲಾಗುತ್ತದೆ. ಶ್ರೀರಾಮನು ರಾವಣನನ್ನು ಕೊಂದು ಸೀತೆಯನ್ನು ತಂದ ದಿನವೆಂದು ಭಾವಿಸಿ ಮನೆಯ ಮುಂದೆ ಬೆಂಕಿಯನ್ನು ಹಾಕಿ ರಾವಣ ದಹನವನ್ನು ನಡೆಸುತ್ತಾರೆ. ಇದನ್ನು ' ಭೋಗಿಮಂಟ 'ಎಂದು ಕರೆಯುತ್ತಾರೆ. ಸ್ವರ್ಗಸ್ತರಾದ ಪಿತೃಗಳು ಅದೃಶ್ಯರಾಗಿ ಸ್ವರ್ಗಲೋಕದಿಂದ ತಮ್ಮ ಮನೆಯಂಗಳಕ್ಕೆ ಆಗಮಿಸುವರೆಂದು ಅವರ ನಂಬಿಕೆ.
ತಮಿಳುನಾಡಿನಲ್ಲಿ ಸಂಕ್ರಾಂತಿಯ ಹಬ್ಬವನ್ನು ' ಪೊಂಗಲ್ ' ಎಂದು ಕರೆಯುತ್ತಾರೆ. ವಿಶೇಷ ವಿಧಿಯಿಂದ ಹಾಲನ್ನು ಕಾಯಿಸಿ ಉಕ್ಕಿಸುವ ದಿನವಾದ್ದರಿಂದ ಅಲ್ಲಿ ಇದು ಪೊಂಗಲ್ ಎಂದು ಪ್ರಸಿದ್ಧವಾಗಿದೆ. ಪೊಂಗಲ್ಲನ್ನು ಬೇಯಿಸಿ ಕಬ್ಬಿನ ಜಲ್ಲೆಗಳನ್ನಿರಿಸಿ ಪೂಜೆ ಮಾಡುತ್ತಾರೆ. ಅದನ್ನು ಸೂರ್ಯನಿಗೆ ನೈವೇಧ್ಯ ಮಾಡುತ್ತಾರೆ. ಸಂಕ್ರಾಂತಿಯು ತಮಿಳರಿಗೆ ಸಂಭ್ರಮದ ಹಬ್ಬ.
ಉತ್ತರ ಭಾರತದಲ್ಲಿಯೂ ಈ ಹಬ್ಬವನ್ನು ಆಚರಿಸುವುದುಂಟು. ಅಲಹಾಬಾದಿನಲ್ಲಿ ಈ ವೇಳೆಗೆ ಸುಪ್ರಸಿದ್ಧವಾದ ಕುಂಭಮೇಳವನ್ನು ನಡೆಸುವ ಪದ್ಧತಿ ಇದೆ.
ತಾರೀಖು :14 - 1 - 2018 .

Monday, 18 December 2017

#### ಖಾಂಡವವನ ದಹನವಾದದ್ದು ಏಕೆ ? ####



ಖಾಂಡವವನ ಇಂದ್ರನ ಒಡೆತನದ ಒಂದು ಉದ್ಯಾನವನ. ಅದು ಅಗ್ನಿಯಿಂದ ಸುಟ್ಟು ಬೂದಿಯಾಯಿತು. ಒಮ್ಮೆ ವರುಣಲೋಕದಲ್ಲಿ ಹನ್ನೆರಡು ವರ್ಷಗಳ ಕಾಲ ಒಂದು ಯಜ್ಞ ನಡೆಯಿತು. ಅಷ್ಟೊಂದು ದೀರ್ಘಕಾಲ ನಿರಂತರವಾಗಿ ಅಗ್ನಿಗೆ ಹವಿಸ್ಸನ್ನು ನೀಡಲಾಯಿತು. ಇದರಿಂದಾಗಿ ಅಗ್ನಿಗೆ ಜೀರ್ಣ ಶಕ್ತಿಯು ಕುಗ್ಗಿ ಅಜೀರ್ಣವಾಯಿತು.
ಅಶ್ವಿನೀದೇವತೆಗಳು ದೇವತೆಗಳಿಗೆ ಫ್ಯಾಮಿಲಿ ಡಾಕ್ಟರು. ಸರಿ, ಅಗ್ನಿದೇವನು ತನ್ನ indigestion ಬಗ್ಯೆ ಅವರಲ್ಲಿ ಸಲಹೆಯನ್ನು ಕೇಳಿದ. ಆಗ ಅಶ್ವಿನೀದೇವತೆಗಳು ಖಾಂಡವವನದಲ್ಲಿ ಅಜೀರ್ಣವನ್ನು ಹೋಗಲಾಡಿಸುವಂಥಹ ಉತ್ತಮ ಗಿಡಮೂಲಿಕೆಗಳಿವೆ, ಅವುಗಳನ್ನು ಸೇವಿಸಿದರೆ ಅಗ್ನಿಮಾಂದ್ಯ ಕಡಿಮೆಯಾಗುತ್ತದೆ ಎಂದು ತಮ್ಮ ವೈದ್ಯಕೀಯ ಸಲಹೆ ಕೊಟ್ಟರು.
ಖಾಂಡವವನವನ್ನು ಪ್ರವೇಶಿಸುವುದು ಅಷ್ಟು ಸುಲಭದ ಕೆಲಸ ಅಲ್ಲ. ಅದು ಶಕ್ತಿವಂತನಾದ ಇಂದ್ರನ ಹಕ್ಕುದಾರಿಕೆಯಲ್ಲಿ ಇರುವಂಥಹದ್ದು. ಅದಕ್ಕಾಗಿ ಅಗ್ನಿಯು ಸಹಾಯ ಬೇಡಲು ಕೃಷ್ಣಾರ್ಜುನರಲ್ಲಿಗೆ ಹೋದ. ಬೆಂಕಿಯ ರೂಪದಲ್ಲಿಯೇ ಹೋದರೆ ಅವರು ತನ್ನ ದಗೆಯ ಎದುರು ನಿಲ್ಲಲು ಸಾಧ್ಯವಾಗುವುದಿಲ್ಲವಲ್ಲ. ಅದಕ್ಕಾಗಿ ಬ್ರಾಹ್ಮಣ ವೇಷದಿಂದ ಅವರಲ್ಲಿಗೆ ಹೋದ. ತಾನು ಬೆಂಕಿಯ ರೂಪದಲ್ಲಿ ಖಾಂಡವವನದಲ್ಲಿರುವ ಗಿಡಮೂಲಿಕೆಗಳನ್ನು ಸೇವಿಸುವಾಗ ಇಂದ್ರನು ಆತಂಕಪಡಿಸಿದರೆ ತನಗೆ ರಕ್ಷಣೆ ಕೊಡಬೇಕೆಂದು ಅವರಲ್ಲಿ ನಿವೇದಿಸಿ ಸಮ್ಮತಿ ಪಡೆದುಕೊಂಡ.
ಅದರಂತೆ ಅಗ್ನಿದೇವನು ಖಾಂಡವವನದಲ್ಲಿರುವ ತನ್ನ ಅಜೀರ್ಣ ನಿವಾರಕ ಗಿಡಮೂಲಿಕೆಗಳನ್ನು ಭುಂಜಿಸಲು ಶುರುಮಾಡಿದಾಗ ಸಹಜವಾಗಿ ಆ ವನ ಸುಡುವಂತಾಯಿತು. ಹೀಗೆ ಹದಿನೈದು ದಿನಗಳ ಕಾಲ [ ಒಂದು ಅಭಿಪ್ರಾಯ ] , ಇಪ್ಪತ್ತೊಂದು ದಿನಗಳ ಕಾಲ [ ಮತ್ತೊಂದು ಅಭಿಪ್ರಾಯ ] ಆ ವನವನ್ನು ಅಗ್ನಿಯು ದಹಿಸಿದ.
ಆಗ ಸಿಟ್ಟಿಗೆದ್ದ ಇಂದ್ರ ಅಗ್ನಿಯ ಮೇಲೆ ಯುದ್ಧಕ್ಕೆ ಬಂದ. ಅಗ್ನಿಯ ರಕ್ಷಣೆಗಾಗಿ ಮಾತುಕೊಟ್ಟಿದ್ದ ಅರ್ಜುನ ಇಂದ್ರನನ್ನು ಪ್ರತಿ ಯುದ್ಧ ಕೊಟ್ಟು ಸೋಲಿಸಿಬಿಟ್ಟ. ಬೆಂಕಿಯನ್ನು ನಂದಿಸುವುದಕ್ಕಾಗಿ ಇಂದ್ರನು ಮಳೆಯನ್ನೂ ಸುರಿಸಿದ. ಆಗ ಅರ್ಜುನನು ಶರಪಂಜರದಿಂದ ಆ ಮಳೆಯು ಅಗ್ನಿಯ ಮೇಲೆ ಬೀಳದಂತೆ ಮಾಡಿದ .
ಈ ಸನ್ನಿವೇಶದಲ್ಲಿ ಮಧ್ಯೆ ಬರುವ ಬೇರೆ ಒಂದೆರಡು ವಿಚಾರಗಳು ಇಲ್ಲಿ ಅನಗತ್ಯ.
ಅಂತೂ ಕೊನೆಗೆ ಇಂದ್ರನು ಕೃಷ್ಣಾರ್ಜುನರಲ್ಲಿಗೆ ಬಂದು ರಾಜಿ ಮಾಡಿಕೊಂಡು ಹೋದ. ಖಾಂಡವವನದಲ್ಲಿರುವ ಗಿಡಮೂಲಿಕೆಗಳನ್ನು ಯಶಸ್ವಿಯಾಗಿ ಸೇವಿಸಿ ಅಗ್ನಿದೇವನು ತನ್ನ ಅಜೀರ್ಣದ ಜಾಡ್ಯವನ್ನು ನಿವಾರಿಸಿಕೊಂಡ. ಇದು ಇಂದ್ರನ ಖಾಂಡವವನ ದಹನ -- ಅಗ್ನಿದೇವನ ಅಗ್ನಿಮಾಂದ್ಯ ಹರಣ.

~~~~~ ಎಂ. ಗಣಪತಿ ಕಾನುಗೋಡು.
ತಾರೀಖು : 16 -- 12 --2017.

Monday, 6 November 2017

@@@ ರಾಮಾ ನಿನಗೆ ಎಲ್ಲರೂ ಸಮಾನರೇ ಅಲ್ಲವೇ ?. @@@


[ ಅಕ್ಬರ ಮತ್ತು ಬೀರಬಲ್ಲನ ಕಥೆಗಳು ]
~~~ ಎಂ. ಗಣಪತಿ ಕಾನುಗೋಡು.
ಅಕ್ಕಸಾಲಿಯೊಬ್ಬ ತನ್ನ ಮಗನಿಗೆ ತಮ್ಮ ಕಸುಬನ್ನು ಹೇಳಿಕೊಡುವ ಮೊದಲು ಅದರ ಮೂಲ ಗುಟ್ಟನ್ನು ಹೇಳಿಕೊಟ್ಟಿದ್ದ. ಯಾರೇ ಬಂಗಾರದ ಒಡವೆಯನ್ನು ಮಾಡಿಸಲು ತಮ್ಮ ಹತ್ತಿರ ಬಂದರೂ ಅದರಲ್ಲಿ ಸ್ವಲ್ಪ ಬಂಗಾರವನ್ನು ಕದಿಯಲೇಬೇಕು. ಇದು ವೃತ್ತಿ ಧರ್ಮ ಎಂದು ಹೇಳಿಕೊಟ್ಟಿದ್ದ. ಅವನ ಪ್ರಕಾರ ಇದು ಆ ಕಸುಬಿನ ಮೂಲಗುಟ್ಟು.
ತನಗೆ ವಯಸ್ಸಾಗಿ ಮಗನಿಗೆ ಅಂಗಡಿಯ ದಂಧೆಯನ್ನು ವಹಿಸಿಕೊಟ್ಟಿದ್ದ. ಆದರೂ ಮೇಲು ಹುಶಾರಿಗಾಗಿ ಅಂಗಡಿಯ ಮೂಲೆಯಲ್ಲಿ ಕುಳಿತುಕೊಂಡು ಮಗನ ವಹಿವಾಟನ್ನು ಗಮನಿಸುತ್ತಿದ್ದ. ತನ್ನ ಮಗ ಯಾರದ್ದೇ ಕೆಲಸಕ್ಕೆ ಅವರಿಂದ ಬಂಗಾರ ಪಡೆದು ಕೆಲಸ ಶುರುಮಾಡಿದ ಕೂಡಲೇ " ರಾಮ ರಾಮಾ ನಿನ್ನ ಕೆಲಸವನ್ನು ಮಾಡು " ಎಂದು ಮಗನಿಗೆ ಬಂಗಾರವನ್ನು ಹೊಡೆದುಕೊಳ್ಳುವ ನೆನಪನ್ನು ಸಾಂಕೇತಿಕವಾಗಿ ನೆನಪು ಮಾಡಿಕೊಡುತ್ತಿದ್ದ.
ಒಂದು ದಿನ ಅವನ ಮಗಳೇ ಒಡವೆ ಮಾಡಿಸಲಿಕ್ಕಾಗಿ ಅವನಲ್ಲಿಗೆ ಗಂಡನ ಮನೆಯಿಂದ ಬಂಗಾರವನ್ನು ತಂದು ಕೊಟ್ಟಳು. ತನ್ನ ತಮ್ಮ ತನಗೆ ಯಾವುದೇ ವಂಚನೆ ಇಲ್ಲದೆ ಕೆಲಸ ಮಾಡಿಕೊಡುತ್ತಾನೆ ಎನ್ನುವುದು ಅವಳ ನಂಬಿಕೆ. ತನ್ನ ಬಂಗಾರವನ್ನು ತಮ್ಮನಿಗೆ ಕೊಟ್ಟು ಕೆಲಸವನ್ನು ನೋಡುತ್ತಾ ಎದುರಿಗೇ ಕುಳಿತುಕೊಂಡಿದ್ದಳು. ಅಕ್ಕನ ಬಂಗಾರವನ್ನು ಬೆಂಕಿಗೆ ಹಾಕಿ ಕರಗಿಸಲಿಕ್ಕೆ ಮಗ ಅಕ್ಕಸಾಲಿ ಪ್ರಾರಂಭಿಸಿದ.
ಮೂಲೆಯಲ್ಲಿ ಕುಳಿತಿರುವ ತಂದೆಯ ಎಂದಿನ ಮಾತು ಪ್ರಾರಂಭವಾಯಿತು. " ರಾಮ ರಾಮಾ ನಿನ್ನ ಕೆಲಸವನ್ನು ಮಾಡು. ರಾಮಾ ನಿನಗೆ ಎಲ್ಲರೂ ಸಮಾನರೇ ಅಲ್ಲವೇ ? " ಎಂದು ಹೇಳಿದ. ಹೀಗೆ ಬಹಳ ಹೊತ್ತಾಯಿತು. ತನ್ನ ಮಾತನ್ನು ಮಗ ಗಮನಿಸಿದನೋ ಇಲ್ಲವೋ ಎಂದು ತಂದೆಯು ಪದೇ ಪದೇ ಅದೇ ಮಾತನ್ನು ಹೇಳತೊಡಗಿದ. ಆಗ ಮಗನಿಗೆ ಸಿಟ್ಟು ಬಂದು ಹೇಳಿಯೇಬಿಟ್ಟ.
" ಅಪ್ಪಾ, ಯಾಕೆ ಸುಮ್ಮನೆ ರಾಮ ರಾಮಾ ಎಂದು ಬಡಿದುಕೊಳ್ಳುತ್ತೀ. ರಾಮ ಲಂಕೆಯನ್ನು ಸುಲಿಗೆಮಾಡಿ ಬಹಳ ಸಮಯ ಆಯಿತು " ಎಂದು ಸಂಕೇತದ ಉತ್ತರವನ್ನು ಕೊಟ್ಟ.
.....................................................................................................
ನನ್ನ ಅನಿಸಿಕೆ : ' ಅಕ್ಕನ ಬಂಗಾರವಾದರೂ ಅಕ್ಕಸಾಲಿ ಅಕ್ಕಿಯಷ್ಟು ಬಂಗಾರವನ್ನು ಹೊಡೆಯುತ್ತಾನೆ ' ಎಂಬುದು ಹಳೆಯ ಗಾದೆ. ಇದರ ಅರ್ಥ ಯಾವುದೇ ವ್ಯವಹಾರಸ್ಥನೂ ಯಾರಿಂದಲಾದರೂ ತನ್ನ ಲಾಭವನ್ನು ಪಡೆಯದೇ ಇರುವುದಿಲ್ಲ ಎನ್ನುವ ವಾಸ್ತವಿಕ ಸತ್ಯ. ಯಾವುದೇ ಉದ್ಯೋಗದಲ್ಲಿಯೂ ಯಾರ ದಾಕ್ಷಿಣ್ಯಕ್ಕೆ ಒಳಗಾಗದೆ ಹಾಗಂತ ಅವರ ಮನಸ್ಸಿಗೆ ನೋವಾಗದಂತೆ ತನ್ನ ಪ್ರಯೋಜನವನ್ನು ಉಳಿಸಿಕೊಳ್ಳಬೇಕು, ಹೀಗೆ ತನ್ನ ಬದುಕಿನ ದಾರಿಯನ್ನು ಕಂಡುಕೊಳ್ಳಬೇಕು, ಅಂಥಹ ವೃತ್ತಿ ನೈಪುಣ್ಯತೆಯನ್ನು ಹೊಂದಿರಬೇಕು ಎನ್ನುವುದು ಈ ಕಥೆಯ ಸಂದೇಶ.
ತಾರೀಖು : 5 - 11 - 2015

