ಹವ್ಯಕರ ಮದುವೆಯ ಸಾಂಪ್ರದಾಯಿಕ ಜರೆವ ಹಾಡುಗಳು

ಒಂದು ಮಾತು :

ಹವ್ಯಕರ ಮದುವೆಯಲ್ಲಿ ವಿಧಿಗಳಿಗೆ ಸಂಬಂಧಿಸಿ ಹೇಗೆ ಮಂತ್ರಗಳಿವೆಯೋ ಹಾಗೆ ಸಂಪ್ರದಾಯದ ಹಾಡುಗಳೂ ಇವೆ. ಅದರ ಜೊತೆಗೆ ಜರೆವ ಹಾಡುಗಳೂ ಹೌದು.
ಮದುವೆ ಸಮಾರಂಭದಲ್ಲಿ ಒಂದು ಕಡೆಯ ನೆಂಟರು ಮತ್ತೊಂದು ಕಡೆಯ ನೆಂಟರನ್ನು ಜರೆದು ಹಾಡನ್ನುಹಾಡುತ್ತಾರೆ. ಅದಕ್ಕೆ ಬೇಸರಿಸದೆ ಮತ್ತೊಂದು ಕಡೆಯವರು ಪ್ರತಿಯಾಗಿ ಮತ್ತೊಂದು ಜರೆವ ಹಾಡನ್ನು ಹಾಡುತ್ತಾರೆ. ಈ ಪ್ರಕ್ರಿಯೆ ಅನೇಕ ಹಾಡುಗಳ ಪರಿಧಿಯಲ್ಲಿ ಗಂಟೆಗೂ ಮಿಕ್ಕಿ ಹಿಂದಿನ ಕಾಲದಲ್ಲಿ ನಡೆದದ್ದುಂಟು. ಇದು ಪರಸ್ಪರರ ಖುಷಿಗಾಗಿ ಅಷ್ಟೆ. ಬಹಳಷ್ಟು ಸಾರಿ ಇದು ಅತಿ ಸಂತೋಷದಲ್ಲಿಯೇ ಕೊನೆಯನ್ನು ಕಾಣುತಿತ್ತು. ಕೆಲವೊಮ್ಮೆ ಒಂದು ಕಡೆಯವರು ಹಾಡಿನಲ್ಲಿ ಹಿಂದೆ ಬಿದ್ದಾಗ ಪರಿಸ್ತಿತಿಯು ಅಪರೂಪಕ್ಕೆ ಜಗಳಕ್ಕೆ ತಿರುಗಿದ್ದೂ ಇದೆ. ಅಂಥಹ ಸನ್ನಿವೇಶದಲ್ಲಿ ಅಲ್ಲಿದ್ದ ಹಿರಿಯರು ಸಮಜಾಯಿಷಿ ಮಾಡಿ ಸಮಾಧಾನಕ್ಕೆ ತಂದಿದ್ದೂ ಇದೆ.ಹಿಂದೆ ಒಂದು ಕಾಲದಲ್ಲಿ ನಮ್ಮ ಅಜ್ಜಿಯಂದಿರು ಸ್ಥಳದಲ್ಲಿಯೇ ಹಾಡುಗಳನ್ನು ಕಟ್ಟಿ ಕಟ್ಟಿ ಹಾಡುವ ಕಲಾ ಚಾತುರ್ಯವನ್ನು ಹೊಂದಿದ್ದರು.
ಇದು ಕೆಲವು ವರ್ಷಗಳ ಹಿಂದಿನ ಮಾತು. ಇಂದು ಪರಿಸ್ತಿತಿ ಹಾಗಿಲ್ಲ. ಹವ್ಯಕರ ಹೆಣ್ಣು ಮಕ್ಕಳ ಜೀವನ ಕ್ರಮ ಬದಲಾಗಿದೆ. ಇಂದಿನ ಹವ್ಯಕ ಹೆಣ್ಣು ಮಕ್ಕಳಲ್ಲಿ ಸಂಪ್ರದಾಯದ ಹಾಡುಗಳನ್ನು , ಹಿಂದಿನಂತೆ ಜರೆಯುವ ಹಾಡುಗಳನ್ನು ಹೇಳುವವರು ಕಡಿಮೆಯಾಗಿದ್ದಾರೆ. ಹೇಳುವವರು ಕೆಲವರು ಇದ್ದರೂ ಸನ್ನಿವೇಶದ ಸಮಯಾವಕಾಶವಿಲ್ಲ.
ನಮ್ಮ ಮದುವೆ ಸಮಾರಂಭದಲ್ಲಿ ನಮ್ಮಲ್ಲಿರುವ ಸಾಮಾನ್ಯ ಹಾಡುಗಾರ್ತಿಯರೇ ಎರಡು ತಂಡಗಳನ್ನು ಸಿದ್ಧಪಡಿಸಿಕೊಳ್ಳಬೇಕು. ಒಮ್ಮೆ ಎರಡು ತಂಡದಲ್ಲಿ ಒಬ್ಬೊಬ್ಬರೇ ಇದ್ದರೂ ಸರಿಯೇ. ಹೆಚ್ಚು ಇದ್ದರೆ ಪಸಂದ. ನೆಂಟರನ್ನು ಹಾಡಿನಲ್ಲಿ ಜರೆದು, ಒಮ್ಮೆ ಎದುರು ಕಡೆಯಿಂದ ಉತ್ತರಿಸಿ ಹಾಡುವವರು ಯಾರೂ ಇಲ್ಲದಿದ್ದರೆ ನಾವೇ ಸಿದ್ಧಪಡಿಸಿಕೊಂಡ ಮತ್ತೊಂದು ತಂಡದಿಂದ ನಮ್ಮನ್ನೇ ನಾವು ಜರೆದು ಹಾಡಿಕೊಳ್ಳಬೇಕು. ಇದರಿಂದ ಮದುವೆ ಸಮಾರಂಭದ ಸಂತೋಷದ ಸನ್ನಿವೇಶದಲ್ಲಿ ಒಂದು ಮನರಂಜನೆ ಎಲ್ಲರಿಗೂ ದೊರೆಯುತ್ತದೆ. ನಶಿಸಿಹೋಗುತ್ತಿರುವ ಜರೆವ ಹಾಡಿನ ಪದ್ಧತಿ ಪುನಃ ರೂಢಿಗೆ ಬರಲು ಸಾಧ್ಯವಾಗುತ್ತದೆ.
ಈ ತೆರೆನ ಜರೆವ ಹಾಡುಗಳು ಒಂದು ಮೋಜಿಗಾಗಿ ಇರಬೇಕೇ ವಿನಃ ಯಾರ ಮನಸ್ಸಿಗೂ ನೋವು ಮಾಡುವಂತೆ ಇರಬಾರದು. ಎರಡೂ ಸಂಬಂಧದವರು ಈ ಹಾಡುಗಳಿಂದ ಖುಷಿಪಟ್ಟು ಮತ್ತಷ್ಟು ನೈಕಟ್ಯವನ್ನು ಹೊಂದಬೇಕೆನ್ನುವುದು ಇಂಥಹ ಹಾಡುಗಳ ಗುರಿಯಾಗಿರಬೇಕು.
ಇಲ್ಲಿ ನಾನು ಇಂದಿನ ಬದಲಾದ ಸನ್ನಿವೇಶಕ್ಕೆ ಹೊಂದುವ ಹಾಗೆ ತಕ್ಕ ಕೆಲವು ಜರೆವ ಹಾಡುಗಳನ್ನು ಬರೆದಿದ್ದೇನೆ. ಜರೆವ ಮಂಡನೆ ಮತ್ತು ಅದಕ್ಕೆ ಜರೆದ ಉತ್ತರ ಎರಡೂ ಇದರಲ್ಲಿವೆ. ಇದು ಒಂದು ಪ್ರಯತ್ನವಷ್ಟೆ. ಹಳೆಯ ಜಾಡಿನ ಹಾಡುಗಳ ಲಯಕ್ಕೆ ಹೊಂದಿಸಿ ಬರೆದಿದ್ದೇನೆ. ಆದ್ದರಿಂದ ಹಾಡು ಹೊಸತಾದರೂ ಹಾಡುವವರು ಹಳೆಯ ಜಾಡಿನಲ್ಲಿಯೇ ಹಾಡುತ್ತಾರೆ ಎಂದು ನನ್ನ ಅಭಿಪ್ರಾಯ. ಒಂದೆರಡು ಹಳೆಯ ಹಾಡುಗಳನ್ನು ಇಂದಿನ ಸನ್ನಿವೇಶಕ್ಕನುಸರಿಸಿ ತಿದ್ದಿ ಪ್ರಸ್ತುತಪಡಿಸಿದ್ದೇನೆ.