ಯೋಗ ಪಟು ಕುಮಾರ ಚಂದನ್ K. R


ಕುಮಾರ ಚಂದನ್ K. R. ನಮ್ಮ ಊರಿನ ಯೋಗ ಚೆನ್ನಿಗ, ಕೀರ್ತಿಮುಕುಟ , 16 ವರ್ಷದ, PUC ಅಭ್ಯಾಸ ಮಾಡುತ್ತಿರುವ ಬಾಲಕ. ನಮ್ಮ ಊರಿನ ಮತ್ತೋರ್ವ ಯೋಗ ಪಟು ಸಂಧ್ಯಾ ಎಂ.ಎಸ್. ಇವಳ ಯೋಗಾಸನ ಹವ್ಯಾಸದ ಜೊತೆಗಾರ. ಶ್ರೀ ರಾಘವೇಂದ್ರ ಮತ್ತು ಶ್ರೀಮತಿ ವಿಜಯಲಕ್ಷ್ಮಿ ಇವರ ಹೆಮ್ಮೆಯ ಪುತ್ರ.

ರಾಜ್ಯದ ಮತ್ತು ಅಂತರ ರಾಜ್ಯದ ಹಲವಾರು ಕಡೆಗಳಲ್ಲಿ ಯೋಗದ ವಿವಿಧ ಪ್ರಬೇಧಗಳನ್ನು ಪ್ರದರ್ಶಿಸಿ ಸೈ ಎನ್ನಿಸಿಕೊಂಡಿದ್ದಾನೆ. 2016 ಸಾಲಿನಲ್ಲಿ ಅಂದರೆ ಕಳೆದ ವರ್ಷ S G F I [ School Game Federation of India ] ಎನ್ನುವ ರಾಷ್ಟ್ರ ಮಟ್ಟದ ಸಂಸ್ಥೆಯು ನಡೆಸಿದ ಮತ್ತು Yoga Federation of India ಎನ್ನುವ ಮತ್ತೊಂದು ರಾಷ್ಟ್ರ ಮಟ್ಟದ ಸಂಸ್ಥೆಯು ನಡೆಸಿದ ಯೋಗಾಸನ ಸ್ಪರ್ಧೆಯಲ್ಲಿ ಕರ್ನಾಟಕ ರಾಜ್ಯವನ್ನು ಪ್ರತಿನಿಧಿಸಿ ಭಾಗವಹಿಸಿ ಅವಾರ್ಡನ್ನು ಪಡೆದಿರುತ್ತಾನೆ.

ಯೋಗಾಸನದಲ್ಲಿ ಹಲವಾರು ಬಗೆಗಳಿವೆ. ಎಲ್ಲವೂ ದಿನ ನಿತ್ಯ ಅಭ್ಯಾಸ ಮತ್ತು ಸಾಧನೆಯಿಂದಲೇ ದಕ್ಕಬೇಕಾದದ್ದು. ಇನ್ನು ಕೆಲವೊಂದು ಬಹಳ ಕಷ್ಟದ್ದು -- ಸಾಮಾನ್ಯ ಸಾಧನೆಗೆ ದಕ್ಕದ್ದಲ್ಲ. ಶರೀರವನ್ನು ಸಮತೋಲನದಲ್ಲಿಡಬೇಕಾದದ್ದೂ ಒಂದು ಇದರ ಸರ್ಕಸ್. ಮುಕ್ತಹಸ್ತ, ವೃಶ್ಚಿಕ , ಮುಕ್ತಹಸ್ತ-ಪದ್ಮ-ವೃಶ್ಚಿಕ , ಮುಕ್ತಹಸ್ತ- ದ್ವಿಪಾದ- ವಾಮದೇವ, ಮುಕ್ತಹಸ್ತ- ದೀಪ-ವೃಶ್ಚಿಕ, [ ಇವು ಮೂರು ಆಸನಗಳ ಸಂಯೋಗ ], ತ್ರಿಪುರಾಸನ, ತ್ರಿವಿಕ್ರಮಾಸನ, ನಟರಾಜ ಆಸನ, ಪಕ್ಷಾಸನ, ಗಂಡಬೇರುಂಡ, ಶಕುನ ಹೀಗೆ ಯೋಗದ ಹಲವಾರು ಆಸನಗಳಲ್ಲಿ ಪ್ರಸಿದ್ಧನಾಗಿದ್ದಾನೆ. ಈ ಪ್ರತಿಯೊಂದು ಆಸನಕ್ಕೂ ಅದರದ್ದೇ ಆದ ಅರ್ಥ, ಮನುಷ್ಯನ ಮಾನಸಿಕ ಮತ್ತು ದೈಹಿಕ ಚಿಕಿತ್ಸೆಯ ಉಪಯೋಗ , ಸೂಕ್ಷ್ಮ ತಂತ್ರಗಳು ಇವೆ.

'Yoga Federation of India '  ಸಂಸ್ಥೆಯವರು ತಾರೀಖು 24 -11 -2017 ರಂದು  ದೆಹಲಿಯಲ್ಲಿ ನಡೆಸಿದ  2017 ನೇ ಸಾಲಿನ  ಯೋಗಾಸನಾ ಸ್ಪರ್ಧೆಯಲ್ಲಿ ಎರಡನೇ ಬಾರಿಗೆ ಕರ್ನಾಟಕ ರಾಜ್ಯವನ್ನು ಪ್ರತಿನಿಧಿಸಿರುತ್ತಾನೆ. ಅದರಲ್ಲಿ ವಿಜೇತನಾಗಿ ಅಂತರ ರಾಷ್ಟ್ರದ ಯೋಗಾಸನಾ ಸ್ಪರ್ಧೆಗೆ ಆಯ್ಕೆಯಾಗಿರುತ್ತಾನೆ. ಈ ಅಂತಾರಾಷ್ಟ್ರೀಯ ಯೋಗಾಸನ ಸ್ಪರ್ಧೆಯಲ್ಲೂ ವಿಜೇತನಾಗಿ ಏಸಿಯನ್  ಯೋಗ ಫೆಡರೇಶನ್ ( ASIAN  YOGA  FEDERATION ) ನಡೆಸುವ ಯೋಗಾಸನ ಸ್ಪರ್ಧೆಗೆ ಆಯ್ಕೆಯಾಗಿರುತ್ತಾನೆ. ಇದರಲ್ಲಿ ವಿಜೇತನಾದರೆ  ಎಸಿಯನ್ ಕಪ್ ದೊರೆಯುತ್ತದೆ ಅನ್ನುವುದು ವಿಶೇಷ ಸಂಗತಿ.

S G F I ಸಂಸ್ಥೆಯು  ತಾರೀಖು 11 - 11  - 2017  ರಂದು  ಛತ್ತೀಸಗಡದಲ್ಲಿ ನಡೆಸಿದ  2017  ಸಾಲಿನ  ರಾಷ್ಟ್ರ ಮಟ್ಟದ ಯೋಗಾಸನಾ ಸ್ಪರ್ಧೆಯಲ್ಲಿ ಕರ್ನಾಟಕವನ್ನು ಪ್ರತಿನಿಧಿಸಿರುತ್ತಾನೆ. ಅಲ್ಲದೆ  ಅದರಲ್ಲಿಯೂ ವಿಜೇತನಾಗಿರುತ್ತಾನೆ ಎನ್ನುವುದು ಮತ್ತೊಂದು ಹೆಮ್ಮೆಯ ಸಂಗತಿ.

ಕಳೆದ ಜೂನ್ ತಿಂಗಳಿನಲ್ಲಿ ಯೋಗ ದಿನಾಚರಣೆಯ ಪ್ರಯುಕ್ತ ಕರ್ನಾಟಕ ರಾಜ್ಯದ ಆಯುಶ್ ಇಲಾಖೆಯವರು ಮೈಸೂರಿನಲ್ಲಿ ನಡೆಸಿದ 2017 -- 18 ಸಾಲಿನ ರಾಜ್ಯಮಟ್ಟದ ಯೋಗಾಸನ ಸ್ಪರ್ಧೆಯಲ್ಲಿ ಪ್ರಥಮ ಸ್ಥಾನ ಗಳಿಸಿರುತ್ತಾನೆ.
ಹೊರ ರಾಜ್ಯಗಳಲ್ಲಿ ನಡೆದ ಯೋಗಾಸನ ಸ್ಪರ್ಧೆಯಲ್ಲಿ ಎರಡು ಸಲ ಕರ್ನಾಟಕ ರಾಜ್ಯವನ್ನು ಪ್ರತಿನಿಧಿಸಿದ್ದಾನೆ.

ಕಳೆದ ವರ್ಷ ಅಂತರ ರಾಷ್ಟ್ರ ಯೋಗಾಸನ ಸ್ಪರ್ಧೆಯಲ್ಲಿ ಭಾರತವನ್ನು ಪ್ರತಿನಿಧಿಸುವ ಅವಕಾಶ ಸಿಕ್ಕಿದರೂ 10 ನೆ ತರಗತಿಯ ಅಭ್ಯಾಸದ ಒತ್ತಡ ಇದ್ದ ಕಾರಣ ಆ ಅವಕಾಶವನ್ನು ಉಪಯೋಗಿಸಿಕೊಳ್ಳಲು ಸಾಧ್ಯವಾಗಲಿಲ್ಲ.

ಈ ಎಲ್ಲಾ ಸ್ಪರ್ಧೆಗಳಲ್ಲಿ ಆತ ಭಾಗವಸಿದ್ದುದರ ವಿಶೇಷವೆಂದರೆ ಆ ಸ್ಪರ್ಧೆ ಕೇವಲ 14 ವರುಷದಿಂದ 17 ವರ್ಷದ ಮಕ್ಕಳಿಗೆ ಮಾತ್ರ ಎನ್ನುವುದು. ಈ ಚಿಕ್ಕ ವಯಸ್ಸಿನಲ್ಲಿ ಇಂಥಹ ಸಾಧನೆ ಅವನದು ಎನ್ನುವುದು ಪ್ರಶಂಸನಾರ್ಹ.

ಯೋಗಾಸನದ ಪ್ರತಿಭೆಯನ್ನು ಪರಿಗಣಿಸಿ ಅವನನ್ನು ಅನೇಕ ಕಡೆ ಸನ್ಮಾನಿಸಲಾಗಿದೆ..
ಈ ತನಕ ಚಿನ್ನದ ಪದಕ 16, ಬೆಳ್ಳಿಯ ಪದಕ 6, ಕಂಚಿನ ಪದಕ 2 ಸೇರಿ ಒಟ್ಟು 24 ವಿಶೇಷ ಪದಕಗಳು, ನೂರಾರು ಪ್ರಶಸ್ತಿ ಪತ್ರಗಳನ್ನು ಕುಮಾರ ಚಂದನ್ ಯೋಗಾಸನದ ಹೆಗ್ಗಳಿಕೆಯಲ್ಲಿ ಬಾಚಿಕೊಂಡಿದ್ದಾನೆ. ಪಡೆದ ಸ್ಮರಣಿಕೆಗಳು ನೂರಾರು, ಸನ್ಮಾನ ಪತ್ರಗಳು ಹಲವಾರು. ಇವೆಲ್ಲದರ ಜೊತೆಗೆ 'ಯೋಗ ರತ್ನ' ಎನ್ನುವ ಬಿರುದು ಕೂಡಾ ಅವನ ಸಾಹಸಕ್ಕೆ ಸಂದಿದೆ.

ಇಂದು ಸಾಗರದಲ್ಲಿ ಕನ್ನಡ ರಾಜ್ಯೋತ್ಸವದ ಪ್ರಯುಕ್ತ ಸಾಗರ ಕನ್ನಡ ಸಾಹಿತ್ಯ ಪರಿಷತ್ತಿನವರು ಮತ್ತು ನಮ್ಮ ಊರಿನಲ್ಲಿ ತ್ರಿವೇಣಿ ಮಹಿಳಾ ಮಂಡಳಿಯವರು ಕುಮಾರಿ ಸಂಧ್ಯಾ ಮತ್ತು ಕುಮಾರ ಚಂದನ್ ಅವರನ್ನು ಯೋಗಾಸನ ಪ್ರತಿಭೆಗಳೆಂದು ಗುರುತಿಸಿ ಸನ್ಮಾನಿಸಿದ್ದಾರೆ.


ಯೋಗಾಸನದಲ್ಲಿ ಇಷ್ಟೆಲ್ಲಾ ಹೆಗ್ಗಳಿಕೆಯನ್ನು ಹೊಂದಿದ ಕುಮಾರ ಚಂದನ್ K. R. ನಮ್ಮ ಊರಿನ ಮಗ ಎನ್ನುವುದು ನಮಗೆಲ್ಲರಿಗೂ ಹೆಮ್ಮೆಯ ಸಂಗತಿ.


ತಾರೀಖು : 12 - 05 - 2017.
ಕನ್ನಡ ರಾಜ್ಯೋತ್ಸವದ ದಿನ.






ಯೋಗಾಸನ ಪಟು ಎಂ. ಎಸ. ಸಂಧ್ಯಾ

ನಮ್ಮ ಊರಿನ ಹದಿ ಹರೆಯದ ಚೆಲುವೆ , ಕೀರ್ತಿ ಪತಾಕೆ, ಯೋಗಾಸನ ಪಟು ಎಂ. ಎಸ. ಸಂಧ್ಯಾ. ಶ್ರೀ ಶ್ರೀಧರಮೂರ್ತಿ ಮತ್ತು ಶ್ರೀಮತಿ ಸುಧಾ ಇವರ ಹೆಮ್ಮೆಯ ಪುತ್ರಿ.
ರಾಷ್ಟ್ರಮಟ್ಟದ ಯೋಗಾಸನ ಸ್ಪರ್ಧೆಯಲ್ಲಿ ಕರ್ನಾಟಕ ರಾಜ್ಯವನ್ನು ಪ್ರತಿನಿಧಿಸಿ ಈಗ ಅಂತರ ರಾಷ್ಟ್ರ ಯೋಗ ಸ್ಪರ್ಧೆಗೆ ಆಯ್ಕೆಯಾಗಿದ್ದಾಳೆ.
ಪ್ರಾಥಮಿಕ 9 ನೆ ತರಗತಿಯಲ್ಲಿ ಅಭ್ಯಾಸ ಮಾಡುತ್ತಿರುವ 14 ವರ್ಷದ ಹಸುಳೆ. ನಾಲ್ಕು ವರ್ಷಗಳಿಂದ ಯೋಗಾಭ್ಯಾಸ ಮಾಡುತ್ತಿದ್ದು ಅಭ್ಯಾಸಕ್ಕೂ ಮೀರಿ ವಿವಿಧ ಯೋಗ ಪ್ರಭೇಧಗಳನ್ನು ರಾಜ್ಯದ ಒಳಗೆ ಮತ್ತು ರಾಜ್ಯದ ಹೊರಗೆ ಹಲವಾರು ಕಡೆ ಪ್ರದರ್ಶಿಸಿದ ವಿಶೇಷ ಪ್ರತಿಭೆ. .
ರಾಷ್ಟ್ರ ಮಟ್ಟಕ್ಕೆ ಮತ್ತು ಹೊರ ರಾಜ್ಯ ವಲಯದಲ್ಲಿ ಕರ್ನಾಟಕವನ್ನು ಮೂರು ಸಾರಿ ಪ್ರತಿನಿಧಿಸಿ ಎಲ್ಲಾ ಕಡೆಯಿಂದಲೂ ಬಂಗಾರದ ಪದಕ, ಪ್ರಶಸ್ತಿ ಪತ್ರಗಳನ್ನು ಕರ್ನಾಟಕ ರಾಜ್ಯಕ್ಕೆ, ನಮ್ಮ ಊರಿಗೆ ಬಾಚಿ ತಂದ ಹೆಮ್ಮೆಯ ಬಾಲೆ.
ಯೋಗ ಫೆಡರೇಶನ್ ಆಫ್ ಇಂಡಿಯಾ ಮಟ್ಟದ ಯೋಗ ಸ್ಪರ್ಧೆ ಮತ್ತು ರಾಜ್ಯ ಮಟ್ಟದ ಫೆಡರೇಶನ್ ಯೋಗ ಸ್ಪರ್ಧೆಯಲ್ಲಿ ಉನ್ನತ ಸ್ಥಾನವನ್ನು ಗಳಿಸಿಕೊಂಡಿದ್ದಾಳೆ.
ಕಳೆದ ವರ್ಷ ನವದೆಹಲಿಯಲ್ಲಿ ನಡೆದ ಭಾರತ ರಾಷ್ಟ್ರ ಮಟ್ಟದ S G F T competition ನಲ್ಲಿ ಕರ್ನಾಟಕವನ್ನು ಪ್ರತಿನಿಧಿಸಿ ವೈಯುಕ್ತಿಕ ವಿಭಾಗದಲ್ಲಿ ಕಂಚಿನ ಪದಕ ಪಡೆದ ಏಕೈಕ ವಿದ್ಯಾರ್ಥಿನಿ.
ಪ್ರಸ್ತುತ ಏಶಿಯನ್ ಫೆಡರೇಶನ್ ಕಪ್ ಮತ್ತು ಅಂತರ ರಾಷ್ಟ್ರೀಯ ಮಟ್ಟದ ಯೋಗ ಸ್ಪರ್ಧೆಯಲ್ಲಿ ಭಾರತವನ್ನು ಪ್ರತಿನಿಧಿಸಿ ಭಾಗವಸುತ್ತಿದ್ದಾಳೆ.
ಒಂದು ದಿಕ್ಕಿನಲ್ಲಿ ಯೋಗವನ್ನು ಅಭ್ಯಾಸ ಮಾಡುತ್ತಿರುವ ವಿಧ್ಯಾರ್ಥಿನಿಯಾಗಿದ್ದರೆ ಮತ್ತೊಂದು ದಿಕ್ಕಿನಲ್ಲಿ ಕೆಲವು ಮಕ್ಕಳಿಗೆ ಯೋಗವನ್ನು ಕಲಿಸುತ್ತಿರುವ ಯೋಗ ಗುರುವಾಗಿದ್ದಾಳೆ.
ಸುಮಾರು 65 ಬಂಗಾರದ ಪದಕಗಳು, 2 ಬೆಳ್ಳಿ, 2 ಕಂಚಿನ ಪದಕಗಳು, ನೂರಾರು ಸ್ಮರಣಿಕೆಗಳು ಅವಳ ಮಡಿಲಿಗೆ, ಅಲ್ಲ, ನಮ್ಮ ಊರಿನ ಮಡಿಲಿಗೆ ಅವಳಿಂದಾಗಿ ಸೇರಿವೆ.
ಯೋಗರತ್ನ, ಯೋಗದ ಧ್ರುವತಾರೆ, ಚಿನ್ನದ ಹುಡುಗಿ, ಮಲೆನಾಡು ಯೋಗ ಕುಮಾರಿ, ಯೋಗ ಕುಮಾರಿ, ಎರಡು ಸಾರಿ ಚಾಂಪಿಯನ್ ಆಫ್ ಚಾಂಪಿಯನ್ ಬಿರುದು ಇವು ಆಕೆ ಪಡೆದ ಬಿರುದಾವಳಿಗಳು ಮತ್ತು ಪ್ರಶಸ್ತಿಗಳು.
ಹಲವಾರು ಸನ್ಮಾನಗಳು, ಸನ್ಮಾನ ಪತ್ರಗಳು ಅವಳಿಗೆ ಸಂದಿವೆ. ಇಂದು ಸಂಜೆ ನಮ್ಮ ಊರಿನ ತ್ರಿವೇಣಿ ಮಹಿಳಾಮಂಡಳಿಯವರು ಆಕೆಯನ್ನು ಗ್ರಾಮಸ್ಥರ ಎದುರು ಸನ್ಮಾನಿಸಿ ತಮಗೆ ಗೌರವ ತಂದುಕೊಂಡಿದ್ದಾರೆ. ಈ ಹೆಮ್ಮೆಯ ಪುತ್ರಿ ಎಂ. ಎಸ್. ಸಂಧ್ಯಾ ನಮ್ಮ ಊರಿನ ಮಗಳು ಎನ್ನುವುದಕ್ಕೆ ನಮಗೆ ಹೆಮ್ಮೆಯಾಗುತ್ತದೆ. ಇವಳ ಜೊತೆಗೆ ಅದೇ ಮಟ್ಟದಲ್ಲಿ ಯೋಗ ಪ್ರದರ್ಶನದಲ್ಲಿ ನಮ್ಮ ಊರಿನ ಮತ್ತೊಂದು ಪ್ರತಿಭೆ ಕುಮಾರ ಚಂದನ ಕೆ. ಆರ್.[ 16 ವರ್ಷ ]. ಅದರ ಮಾಹಿತಿಯನ್ನು ಪ್ರತ್ಯೇಕ ತಿಳಿಸಲಾಗುತ್ತದೆ.
( 1- November - 2017 - M Ganapathi Kangod)




Monday, 2 October 2017

%%%%% ಹೆಣದ ಹಿಂದೆ ಜನ ಕ್ಯೂನಲ್ಲಿ ಸಾಗುತಿದ್ದುದು ತಮ್ಮ ಸರದಿಗೋ ?. %%%%%


~~~~~ ಎಂ. ಗಣಪತಿ. ಕಾನುಗೋಡು.
ಮೊನ್ನೆ ನಮ್ಮ ಹತ್ತಿರದ ನಗರದಲ್ಲಿ ಅಂತ್ಯ ಸಂಸ್ಕಾರಕ್ಕಾಗಿ ಒಂದು ಹೆಣವನ್ನು ಹೊತ್ತು ಒಯ್ಯುತ್ತಿದ್ದರು. ಅದರ ಮುಂದೆ ಸತ್ತವನ ಮೊಮ್ಮಗ ಮಡಿಕೆಯಲ್ಲಿ ಅಗ್ನಿಯನ್ನು ಹಿಡಿದು ಸಾಗುತ್ತಿದ್ದ. ಅವನ ಹಿಂದೆ ಅವನು ಸಾಕಿದ ನಾಯಿ ಅವನನ್ನೇ ಹಿಂಬಾಲಿಸುತ್ತಿತ್ತು.
ಸಂಬಂಧಿಕರು ಒಂದು ಗುಂಪಾಗಿ ದುಃಖದಿಂದ ಹೆಣದ ಹಿಂದೆ ನಡೆದು ಹೋಗುತ್ತಿದ್ದರು. ಅವರ ಹಿಂದೆ ಸುಮಾರು ಹತ್ತು ಹದಿನೈದು ಜನ ' ಕ್ಯೂ ' ನಲ್ಲಿ ಖುಷಿಯಿಂದ ನಗುಮುಖದಿಂದಲೇ ಅವರನ್ನು ಹಿಂಬಾಲಿಸುತ್ತಿದ್ದರು.
ಶ್ಮಶಾನವನ್ನು ತಲುಪಬೇಕಿದ್ದರೆ ನಗರದ ಮಧ್ಯೆಯೇ ಸುಮಾರು ದೂರ ಹೆಣ ಸಾಗಬೇಕಾಗಿತ್ತು. ದಾರಿಯಲ್ಲಿ ಓಡಾಡುತ್ತಿದ್ದ ಜನ, ಅಂಗಡಿ ಮುಂಗಟ್ಟಿನಲ್ಲಿ ಇದ್ದ ಜನ, ಅಲ್ಲಲ್ಲಿ ಮನೆಯ ಮುಂದೆ ನಿಂತ ಜನ ಹೀಗೆ ಈ ದೃಶ್ಯವನ್ನು ನೋಡಿದವರಿಗೆ ಇದು ಒಂದು ಥರ ಕುತೂಹಲವೆನ್ನಿಸಿತು. ಏಕೆಂದರೆ ಒಂದಷ್ಟು ಮಂದಿ ದುಃಖದಿಂದ ಹೆಣವನ್ನು ಸುತ್ತುವರಿದುಕೊಂಡು ಗುಂಪಾಗಿ ಹೋಗುತ್ತಿದ್ದಾರೆ. ಇನ್ನು ಕೆಲವರು ಅವರ ಹಿಂದೆ ಸಾಲಾಗಿ ಸಂತೋಷದಿಂದ ಮುನ್ನೆಡೆಯುತ್ತಿದ್ದಾರೆ. ಏನಿದು..... ?, ಏನಿರಬಹುದು ..........?, ತಾವೂ ಸಾವಿನಲ್ಲಿ ಸತ್ತವನನ್ನು ಅನುಸರಿಸಲು ಅಷ್ಟು ಸಂತೋಷದಿಂದ ಸರದಿಯಲ್ಲಿ ಮುಂದೆ ನುಗ್ಗುತ್ತಿದ್ದಾರಾ ? ಎಂದು ಹಲವು ಬಗೆಯಲ್ಲಿ ಯೋಚಿಸ ಹತ್ತಿದರು.
ಇದಿಷ್ಟಕ್ಕೂ ನಡುನಡುವೆ ಆಗಾಗ ಒಬ್ಬೊಬ್ಬರಾಗಿಯೇ ಹೊರಗಿನಿಂದ ಬಂದು ' ಇವರು ಸತ್ತದ್ದು ಹೇಗೆ ? ಎಂದು ಗುಟ್ಟಾಗಿ ಅಗ್ನಿಯನ್ನು ಹಿಡಿದುಕೊಂಡ ಮೊಮ್ಮಗನ ಕಿವಿಯಲ್ಲಿ ಪ್ರಶ್ನೆ ಮಾಡುತ್ತಿದ್ದರು. ಅದಕ್ಕೆ ಅವನು ಏನನ್ನೋ ಗುಟ್ಟಾಗಿಯೇ ಉತ್ತರವನ್ನು ಕೊಡುತ್ತಿದ್ದ. ಹಾಗೆಯೇ ತಕ್ಷಣ ಆ ವ್ಯಕ್ತಿ ಹಿಂದಿನ ' ಕ್ಯೂ ' ನಲ್ಲಿ ಸೇರಿಕೊಳ್ಳುತ್ತಿದ್ದ. ಆ ' ಕ್ಯೂ' ಉದ್ದ ಬೆಳೆದದ್ದು ಹೀಗೆಯೇ.
ನಾನು ಹೇಗೋ ಆ ಸಂದರ್ಭಕ್ಕೆ ಅಲ್ಲಿಗೆ ಹೋಗಿದ್ದೆ. ನನಗೂ ಈ ದೃಶ್ಯವನ್ನು ನೋಡಿ ಕುತೂಹಲ ಕೆರಳಿತು. ಆ ಮೊಮ್ಮಗನ ಕಿವಿಯಲ್ಲಿ ಅವರೇನು ಕೇಳುತ್ತಿದ್ದಾರೆ, ಅದಕ್ಕೆ ಅವನೇನು ಉತ್ತರವನ್ನು ಕೊಡುತ್ತಿದ್ದಾನೆ, ಹಾಗೆ ಕೇಳಿಸಿಕೊಂಡವರು ತಕ್ಷಣ ' ಕ್ಯೂ ' ನಲ್ಲಿ ಏಕೆ ಸೇರಿಕೊಳ್ಳುತ್ತಿದ್ದಾರೆ ಎನ್ನುವ ಪ್ರಶ್ನೆ ನನ್ನನ್ನು ಇನ್ನಷ್ಟು ಕುತೂಹಲಕ್ಕೀಡು ಮಾಡಿತು.
ಅಷ್ಟೊತ್ತಿಗೆ ಮತ್ತೊಬ್ಬ ಬಂದು ಆ ಮೊಮ್ಮಗನ ಕಿವಿ ಕಚ್ಚಲು ಶುರುಮಾಡಿದ. ವಿಷಯ ತಿಳಿದುಕೊಳ್ಳಲು ಈ ಸಮಯಕ್ಕೆ ಮೊಮ್ಮಗನ ಪಕ್ಕಕ್ಕೆ ಸೇರಿಕೊಂಡಿದ್ದ ನಾನು ಅವರಿಬ್ಬ ಗುಟ್ಟಿನ ಸಂಭಾಷಣೆಗೆ ಕಿವಿಯನ್ನು ಕೊಟ್ಟೆ. ಅದನ್ನು ಕೇಳಿ ನನಗೆ ತಲೆಯೇ ಕೆಟ್ಟು ಹೋಯಿತು. ಏಕೆ ?.
ಅವನ ಪ್ರಶ್ನೆ ಮತ್ತು ಮೊಮ್ಮಗನ ಉತ್ತರ ಹೀಗಿತ್ತು.
" ಇವರು ಸತ್ತದ್ದು ಹೇಗೆ ? ".
" ಮೊನ್ನೆ ನಾನು ಸಾಕಿದ ಈ ನಾಯಿ ನನ್ನ ಅಜ್ಜನನ್ನು ಕಚ್ಚಿತು. ಅದು ಕಚ್ಚಿ ಎರಡೇ ದಿನಗಳಲ್ಲಿ ನನ್ನ ಅಜ್ಜ ಸತ್ತು ಹೋದ ".
" ಹಾಗಾದರೆ ನಿನ್ನ ನಾಯಿಯನ್ನು ನನಗೆ ಒಂದು ವಾರದ ಮಟ್ಟಿಗೆ ಬಾಡಿಗೆಗೆ ಕೊಡು. ಅದಕ್ಕೆ ಬಾಡಿಗೆಯಾಗಿ ಒಂದು ಲಕ್ಷ ರುಪಾಯಿ ಕೊಡುತ್ತೇನೆ ".
ಅದಕ್ಕೆ ಉತ್ತರ ಪಡೆದವನು ತನ್ನ ಮೊದಲಿನವರಂತೆ ತಕ್ಷಣ ' ಕ್ಯೂ ' ನಲ್ಲಿ ಹೋಗಿ ನಿಂತದ್ದೂ ಆಯಿತು.
ಹಾಗಾದರೆ ಮೊಮ್ಮಗ ಹೇಳಿದ್ದೇನು ?.
" ಅದಕ್ಕಿಂತಲೂ ಹೆಚ್ಚು ಕೊಡುತ್ತೇನೆ ಎಂದು ಕೇಳಿದವರು ನಿಮಗಿಂತ ಮುಂಚೆ ' ಕ್ಯೂ ' ನಲ್ಲಿ ಇದ್ದಾರೆ. ಆದ್ದರಿಂದ ನಿಮಗೇ ತಕ್ಷಣವೇ ಕೊಡಲು ಸಾಧ್ಯವಿಲ್ಲ. ಬೇಕೇಬೇಕೆಂದಿದ್ದರೆ ಅದಕ್ಕಿಂತ ಹೆಚ್ಚು ಕೊಡಬೇಕು, ' ಕ್ಯೂ ' ನಲ್ಲಿ ಕಾಯಿರಿ. ".
ತಾರೀಖು : 23 - 9 - 2015 .
ವಿಷಯದ ಕೃಪೆ : ಸುಧಾ ವಾರಪತ್ರಿಕೆ.

#### ರಾಮಾಯಣದಲ್ಲಿ ಹನುಮಂತನನ್ನು ಸೃಷ್ಟಿಸಿದವರು ಯಾರು ?. ಹನುಮಂತ ರಾಮನ ಬಂಟನಾದದ್ದು ಹೇಗೆ ? ####


ಮೇರು ಪರ್ವತದಲ್ಲಿ ಕೇಸರಿ ಎನ್ನುವ ವಾನರ ರಾಜ ಮತ್ತು ಆತನ ಹೆಂಡತಿ ಅಂಜನೆಗೆ ಮಗನಾಗಿ ಹುಟ್ಟಿದವ ಹನುಮಂತ. ಮಕ್ಕಳಾಗದಿದ್ದಾಗ ಅವರು ತಮ್ಮ ಕುಲದೇವರಾದ ವಾಯುದೇವರನ್ನು ಕುರಿತು ಪ್ರಾರ್ಥಿಸಿ ವಾಯುವಿನ ಅನುಗ್ರಹದಿಂದ ಹನುಮಂತನನ್ನು ಪಡೆದರು. ಕೇಸರಿಯ ಮಗನಾದ್ದರಿಂದ ಕೆಸರಿನಂದನ, ಅಂಜನೆಯ ಮಗನಾದ್ದರಿಂದ ಆಂಜನೇಯ, ವಾಯುವಿಗೆ ಮರುತ್ ಎನ್ನುವ ಹೆಸರಿರುವುದರಿಂದ ಮಾರುತಿ ಎನ್ನುವ ಹೆಸರುಗಳು ಬಂತು.
ಹನುಮಂತ ಬಂಟನಾಗಿಲ್ಲ. ಆತ ರಾಜನ -- ವಾನರ ರಾಜನ -- ಮಗ. ಹನುಮಂತ ಸುಗ್ರೀವನ ಮಂತ್ರಿಯೂ ಹೌದು. ಆದ್ದರಿಂದ ಆತ ಬಂಟನಲ್ಲ. ರಾಮನು ಯಾರೆಂದು ಪರೀಕ್ಷಿಸಲು, ತಿಳಿದುಕೊಳ್ಳಲು ಸುಗ್ರೀವನ ಆದೇಶದ ಮೇರೆಗೆ ಹನುಮಂತ ರಾಮನ ಹತ್ತಿರ ಬಂದಿದ್ದ. ವಟುವಿನ ವೇಷ ಧರಿಸಿ ರಾಮನ ಬಳಿ ಹೋದಾಗ ರಾಮನ ತೇಜಸ್ಸು, ಮಾತು, ಗಾಂಭೀರ್ಯ ಎಲ್ಲವನ್ನು ನೋಡಿ ಹನುಮಂತ ಮರುಳಾಗಿಬಿಟ್ಟ. ಹೀಗಾಗಿ ರಾಮನ ಬಾಲಿ ಇರಲು ಇಚ್ಛಿಸಿದರಾಮನೇ ಹೇಳುತ್ತಾನೆ ' ಹನುಮಂತ ತನ್ನ ಮಿತ್ರ, ಆತ ಮಾಡಿದ ಸಹಾಯವನ್ನು ತೀರಿಸಲಿಕ್ಕಾಗುವುದಿಲ್ಲ, ನಾನು ಅವನಿಗೆ ಋಣಿ ' ಎಂದಿದ್ದಾನೆ. ಆದರೆ ಹನುಮಂತನೇ ತಾನು ರಾಮನ ದಾಸ ಎಂದುಕೊಳ್ಳುತ್ತಾನೆ. ಆದ್ದರಿಂದ ಹನುಮಂತ ಬಂಟನಲ್ಲ. ಸ್ವಇಚ್ಹೆಯಿಂದ ರಾಮನ ಆಪ್ತ ತಾನು ಎಂದು ಹೇಳಿಕೊಳ್ಳುತ್ತಾನೆ.
~~~~ ಸತ್ಯದರ್ಶನ ಖ್ಯಾತಿಯ ಡಾ.ಪಾವಗಡ ಪ್ರಕಾಶರಾವ್ [ ಸತ್ಯಪ್ರಕಾಶ -- 2 ].

-ಎಂ ಗಣಪತಿ , ಕಾನುಗೋಡು 

ಹೀಗೆ ಸುಮ್ಮನೆ,

ಈಗ ಬೀಳುತ್ತಿರುವುದು 'ಹಸ್ತೆ' ಮಳೆ. [ 27 - 9 - 2017 ರಿಂದ 10 - 10 - 2017 ] ಇದು ಹನಿಯಿಕ್ಕಬೇಕು.ದುಮ್ಮೆದ್ದು ಹೊಯ್ಯಬಾರದು ಎಂದು ಎಂದಿನ ಅಭಿಪ್ರಾಯ. ' ಹಸ್ತೆ ಹನುಕಿ ಚಿತ್ತೆ ಬರಸಿ ಸತಿ ದುಮ್ಮೆದ್ದು ಹೊಯ್ದಾಗ ಸಮೃದ್ಧಿಯಾಗುವುದು ' ಎಂದು ಬಲ್ಲವರ ಮಾತು. ಆಗ ಬೆಳೆ,ಫಸಲು ಚೆನ್ನಾಗಿ ಆಗುತ್ತದೆ. ಕಾಳು ಚೆನ್ನಾಗಿ ತುಂಬುತ್ತದೆ. ವಜನ ಬರುತ್ತದೆ. ಅಡಕೆಯೂ ಫಸಲು ತುಂಬಿಬರುತ್ತದೆ ಎನ್ನುತ್ತಾರೆ. ಫಸಲು ಗುತ್ತಿಗೆ ಹಿಡಿಯುವವರು ಇದನ್ನೆಲ್ಲಾ ಲೆಕ್ಕಾಚಾರ ಹಾಕಿಕೊಂಡಿರುತ್ತಾರೆ. ಈಗ ಭತ್ತದ ಬೆಳೆ ಕೋಲು ಹೊಡೆಯಾಗಿರುತ್ತದೆ. ಅಂದರೆ ಅದು ತೆನೆಯಾಗಿ ಇನ್ನೂ ಅದರ ಎಲೆಗಳ ಸುತ್ತ ಮುಚ್ಚಿಕೊಂಡಿರುತ್ತದೆ. ಮೇಲ್ಭಾಗ ತೆರೆದುಕೊಂಡಿರುತ್ತದೆ. ಜೋರು ಮಳೆಯಾದರೆ ಅದರೊಳಗೆ ನೀರು ಮೀರಿ ಹೊಕ್ಕು ಭತ್ತ ಜೋಳ್ಳಾಗುತ್ತದೆ. ಹಸ್ತೆ ಮಳೆ ಅದಕ್ಕೆ ಆತಂಕ ಮಾಡದೆ ಬೆಳೆಯ ಸಮೃದ್ಧಿಗೆ ಪೂರಕವಾಗುತ್ತದೆ. ಚಿತ್ತೆ ಮಳೆ [೧೧-೧೦-೨೦೧೭ ರಿಂದ ೨೩-೧೦-೨೦೧೭ ] ಬರಸಬೇಕು.ಅದು ಬಂದರೆ ಬೆಳೆಗಳಿಗೆ ಹುಳು ಬೀಳುತ್ತದೆ. ಆ ಹುಳುವನ್ನು ನಿವಾರಿಸಲು ವಿಶಾಖೆ ಮಳೆ ಬೀಳಬೇಕು [೭-೧೧-೨೦೧೭ ರಿಂದ ೧೮-೧೧-೨೦೧೭] 'ಸ್ವಾತಿ ' ಮಳೆ [೨೪-೧೦-೨೦೧೭ ರಿಂದ ೬-೧೧-೨೦೧೭ ] ಚೆನ್ನಾಗಿ ಬರಬೇಕು. ಸ್ವಾತಿ ಮಳೆಯ ನೀರಿನಿಂದ ಹಾಲನ್ನು ಹೆಪ್ಪಿಡುತ್ತಾರೆ. ಅದು ಮರುದಿನ ಮೊಸರಾಗುತ್ತದೆ. ಒಂದು ಲೀಟರು ಹಾಲಿಗೆ ಸುಮಾರು ಐವತ್ತು ಮಿ. ಲೀ. ಸ್ವಾತಿ ನೀರು ಬೇಕಾಗಬಹುದು. ಹಳೆ ಮಜ್ಜಿಗೆಯನ್ನು ತೆಗೆದು ಹೊಸ ಮೊಸರನ್ನು ಮಾಡುವ ಈ ಕ್ರಮ ಬಹಳ ಹಿಂದಿನಿಂದ ಬಂದ ಸಂಪ್ರದಾಯ. ~~~~ ಎಂ.ಗಣಪತಿ ಕಾನುಗೋಡು.

ದಿವಂಗತ ಶಿರೂರು ವೆಂಕಮ್ಮ.

ದಿವಂಗತ ಶಿರೂರು ವೆಂಕಮ್ಮ. ನನ್ನ ತಾಯಿಯ ಚಿಕ್ಕಮ್ಮ. ನನ್ನ ಪ್ರೀತಿಯ ಅಜ್ಜಿ. ಚಿಕ್ಕ ವಯಸ್ಸಿನಲ್ಲಿ ಗಂಡ ಮತ್ತು ಏಕ ಮಾತ್ರ ಮಗನನ್ನು ಕಳೆದುಕೊಂಡವಳು. ಅತಿ ಬಡತನ, ಶಿಥಿಲವಾದ ಸಣ್ಣ ಮನೆ. ಕಷ್ಟದ ಸ್ಥಿತಿಯಲ್ಲಿ ಚಿಕ್ಕವಯಸ್ಸಿನ ವಿಧವಾ ಸೊಸೆ ಮತ್ತು ಆರು ಮಂದಿ ಚಿಕ್ಕ ಮೊಮ್ಮಕ್ಕಳನ್ನು ಬೆಳಸಿ ಮುನ್ನಡೆಸಿದವಳು. ತನ್ನ ಮನೆಯವರನ್ನಲ್ಲದೆ ನಮ್ಮೆಲ್ಲರನ್ನೂ ಬಹಳವಾಗಿ ಪ್ರೀತಿಸಿದವಳು. ಅಕ್ಕಿಯ ಡಬ್ಬ ಖಾಲಿಯಾದರೂ ಅವಳ ಮನೆಗೆ ನೆಂಟರು ಖಾಲಿಯಾಗುತ್ತಿರಲಿಲ್ಲ. ಅದಕ್ಕೆ ಕಾರಣ ಅವಳು ಜನರಿಗೆ ತೋರಿಸುತ್ತಿದ್ದ ಪ್ರೀತಿ, ವಾತ್ಸಲ್ಯ. ನೆಂಟರಿಗೆ ಅನ್ನ ಮಾಡಿ ಬಡಿಸಿ ತಾನು ಮತ್ತು ಮನೆಯವರು ಗುಟ್ಟಾಗಿ ಗಂಜಿ ಸುರಿದದ್ದು ಹಲವು ಬಾರಿ. ಅನೇಕ ಕಾಹಿಲೆಗಳಿಗೆ ಹಳ್ಳಿ ಔಷಧವನ್ನೂ ಕೊಡುತ್ತಿದ್ದಳು. ಆಕೆ ನಮ್ಮನ್ನು ಬಿಟ್ಟು ಹೋಗಿ 35 ವರುಷಗಳಾದುವು. ಈಗ ಅವಳ ಆರೂ ಮೊಮ್ಮಕ್ಕಳು -- ಗಂಡು ಮಕ್ಕಳು, ಹೆಣ್ಣು ಮಕ್ಕಳು ಸುಖವಾಗಿದ್ದಾರೆ. ಅದಕ್ಕೆ ಅವಳ ಪಾಲನಾ ತಪಸ್ಸು ಕಾರಣ. ನಮ್ಮೆಲ್ಲರ ಸಿರಿ ಸೊಬಗನ್ನು ನೋಡಲು ಅವಳಿಲ್ಲ ಎನ್ನುವುದೇ ನಮ್ಮೆಲ್ಲರ ಕೊರತೆ. ಅವಳಿಗೆ ಸಾಷ್ಟಾಂಗ ನಮಸ್ಕಾರ. ಫೋಟೋ ಕೃಪೆ : ಶ್ರೀ H.N.ಶ್ರೀಧರ ಹೆಗಡೆ ಮಂಕಳಲೆ
Image may contain: 1 person, close-up

#### ಭಾನು -- ಭೂಮಿ ####


ಎಲ್ಲಿಯ ಭಾನು ಎಲ್ಲಿಯ ಭೂಮಿ
ದಿಗಿಲು ತಂದಿದೆ ದಿಗಂತದ ಬೆಳಕು.
ಸಮುದ್ರವಸನೆಯತ್ತ ರವಿ ಕಿರಣ 
ರಜನಿಗದೋ ಚಿನ್ನದ ತಿಲಕ
ದಿನಕರನ ನೇರ ನೋಟದ ಭಾಸ.
ನೀರಿನುದ್ದಕೂ ಮಿನುಗುವ ಸೆರಗು
ಪರಿ ಸಾರುತಿದೆ ದಾರಿ ದೀಪದಂತೆ.
ತಂಪಿನ ಜಲಕೆ ಬೆಳ್ಳಿಯ ಪ್ರಭಾವಳಿ.
.............................................
ಚಿತ್ತಾರ ಸಾರುತಿದೆ ನೀತಿಯೊಂದ.
ನೀರ ತಟದಲಿನ ಮರವಿಂಗಿಸಿ ದಾಹವ
ಸೊಂಪಿನ ಸಕಲ ಸಮೃದ್ಧಿಯ ನಡುವೆ.
ಬತ್ತಿ ಕಾಷ್ಟವಾದುದು ಫಲ ಬಿಡದೆ ಬರೆ.
ಏಕೋ ಒಣಗಿ ಬರಡಾದುದು ಸೊರಗಿ.
ವಿಧಿ ಬಿಡಲಿಲ್ಲ ಅದು ಪಡೆದ ಪಾಡು.
~~~~~~~~~~~~~~~~~~~~~
ಎಂ ಗಣಪತಿ ಕಾನುಗೋಡು

Photography by : Sharada Hegde
Image may contain: twilight, sky, outdoor and nature

#### ದಡ್ಡನಿಗೆ ಒಂದು ಕಡೆ. ಬುದ್ಧಿವಂತನಿಗೆ ಮೂರು ಕಡೆ. ####


ಹಳ್ಳಿಯ ಊರಿನ ಒಂದು ಕಾಲು ದಾರಿಯಲ್ಲಿ ರಾತ್ರಿ ಒಬ್ಬ ದಡ್ಡ ನಡೆದುಕೊಂಡು ಹೋಗುತ್ತಿದ್ದ. ಅವನ ಕಾಲಿಗೆ ಏನೂ ಮೆತ್ತನ ವಸ್ತು ತಾಗಿದಂತಾಯಿತು. ಅದು ಏನೋ , ಯಂತದೋ ಎಂದು ರಸ್ತೆಗೆ ಅಂಗಾಲಿನಿಂದ ವರೆಸಿ ಮುಂದೆ ಹೊರಟು ಹೋದ. ಸ್ವಲ್ಪ ಹೊತ್ತು ತಡೆದು ಅದೇ ದಾರಿಯಲ್ಲಿ ಬುದ್ಧಿವಂತನೊಬ್ಬ ನಡೆದು ಬಂದ. ಅವನ ಕಾಲಿಗೂ ಅದು ಸ್ವಲ್ಪ ತಾಗಿತು. ಅರರೆ ಇದು ಏನಿರಬಹುದೆಂದು ಅಂಗಾಲಿನಲ್ಲಿಯೇ ಆಚೀಚೆ ನೆಲಕ್ಕೆ ತೀಡಿ ನೋಡಿದ. ಅಂಗಾಲಿಗೆಲ್ಲಾ ತಣ್ಣಗೆ ಆಯಿತೇ ವಿನಃ ಅದು ಏನೆಂದು ತಿಳಿಯಲಿಲ್ಲ. ಆಗ ಕೈಗೆ ಒರೆಸಿಕೊಂಡು ಬೆರಳುಗಳಿಂದ ತಿಕ್ಕಿ ನೋಡಿದ. ಆಗಲೂ ಹೊಳೆಯಲಿಲ್ಲ. ಆಗ ನೋಡಿಯೇ ಬಿಡೋಣವೆಂದು ಮೂಸಿ ನೋಡಿದ. ಅದು ಮೂಗಿಗೂ ಸಾಕಷ್ಟು ತಾಗಿತು. ಕೊನೆಗೆ ನೋಡಿದರೆ ಥೂ, ಪೂ, ಅದು ಪಾಯಖಾನೆ, ಯಾರೋ ನಡುದಾರಿಯಲ್ಲಿ ರಸ್ತೆಯಲ್ಲಿ ಹೇತು ಹೋಗಿದ್ದರು.
ನೀತಿ : ಹೆಚ್ಚು ವಿಚಾರಿಸದೆ ಮುಂದೆ ನಡೆದ ದಡ್ಡನಿಗೆ ಒಂದೇ ಕಡೆ ಸ್ವಲ್ಪ ಹೊಲಸಾಯಿತು. ಬಹಳ ವಿಚಾರ ಮಾಡಲು ಹೊರಟ ಬುದ್ಧಿವಂತನಿಗೆ -- ಕಾಲು, ಕೈ ಮತ್ತು ಮೂಗು -- ಹೀಗೆ ಮೂರು ಕಡೆ ಬಹಳ ಹೊಲಸಾಯಿತು.

31/Augus/2017

Monday, 14 August 2017

## ಆಗಸ್ಟ್ ಹದಿನೈದರ ಸ್ವಾತಂತ್ರ್ಯ ಏನು, ಎತ್ತ ? ##


                                                                                        ~~~~~ ಎಂ. ಗಣಪತಿ. ಕಾನುಗೋಡು.


ಆಗಸ್ಟ್ ಹದಿನೈದರ ಸ್ವಾತಂತ್ರ್ಯ ಕೇವಲ ರಾಜಕೀಯ ಸ್ವಾತಂತ್ರ್ಯವಷ್ಟೆ. ಪರಕೀಯರ ಆಡಳಿತದಿಂದ ಮುಕ್ತವಾಗಿ ಸ್ವದೇಶಿಯರ ಆಡಳಿತಕ್ಕೆ ನಾಂದಿ ಹಾಡಿದ ಒಂದು ಮಹತ್ಕಾರ್ಯ. ಈ ರಾಜಕೀಯ ಸ್ವಾತಂತ್ರ್ಯವನ್ನು ಸಾಕಾರಗೊಳಿಸಲು ಭಾರತೀಯರ ಬದುಕಿನ ಎಲ್ಲ ಮಜಲುಗಳು ಆಯಾ ಕ್ಷೇತ್ರದಲ್ಲಿ ಸ್ವಾತಂತ್ರ್ಯವನ್ನು ಗಳಿಸಿಕೊಳ್ಳಬೇಕು. ನಮಗೆ ರಾಜಕೀಯ ಸ್ವಾತಂತ್ರ್ಯ ಬಂದು 60 ವರುಷಗಳಲ್ಲಿ ಅವು ಇನ್ನೂ ಸಾಧನೆಯಾಗಿಲ್ಲ.

ನಮ್ಮ ದೇಶದಲ್ಲಿ ರಾಜಕೀಯ ಸ್ವಾತಂತ್ರ ಬಂದು ಮೂರು ವರುಷಗಳಲ್ಲಿ ಅಂದರೆ 1950 ರಲ್ಲಿ ಪ್ರಜಾಪ್ರಭುತ್ವ ಸ್ಥಾಪನೆ ಆಯಿತು. ವ್ಯಕ್ತಿಯೊಬ್ಬ ಪ್ರಭುವಾಗಬೇಕಿದ್ದರೆ, ವ್ಯಕ್ತಿಗಳ ಸಮೂಹ ಪ್ರಭುತ್ವವನ್ನು ಸಾಧಿಸಬೇಕೆಂದಿದ್ದರೆ ಅಲ್ಲಿ ಒಳಗೊಳ್ಳುವ ಪ್ರತಿಯೊಬ್ಬ ವ್ಯಕ್ತಿಯು ಮತ್ತು ವ್ಯಕ್ತಿಗಳ ಸಮೂಹವು ತನ್ನ ಬದುಕಿನ ಎಲ್ಲ ಆಯಾಮಗಳಲ್ಲಿ ಸ್ವಾಯತ್ತತೆ ಮತ್ತು ಪೂರ್ಣತೆ -- ಒಮ್ಮೆ ಪರಿಪೂರ್ಣತೆ ಆಗದಿದ್ದರೂ ಕೂಡಾ -- ಯನ್ನು ಹೊಂದಬೇಕು. ಆಗ ಮಾತ್ರ ಅವರಿಗೆ ಸ್ವಾತಂತ್ರವನ್ನು ಅನುಭವಿಸುವ ಯೋಗ್ಯತೆ ಬರುತ್ತದೆ. ಆರ್ಥಿಕ ಸ್ವಾಯತ್ತತೆಯನ್ನು ಹೊಂದದ ಮತದಾರ ಇಂದು ಚುನಾವಣೆಯಲ್ಲಿ ಒಂದು ನೂರು ರುಪಾಯಿಗೂ ಚುನಾವಣೆಗೆ ಸ್ಪರ್ಧಿಸಿದವನ ಎದುರು ಕೈ ಚಾಚುತ್ತಿದ್ದಾನೆ. ಆಗ ಯೋಗ್ಯತೆ ಇದ್ದವನನ್ನು ಚುನಾಯಿಸುವ ಸಂದರ್ಭವೆಲ್ಲಿ ಬಂತು ?. ಇದು ಒಂದು ಉದಾಹರಣೆ ಅಷ್ಟೆ. ಹೀಗೆ ಸ್ವತಂತ್ರ ಭಾರತದ ಪ್ರಜಾಪ್ರಭುಗಳೆನ್ನಿಸಿಕೊಂಡವರ ಬದುಕಿನ ಪ್ರತಿಯೊಂದು ಆಯಾಮದ ಗತಿಯೂ ಇಷ್ಟೇ. ನಾವು ಎಲ್ಲಿಯವರೆಗೆ ಯೋಗ್ಯತೆಯನ್ನು ಗಳಿಸಿಕೊಳ್ಳುವುದಿಲ್ಲವೋ ಅಲ್ಲಿಯವರೆಗೆ ದಾಷ್ಟ್ಯರ ದಾಸರಾಗಿಯೇ ಉಳಿಯಬೇಕು. ಅಂದು ಪರಕೀಯರ ದಾಸರಾಗಿ. ಇಂದು ಸ್ವದೇಶಿಯರ ದಾಸರಾಗಿ. ಅಷ್ಟೆ.

ತಾರೀಖು 14 - 8 - 2017

Sunday, 6 November 2016

ಹಬ್ಬಗಳು ಏಕೆ ?. ಹೇಗೆ ?.


~~~~~ ಎಂ. ಗಣಪತಿ. ಕಾನುಗೋಡು.
ನಮ್ಮ ಸಂಪ್ರದಾಯಗಳಲ್ಲಿ ಹಬ್ಬಗಳ ಆಚರಣೆ ತೀರಾ ಅಗತ್ಯವಾದದ್ದು ಎನ್ನಿಸಿಕೊಂಡಿದೆ. ಅವುಗಳ ಪೌರಾಣಿಕ ಹಿನ್ನಲೆ ಏನೂ ಇರಲಿ. ಅವುಗಳ ಸಾಮಾಜಿಕ ಕಳಕಳಿ ಬಹಳ ತುಂಬಾ ಮಹತ್ವದ್ದು. ನಮ್ಮ ಜೀವನದ ಜಂಜಾಟದಲ್ಲಿ ಯಾವಾಗಲೂ ಪುರುಸೊತ್ತು ಎನ್ನುವುದೇ ಇರುವುದಿಲ್ಲ. ಯಾವುದಕ್ಕೂ ಹಣಕಾಸಿನ ಅಡಚಣೆ ಬಿಟ್ಟಿದ್ದೇ ಇಲ್ಲ. ಊರು ಕೇರಿಯವರು, ಹತ್ತಿರದ ನೆಂಟರಿಷ್ಟರು ಒಂದು ದಿನ ಒಂದೆಡೆ ಸೇರಿಕೊಳ್ಳಲು ಮಾನಸಿಕ ಉದ್ದೇಶ ಮತ್ತು ವೈಯುಕ್ತಿಕ ಅನುಕೂಲತೆಗಳು ಯಾರಿಗೂ ಇರುವುದಿಲ್ಲ. ಬದುಕಿನಲ್ಲಿ ಕೆಲವು ಕಜ್ಜಾಯಗಳನ್ನು ಮಾಡಲೂ ನಮಗೆ ಉದ್ದೇಶವಾಗುವುದಿಲ್ಲ. ಇದಕ್ಕೆ ಕೆಲವರಿಗೆ ಅನುಕೂಲತೆಯೂ ಇರುವುದಿಲ್ಲ.
ಮನುಷ್ಯನ ಈ ಎಲ್ಲಾ ಅಡಚಣೆಗಳನ್ನು ನಿವಾರಿಸಲಿಕ್ಕಾಗಿಯೇ ಹಬ್ಬಗಳು ಸಂಭ್ರಮಗಳಿಂದ ನಮ್ಮಲ್ಲಿ ಆಚರಿಸಲ್ಪಡುತ್ತವೆ. ವರುಷದಲ್ಲಿ ಇಂತಿಂಥ ಹಬ್ಬಗಳನ್ನು ಆಚರಿಸಲು ಇಂತಿಂಥಹುದೇ ಮಿತಿ [ ದಿನ ] ಎಂದು ಸಾಮಾಜಿಕವಾಗಿ ಮತ್ತು ಶಾಸ್ತ್ರೀಯವಾಗಿ ನಿಗದಿ ಮಾಡಿದ್ದರಿಂದ ಆ ದಿನದಂದು ನಮ್ಮ ಎಷ್ಟೇ ತೊಂದರೆ, ಅಡಚಣೆಗಳಿದ್ದರೂ ನಾವು ಬಿಡುವು ಮಾಡಿಕೊಳ್ಳುತ್ತೇವೆ. ಅದರ ವೆಚ್ಚಕ್ಕೆ ಹಣವನ್ನು ಹೊಂದಿಸಿಕೊಳ್ಳುತ್ತೇವೆ. ಸಾಲ ಮಾಡಿಯಾದರೂ ಹೊಂದಿಸಿಕೊಳ್ಳುತ್ತೇವೆ. ನಮ್ಮಲ್ಲಿ ಹೆಚ್ಚಿನ ಹಬ್ಬಗಳಿಗೆ ಇಂಥಹುದೇ ಕಜ್ಜಾಯ ಆಗಬೇಕೆಂದು ನಿಯಮ ಇದೆ. ಬೂರೆ ಹಬ್ಬಕ್ಕೆ, ಭೂಮಿ ಹುಣ್ಣಿಮೆ ಹಬ್ಬಕ್ಕೆ ಕೊಟ್ಟೆಕಡುಬು , ದೀಪಾವಳಿಗೆ ಹೋಳಿಗೆ , ಗಣೇಶ ಚತುರ್ತಿಗೆ ಕರಿಕಡುಬು, ಪಂಚಕಜ್ಜಾಯ, ಹೀಗೆ ಹೀಗೆ. ಆಯಾ ಹಬ್ಬದಂದು ಎಷ್ಟೇ ತೊಂದರೆ, ಯಾವುದೇ ತೊಂದರೆ ಇದ್ದರೂ ಅಂಥಹ ಕಜ್ಜಾಯ, ಅಪ್ಪಚ್ಚಿಯನ್ನು ಮಾಡಿಯೇ ಮುಗಿಸುತ್ತೇವೆ. ಆ ದಿನ ನೆರೆಹೊರೆಯವರೊಂದಿಗೆ ಸಂತೋಷ , ವಿನೋದಗಳಿಂದ ಕೂಡಿ ಆಡಿಕೊಂಡಿರುತ್ತೇವೆ. ನಮ್ಮ ಅಕ್ಕ ತಂಗಿಯರು ಹೆಣ್ಣುಮಕ್ಕಳನ್ನು ಅವರ ಬಳಗವನ್ನು, ಅಂದಿನ ಹಬ್ಬದ ಆಚರಣೆಯಲ್ಲಿ ಆತಂಕವಿದ್ದ ನಮ್ಮ ಪ್ರೇಮಿಕರನ್ನು ನಮ್ಮಲ್ಲಿಗೆ ಆಮಂತ್ರಿಸಿರುತ್ತೇವೆ.
ನಮ್ಮಲ್ಲಿ ಹಬ್ಬಗಳು ಎನ್ನುವ ಪರಿಕಲ್ಪನೆ ಇಲ್ಲದೆ ಇದ್ದಿದ್ದರೆ ನಮ್ಮ ಒತ್ತಡದ ಮತ್ತು ಹರಕತ್ತಿನ ಜೀವನದಲ್ಲಿ ಇಂತಹ ಸಂಭ್ರಮಗಳು ಸಾಧ್ಯವಾಗುತ್ತಿರಲಿಲ್ಲ. ಅದರ ಪಾರಮಾರ್ಥಿಕ ಇಂಗಿತಗಳು ಏನೇ ಇದ್ದರೂ ಅವುಗಳಿಂದ ಪರಮ ಸಂತೋಷದ ಇಂಬು ದೊರಕುವುದು ಸುಳ್ಳಲ್ಲ.

ತಾರೀಖು : 30 - 10 - 2016.

ತುಂಬುವ ಗಂಗೆ, ತರುವ ಬಲೀಂದ್ರ , ಹಚ್ಚುವ ದೀಪಗಳು ...... ಏಕೆ ?

~~~~~~ ಎಂ. ಗಣಪತಿ. ಕಾನುಗೋಡು.


ಬಲಿ ಒಬ್ಬ ಶಕ್ತಿಶಾಲಿ ದಾನವ. ಅಮೃತದಿಂದ ವಂಚಿತರಾದ ದಾನವರು ದೇವತೆಗಳ ಮೇಲೆ ಯುದ್ಧವನ್ನು ಸಾರಿ ಸೋತರು. ಅವರಲ್ಲಿ ಮುಖ್ಯನಾದ ಬಲಿಯನ್ನು ಸೋಲಿಸುವುದು ಸುಲಭದ ಮಾತಾಗಿರಲಿಲ್ಲ. ಅಂತೂ ಇಂದ್ರನು ಅವನನ್ನು ಸಂಹರಿಸಿದ. ಆದರೆ ಅವನ ಗುರುಗಳಾದ ಶುಕ್ರಾಚಾರ್ಯರು ಅವನನ್ನು ಮೃತ ಸಂಜೀವಿನಿ ವಿದ್ಯೆಯಿಂದ ಬದುಕಿಸಿದರು. ಇದಾದ ನಂತರ ಬಲಿಯು ವಿಶ್ವಜಿತ್ತೆಂಬ ಮಹಾಯಾಗವನ್ನು ಮಾಡಿ ಅಗ್ನಿದೇವನಿಂದ ರಥಾಶ್ವಧ್ವಜಗಳನ್ನು, ತನ್ನ ಪಿತಾಮಹನಾದ ಪ್ರಹ್ಲಾದನಿಂದ ಮಹಾಧನುಸ್ಸನ್ನು, ಅಕ್ಷಯ ಬತ್ತಳಿಕೆಯನ್ನೂ ಪಡೆದ. ಹೀಗೆ ಆ ಯಾಗದಿಂದ ಅತ್ಯುಗ್ರ ಶಕ್ತಿಯನ್ನು ಸಂಪಾದಿಸಿದ. ಇಂತಹ ಶಕ್ತಿಯಿಂದ ಇಂದ್ರಾದಿ ದೇವತೆಗಳನ್ನು ಹೀನಾಯವಾಗಿ ಸೋಲಿಸಿ ಸ್ವರ್ಗರಾಜ್ಯವನ್ನು ವಶಪಡಿಸಿಕೊಂಡ. ತಾನೇ ಇಂದ್ರಪದವಿಯನ್ನು ಹೊಂದಿ ಬಲೀಂದ್ರನಾದ.. ತ್ರಿಲೋಕಾಧಿಪತಿಯಾದ.
ಇದರಿಂದ ಆತಂಕಕ್ಕೆ ಸಿಕ್ಕಿದ ದೇವತೆಗಳು ವಿಷ್ಣುವನ್ನು ಪ್ರಾರ್ಥಿಸಿ ಬಲಿಯನ್ನು ಕೊಲ್ಲಲು ಕೇಳಿಕೊಂಡರು. ಆಗ ಶ್ರೀ ಹರಿಯು ಅವರ ಅರಿಕೆಯನ್ನು ನೀಗಿಸಲು ಕಶ್ಯಪ ಮತ್ತು ಅದಿತಿಯ ಪುತ್ರನಾಗಿ ಜನಿಸಿದ. ತೀರಾ ಚಿಕ್ಕದಾದ ಆಕೃತಿಯನ್ನು ಹೊಂದಿದ್ದರಿಂದ ಅವನಿಗೆ ವಾಮನ ಎಂಬ ಹೆಸರು ಬಂತು. ವಿಷ್ಣುವಿನ ಹತ್ತು ಅವತಾರಗಳಲ್ಲಿ ವಾಮನಾವತಾರವು ಐದನೆಯದು.
ಬಲೀಂದ್ರನು ಅಶ್ವಮೇಧಯಾಗವನ್ನು ಮಾಡುತ್ತಿದ್ದ. ಆಗ ಅಲ್ಲಿಗೆ ವಾಮನನು ಬಾಲವಟುವಾಗಿ ಬಂದ. ಬಾಲವಟುವಾದ ವಾಮನ ಅದ್ಭುತ ತೇಜಸ್ಸನ್ನು ಕಂಡು ಬಲಿಯು ಬೆರಗಾದ. ಆ ಸಂತೋಷದಲ್ಲಿ ಬಲಿಯು ' ನಿನಗೆ ಯಾವ ವರ ಬೇಕೋ ಕೇಳು ' ಎಂದು ವಾಮನನಿಗೆ ಹೇಳಿದ. ವಾಮನನು ತನ್ನನ್ನು ವಧಿಸಲಿಕ್ಕಾಗಿ ಅವತರಿಸಿ ಬಂದ ವಿಷ್ಣು ಎಂದು ಅವನಿಗೆ ಗೊತ್ತಾಗಲಿಲ್ಲ. ಅದಕ್ಕೆ ವಾಮನನು ' ಬಲಿಚಕ್ರವರ್ತಿ, ನನಗೆ ಹೆಚ್ಚೇನೂ ಬೇಡ. ನನ್ನ ಅಳತೆಯಲ್ಲಿ ಮೂರು ಹೆಜ್ಜೆ ಭೂಮಿ ಕೊಟ್ಟರೆ ಸಾಕು ' ಎಂದ. ಅದಕ್ಕೆ ಬಲಿಯು ಒಪ್ಪಿದ. ಕೂಡಲೇ ನೋಡು ನೋಡುತ್ತಿದ್ದಂತೆ ವಾಮನನು ತ್ರಿವಿಕ್ರಮನಾಗಿ ಬೆಳೆದ. ಆಕಾಶ ಭೂಮಿಗಳು ಒಂದಾದುವು. ಒಂದು ಪಾದದಿಂದ ತ್ರಿವಿಕ್ರಮನು ಇಡೀ ಭೂಮಂಡಲವನ್ನು ಅಳೆದ. ಇನ್ನೊಂದು ಪಾದವನ್ನು ಗಗನಕ್ಕೆ ಚಾಚಿದಾಗ ಅದು ಇಡೀ ಆಕಾಶವನ್ನೇ ವ್ಯಾಪಿಸಿತು. ಅಲ್ಲದೆ ಹೀಗೆ ಗಗನಕ್ಕೆ ಪಾದವನ್ನು ಚಾಚಿದಾಗ ತ್ರಿವಿಕ್ರಮನ ಎಡಗಾಲಿನ ಹೆಬ್ಬೆರಳಿನ ಉಗುರಿನ ತುದಿ ತಾಗಿ ಬ್ರಹ್ಮಾಂಡದ ಕಟಾಹದ ತುದಿ ತೂತಾಗಿ ನೀರು ಸೊರಹತ್ತಿತು. ಈ ವಿಷ್ಣು ಪಾದೋದಕವೇ ಗಂಗೆ. ಇದಕ್ಕೆ ದೇವಗಂಗೆ ಎಂದೂ ಕರೆಯುತ್ತಾರೆ. ತ್ರಿವಿಕ್ರಮನಾದ ಶ್ರೀ ಹರಿಯು ಮತ್ತೊಂದು ಪಾದವನ್ನು ಬಲಿಯ ತಲೆಯ ಮೇಲಿಟ್ಟು ಆತನನ್ನು ಪಾತಾಳಕ್ಕೆ ಅಟ್ಟಿದ.
ಹೀಗೆ ಮೂರನೆಯ ಪಾದವನ್ನು ತ್ರಿವಿಕ್ರಮನು ಬಳಿಯ ಮೇಲಿಟ್ಟಾಗ ಬಲಿಯ ಪಿತಾಮಹನಾದ ಪ್ರಹ್ಲಾದನು ಪ್ರಕಟಗೊಂಡು ಬಲಿಯನ್ನು ರಕ್ಷಿಸುವಂತೆ ಪ್ರಾರ್ಥಿಸಿದ. ಆಗ ಶ್ರೀ ಹರಿಯು ' ಪಾತಾಳದಲ್ಲಿರುವ ಬಲಿಯ ಅರಮನೆಯನ್ನು ನಾನು ನನ್ನ ಅಂಶದಿಂದ ಯಾವಾಗಲೂ ಕಾಯುತ್ತಾ ಇರುತ್ತೇನೆ. ಅವನಿಗೆ ಒಂದು ಕಲ್ಪ ಪ್ರಮಾಣದ ಆಯುಷ್ಯವನ್ನು ಕೊಟ್ಟಿದ್ದೇನೆ. ಅದುವರೆಗೆ ಸುತಲ ಲೋಕದಲ್ಲಿ ಮುನ್ನೂರು ಮಂದಿ ಸುಂದರಿಯರೊಡನೆ ಭೋಗಿಸುವಂತಾಗಲಿ. ಅಲ್ಲದೆ ಮುಂದಿನ ಸಾವರ್ಣಿಕ ಮನ್ವಂತರದಲ್ಲಿ ಮತ್ತೆ ಇಂದ್ರನಾಗುತ್ತಾನೆ. ಪ್ರತಿ ವರ್ಷ ಬಲಿಯು ತನ್ನ ರಾಜ್ಯವನ್ನು ನೋಡಲು ಭೂಮಿಗೆ ಬರುತ್ತಾನೆ. ಜನರು ದೀಪಗಳನ್ನು ಹಚ್ಚಿ ಹಬ್ಬವನ್ನು ಆಚರಿಸುತ್ತಾರೆ. ಎಂಬುದಾಗಿ ಪ್ರಹ್ಲಾದನ ಪ್ರಾರ್ಥನೆಯಂತೆ ಬಲಿಗೆ ಅನುಗ್ರಹಿಸಿದನು. ಅಲ್ಲದೆ ' ವೇದ ಓದದ ಬ್ರಾಹ್ಮಣನಿಗೆ ಕೊಟ್ಟ ದಾನಗಳ ಮತ್ತು ವಿಶ್ವಾಸವಿಲ್ಲದವನು ಮಾಡಿದ ಯಜ್ಞ ಯಾಗಾದಿಗಳ ಫಲವು ಕೊಟ್ಟವನಿಗೆ, ಮಾಡಿದವನಿಗೆ ಲಭಿಸದೆ ನಿನಗೆ ಲಭಿಸುತ್ತದೆ ' ಎಂದು ವರವನ್ನು ಕೊಟ್ಟನು.
ಈ ಪ್ರಕಾರ ಬಲಿಯು ಪ್ರತಿ ವರ್ಷ ಬಲಿ ಪಾಡ್ಯಮಿಯಂದು ಭೂಮಿಗೆ ಬರುತ್ತಾನೆ. ಒಂದು ದಿನ ಇರುತ್ತಾನೆ ಎನ್ನುವ ಒಂದು ಅಭಿಪ್ರಾಯ ಇದೆ. ನರಕ ಚತುರ್ದಶಿಯಂದು ಬಂದು ಬಲಿಪಾಡ್ಯಮಿಯವರೆಗೆ ಮೂರು ದಿನ ಇರುತ್ತಾನೆ ಎನ್ನುವ ಇನ್ನೊಂದು ಹೆಚ್ಚಿನ ಅಭಿಪ್ರಾಯವೂ ಇದೆ. ಒಟ್ಟಾರೆ ಅದನ್ನೇ ನಾವು ಬಲೀಂದ್ರನನ್ನು ತರುವ ಪದ್ಧತಿಯನ್ನಾಗಿ ಆಚರಿಸುತ್ತೇವೆ. ಈ ಕಾರಣಕ್ಕಾಗಿ ದೀಪಾವಳಿಯ ಮೂರು ದಿನಗಳು ದೀಪಗಳನ್ನು ಹಚ್ಚಿ ಸಂಭ್ರಮಿಸುವ ಪದ್ಧತಿ ಬಂದಿದೆ. ಬಲಿಯು ಕೊಟ್ಟ ದಾನದಂತೆ ತ್ರಿವಿಕ್ರಮನು ಆಕಾಶಕ್ಕೆ ತನ್ನ ಪಾದವನ್ನಿಟ್ಟು ಅಳೆಯುವಾಗ ಅವನ ಹೆಬ್ಬೆರಳ ಉಗುರು ತುದಿ ತಾಗಿ ಬ್ರಹ್ಮಾಂಡದ ಭಿತ್ತಿಯಲ್ಲಿ ರಂಧ್ರವಾಗಿ ದೇವಗಂಗೆ ಹೊರಬಂದಿದ್ದರಿಂದ ಆ ಗಂಗೆಯನ್ನು ತುಂಬುವ ಪದ್ಧತಿಯೂ ಈ ಸಂದರ್ಭದಲ್ಲಿ ನಡೆಯುತ್ತದೆ. ಇವೇ ಗಂಗೆಯನ್ನು ತುಂಬುವುದು. 
ಬಲೀಂದ್ರನನ್ನು ತರುವುದು ಮತ್ತು ದೀಪಗಳನ್ನು ಹಚ್ಚುವುದು ಈ ಪದ್ಧತಿಗಳಿಗೆ ಕಾರಣ.
ನರಕ ಚತುರ್ದಶಿಯ [ ದೀಪಾವಳಿಯ ] ದಿನ ರಾತ್ರಿಯ ಕಾಲದಲ್ಲಿ [ ಸಂಜೆಯ ಕಾಲದಲ್ಲಿ ? ] ಮೈಗೆ ಎಣ್ಣೆಯನ್ನು ಸವರಿಕೊಂಡು ಅಭ್ಯಂಜನವನ್ನು ಮಾಡಬೇಕು. ಆ ದಿನ ತೈಲದಲ್ಲಿ ಲಕ್ಷ್ಮಿಯೂ, ಜಲದಲ್ಲಿ ದೇವಗಂಗೆಯೂ, ಉಪಸ್ಥಿತರಿರುತ್ತಾರೆ. ಇದರಿಂದ ನರಕವೂ ಪ್ರಾಪ್ತವಾಗುವುದಿಲ್ಲ. ಮರುದಿನ [ ಅಮಾವಾಸ್ಯೆ ] ಸಂಜೆ ಪ್ರದೋಷ ಕಾಲದಲ್ಲಿ ಲಕ್ಷ್ಮಿಯನ್ನು ಪೂಜಿಸಬೇಕು. ಹಸುವಿನ ಕೊಟ್ಟಿಗೆಯಲ್ಲಿ ದೀಪವನ್ನು ಹಚ್ಚಿಡುವುದನ್ನು ಮರೆಯಬಾರದು. ಏಕೆಂದರೆ ಆ ದಿನ ಲಕ್ಷ್ಮಿಯು ಅಲ್ಲಿ ಇರುತ್ತಾಳೆ. ನಂತರ ಪ್ರತಿಪದೆಯ ದಿನ ಬಲಿ ಪೂಜೆಯನ್ನು ಮಾಡಬೇಕು. ಆ ದಿನ ಯಾರು ಬಲಿ ಪೂಜೆಯನ್ನು ಮಾಡುವುದಿಲ್ಲವೋ ಅವರ ಪುಣ್ಯವೆಲ್ಲಾ ಬಲಿಗೆ ಸೇರುತ್ತದೆ.
ತಾರೀಖು : 29 - 10 - 2016 . ದೀಪಾವಳಿಯ ಮುನ್ನಾ ದಿನಗಳು.

Monday, 12 September 2016

###### ಒಗಟುಗಳು ######


~~~~ ಎಂ. ಗಣಪತಿ. ಕಾನುಗೋಡು.

ಒಗಟುಗಳು ಜನಪದ ಸಾಹಿತ್ಯದ ಒಂದು ಪ್ರಾಕಾರ. ಇದಕ್ಕೆ ಕನ್ನಡದಲ್ಲಿ ಒಂಟು, ಒಡಪು, ಒಡಗತೆ [ ಅಪಭೃಂಶಿತ ' ವರ್ಚಿಗತೆ '. ] ಎಂದೂ ಹೇಳುತ್ತಾರೆ. ಇದಕ್ಕೆ ಆಂಗ್ಲಭಾಷೆಯಲ್ಲಿ ' riddles ' ಎನ್ನುತ್ತಾರೆ. ಮೂಲತಃ ಒಗಟುಗಳನ್ನು ಕೇಳುವುದು ಮತ್ತು ಅವುಗಳನ್ನು ಬಿಡಿಸುವುದು ಮನೋರಂಜನೆಯ ಪ್ರಕ್ರಿಯೆಗಳಾಗಿದ್ದುವು.
ಸಾಮಾನ್ಯವಾಗಿ ಒಗಟುಗಳೆಂದರೆ ಒಂದು ವಿಷಯವನ್ನು ಒಳಗೊಂಡ ಜಡಕಿನ ಪ್ರಶ್ನೆಯನ್ನು ಕೇಳುವುದು ಮತ್ತು ಅದನ್ನು ಚುರುಕು ಬುದ್ಧಿಯಿಂದ ಬಿಡಿಸುವುದು. ಅದರ ಪಧಾನ ಗುಣ ಸಂಕ್ಷಿಪ್ತತೆ ಮತ್ತು ಆಕರ್ಷಣೆ. ಒಗಟಿನಲ್ಲಿ ಗೋಪ್ಯ ಮುಖ್ಯ ಅಂಶ. ಅದು ಮನುಷ್ಯನ ಬುದ್ಧಿಗೆ ಕೈ ಹಾಕುತ್ತದೆ. ಅವನ ಬುದ್ಧಿಮತ್ತೆಯನ್ನು [ I Q ] ಪರೀಕ್ಷೆ ಮಾಡುತ್ತದೆ. ಚುರುಕು ಬುದ್ಧಿಯುಳ್ಳವರು ಒಂದು ಒಗಟಿನ ಅಂತರಾರ್ಥವನ್ನು ಕೂಡಲೇ ಗ್ರಹಿಸುತ್ತಾರೆ.
ಒಗಟುಗಳು ಜನತೆಯ ಸಂಸ್ಕೃತಿ ಮತ್ತು ಸಂಪ್ರದಾಯಗಳನ್ನು ಪ್ರತಿನಿಧಿಸುತ್ತದೆ. ಅವು ಹಾಸ್ಯಮಯತೆಗಳಿಂದ ಕೂಡಿರುವುದರಿಂದ ಮನೋರಂಜಕವಾಗಿರುತ್ತವೆ.ಹಲವು ಭಾರಿ ಸಾಹಿತ್ಯಕವಾಗಿರುತ್ತವೆ. ಗಣಿತ, ವಿಜ್ನಾನಗಳಿಂದ ಕೂಡಿ ಶೈಕ್ಷಣಿಕವಾಗಿರುತ್ತವೆ. ಮತಾಚಾರದವುಗಳೂ ಇರುತ್ತವೆ.
ಬೈಗುಳಗಳ ಒಗಟುಗಳು, ಅಶ್ಲೀಲ ಒಗಟುಗಳು, ಮದುವೆಯ ಒಗಟುಗಳು, ಹೆಸರಿನ ಒಗಟುಗಳು, ಆಟದ ಒಗಟುಗಳು ಎಂದು ಹಲವು ಥರದ ಒಗಟುಗಳು ಇವೆ.
ಒಗಟುಗಳು ಪದ್ಯರೂಪ, ಸಂಭಾಷಣೆಯ ರೂಪ, ಹಾಡಿನ ರೂಪ, ಕಥೆಯ ರೂಪ ಗಳಲ್ಲಿ ಇರುತ್ತವೆ. ಕೆಲವು ಒಗಟುಗಳು ಒಂದೇ ಸಾಲಿನಷ್ಟು ಚಿಕ್ಕವು. ಆರು ಸಾಲಿನ ದೊಡ್ಡವೂ ಇವೆ. ಹಾಡಿನ ರೂಪದಲ್ಲಿ ಇರುವವು ಹೆಚ್ಚಾಗಿ ತ್ರಿಪದಿಗಳು. ಒಗಟುಗಳು ಕಾವ್ಯಾತ್ಮಕ, ಆಸಕ್ತಿಯುತ ಮತ್ತು ಸಂಭ್ರಮಶೀಲವಾದವು. ಅವುಗಳಲ್ಲಿ ಎರಡು ಸದೃಶ ವಸ್ತುಗಳಿರುತ್ತವೆ. ಉಪಮಾನ ಮತ್ತು ಉಪಮೇಯ. ಒಗಟಿಗೆ ಕೊಡುವ ಹೋಲಿಕೆಗಳು ಸಾಮಾನ್ಯವಾಗಿ ಬಾಹ್ಯ ಪ್ರಪಂಚದ ವಸ್ತು ಚಿತ್ರಗಳೇ ಆಗಿರುತ್ತವೆ.
ಒಗಟುಗಳ ಸರಮಾಲೆಯೇ ಇರುತ್ತದೆ. ತಮಾಷೆಯೆಂದರೆ ಒಂದು ಒಗಟಿಗೆ ಉತ್ತರ ಹೇಳಿದರೆ ಆ ಉತ್ತರದಿಂದಲೇ ಪ್ರಾರಂಭವಾಗುವ ಮತ್ತೊಂದು ಒಗಟು ಇರುತ್ತದೆ. ಆ ಉತ್ತರದ ಒಗಟನ್ನೇ ಮೊದಲು ಒಗಟು ಕೇಳಿದವನಿಗೆ ಬಿಡಿಸಲು ಒಡ್ಡುವ ಪರಿಪಾಠವಿದೆ. ಹೀಗೆ ಈ ಮೋಜಿನಲ್ಲಿ ಒಂದು ರೀತಿಯ ಕೊಂಡಿ ಇರುವುದೂ ಇದೆ.
ಒಂದು ಕಾಲದಲ್ಲಿ ಅದು ಮನೋರಂಜನೆಯ ಮತ್ತು ಜ್ನಾನವವರ್ಧನೆಯ ಕೋರ್ಸ್ ಆಗಿತ್ತು. ಹಗಲೆಲ್ಲಾ ದುಡಿದು ರಾತ್ರಿ ಮಲಗಿದಾಗ ಹಾಸಿಗೆಯಿಂದಲೇ ಮಧ್ಯರಾತ್ರಿಯವರೆಗೂ ಆಗಿನ ಅವಿಭಕ್ತ ಕುಟುಂಬದಲ್ಲಿ ಸದಸ್ಯ ಸದಸ್ಯರ ನಡುವೆ ಒಗಟನ್ನು ಕೇಳುವ , ಬಿಡಿಸುವ ಪರಿಪಾಠವಿತ್ತು. ಕೆಲವು ಜನರಿಗೆ ಒಗಟುಗಳು ಕಂಠಸ್ಥ. ಜನ ಸೇರಿರುವ ಕಡೆ ಒಗಟುಗಳನ್ನು ಒಡ್ಡುವ ಜಾಣ್ಮೆ ಅವರಲ್ಲಿ ಇರುತ್ತದೆ.
ಕನ್ನಡ ಸಾಹಿತ್ಯದ ವಚನ ಸಾಹಿತ್ಯದಲ್ಲಿ ಬೆಡಗಿನ ವಚನಗಳು, ಸರ್ವಜ್ಞ ವಚನಗಳು, ಕಂತಿ ಹಂಪನ ಸಮಸ್ಯೆಗಳು, ಹರಿಹರನ ಮುಂಡಿಗೆಯ ಅಷ್ಟಕ, ಕನಕದಾಸರ ಮುಂಡಿಗೆಗಳು, ಮಹಾಭಾರತದ ಜಾತಕದ ಕಥೆಗಳು , ಯಕ್ಷಪ್ರಶ್ನೆ ಪ್ರಸಂಗ, ಅಲ್ಲದೆ ಅದರ ಇನ್ನು ಕೆಲವು ಪದ್ಯಗಳು [ ಉದಾ : ವೇದ ಪುರುಷನ ಸುತನ ಸುತನ ....... ವೀರ ನಾರಾಯಣ ] ಇವುಗಳಲ್ಲಿ ಒಗಟುಗಳನ್ನು ಕಾಣುತ್ತೇವೆ. ಕನಕದಾಸರ ಕೀರ್ತನೆಗಲ್ಲೂ ಕೆಲವೆಡೆ ಒಗಟುಗಳ ರಚನೆಗಳಿವೆ. ಜನಪದ ಸಾಹಿತ್ಯದಲ್ಲಂತೂ ಅದರದೇ ಸಂತೆ. ಸಂಸ್ಕೃತ ಗ್ರಂಥಗಳಲ್ಲಿ ಅಂದರೆ ವೇದ -- ಉಪನಿಷತ್ತುಗಳಲ್ಲಿ ಒಗಟಿನಂಥಹ ಮಾತುಗಳನ್ನು ಕಾಣಬಹುದು. ಸಂಸ್ಕೃತದಲ್ಲಿ ಇದಕ್ಕೆ ಪ್ರಹೇಲಿಕಾಗಳು ಎಂದಿದ್ದಾರೆ. ಬೋಜರಾಜ, ಕಾಳಿದಾಸರ ಕಥೆಗಳಲ್ಲಿ ಇರುವ ಒಗಟುಗಳು ಈ ಸಾಲಿಗೆ ಸೇರುತ್ತವೆ. ' ಬೋಜ ಪ್ರಬಂಧ ' ದಲ್ಲಿ ಕಾಳಿದಾಸನು ಪೂರ್ಣಗೊಳಿಸುವ ಒಗಟುಗಳನ್ನು ಕಾಣಬಹುದು.
ಒಗಟುಗಳು ಸಾರ್ವತ್ರಿಕವಾದದ್ದು. ಎಲ್ಲಾ ಪ್ರದೇಶದಲ್ಲಿ, ಎಲ್ಲಾ ಭಾಷೆಗಳಲ್ಲಿ ಎಲ್ಲಾ ಜನಾಂಗಗಳಲ್ಲಿ ಕಂಡುಬರುತ್ತವೆ. ಒಗಟನ್ನು ಒಡ್ಡುವುದು ಮತ್ತು ಬಿಡಿಸುವುದು ಇವೆಲ್ಲ ಒಂದು ಬಗೆಯ ಕ್ರೀಡೆ. ಒಗಟಿನ ಸ್ಪರ್ಧೆ ನಡೆದದ್ದೂ ಇದೆ. ಒಗಟಿನ ಜೂಜು ಒಂದು ಮೋಜಿನ ಪ್ರಸಂಗ.
ತಾರೀಖು : 6 - 9 - 2016