ಎಂ. ಗಣಪತಿ.
ಕಾನುಗೋಡು
ಅಂಚೆ : ಬ್ರಾ.ಮಂಚಾಲೆ.--- 577431
ಸಾಗರ ತಾಲ್ಲೂಕು - ಶಿವಮೊಗ್ಗ ಜಿಲ್ಲೆ.
ತಾರೀಖು : 20 - 5 - 2015 

--------------------------------------------------
@ ಹವ್ಯಕರ ಮದುವೆ ಮನೆಯಲ್ಲಿ ಜರೆಯುವ ಹಾಡು

1.%%%%   ಗಂಡಿನ ಕಡೆಯವರು :-
 ಕಲ್ಯಾಣವೇ ಕಪ್ಪಿನ ಕಲ್ಯಾಣವೇ ||
ಮದುವೆ ಮಂಟಪದಲ್ಲಿ ಮದವಣತಿ ಕಪ್ಪು | ಮದವಣತಿ ಅಕ್ಕ ತಂಗಿಯರೇ ಕಪ್ಪು |
ಅವರ್ವಮ್ಶೆಲ್ಲಾ ಕಪ್ಪು ಮೂರು ಲೋಕಕ್ಕೂ ಸಾಕು | ಚಪ್ಪರ ತುಂಬಿತು ಹಗಲುಗಪ್ಪು || 1 ||
ಧಾರೆ ಮಂಟಪದಲ್ಲಿ ಮದವಣತಿ ಕಪ್ಪು | ಮದವಣತಿ ತಾಯಿ ತಂದೆಯರೇ ಕಪ್ಪು |
ಅವರ ಬಳಗೆಲ್ಲಾ ಕಪ್ಪು ಮೂರು ಲೋಕಕ್ಕೂ ಸಾಕು | ಚಪ್ಪರ ತುಂಬಿತು ಹಗಲುಗಪ್ಪು || 2 ||

&&&&  ಹೆಣ್ಣಿನ ಕಡೆಯವರ ಉತ್ತರ :-

ಕರಿಯಳೆಂದು ನೀ ಜರೆಯಬೇಡ | ಬಿಳಿಗೆಳತಿಯ ಗರ್ವದಿಂದ ಕಪ್ಪಿಗಿಂತ ಬಿಳಿಬಣ್ಣ ಹೆಚ್ಚು ಹೇಳ್ವೆ ಯಾವ ಹಿರಿಮೆಯಿಂದ || ಪ ||
ಕಬ್ಬಿಣವು ಕಪ್ಪು ಯಂತ್ರಗಳು ಕಪ್ಪು | ಕಲ್ಲಿದ್ದಲು ಕಪ್ಪು ಕಪ್ಪು |
ವಾಹನದ ಗಾಳಿ ಅದರುಸಿರು ಕಪ್ಪು | ಡಾಂಬರಿನ ಬೀದಿ ಕಪ್ಪು || 1 ||
ಈ ಕಪ್ಪು ಪ್ರಿಯವು ಅಪ್ರಿಯವು ಏಕೆ | ಹೇಳೆನ್ನ ಮೈಯೆ ಕಪ್ಪು |
ಕಬ್ಬು ಕಪ್ಪು ಎಂದು ಗಬ್ಬದಿರೆ | ಕಬ್ಬಿನ ಹಾಲಿನ ಸವಿಯ ನೋಡು ಬಾರೆ || 2 ||
ಕಪ್ಪು ಕಪ್ಪು ನೇರಳೆ ಕಪ್ಪು | ತಿಂದು ನೋಡಿದರೆ ರುಚಿ ಒಪ್ಪು |
ನೀ ಮೃಗವು ನಿನ್ನ ನಾಭಿಯೊಳು ನಾನು ಕಸ್ತೂರಿಯಷ್ಟೆ ಬಾರೇ || 3 ||
ಓ ಶ್ವೇತ ಚೆನ್ನೆ ಕಲಿಸುವೆ ಬಾರೆ | ಶೃಂಗಾರ ಸಾರವನ್ನು |
ಕುಂಕುಮವನಿಡುವೆ ಬಿಡು ಕೆಂಪು ಕೇಡು | ಎಂಬೀ ವಿಚಾರವನ್ನು || 4 ||
ಕಪ್ಪು ಕಪ್ಪು ಆಕಳು ಕಪ್ಪು | ಕರೆದು ನೋಡಿದರೆ ಬಿಳಿ ಹಾಲು |
ಹಚ್ಚುವೆನು ಕಣ್ಗೆ ಕಾಡಿಗೆಯ ನೋಡು | ದರ್ಪಣದಿಂ ರೂಪವನ್ನು || 5 ||
-------------------------------------------------
2.%%%% ಗಂಡಿನ ಕಡೆಯವರು ಜರೆದದ್ದು :

ಹತ್ತು ಮಂದಿಯೊಳಗೆ ತಾಯವ್ವಗೆ | ಚೊಚ್ಚಲ ಮಗನಿವನು | 
ಮತ್ತೆ ಇವರ್ ಮನೆ ಹೆಣ್ಣು ತರಲಾಗ ಎಂದರೆ | ಬ್ರಹ್ಮ ಸಂಕಲ್ಪವು ತಪ್ಪಲೇ ಇಲ್ಲ |
ಬ್ರಹ್ಮ ಬರೆದನಲ್ಲ | ಇದು ಈಗ ನಮ್ಮ ಮನಸು ಇಲ್ಲ || 1 ||
ನೂರು ಮಂದಿಯು ಬಂದರು ನಮ್ಮನೆಗೆ | ರಂಭೆಯ ಚೆಲುವಿನವಳು |
ತಮ್ಮ ಮಗಳೆಂದು ಕುಣಿಯುತ ಬಂದರು ಒಳಗೆ | ಎಲ್ಲಾ ಬಿಟ್ಟು ಇಲ್ಲಿಗೆ ಬಂದೇವಲ್ಲ |
ಬ್ರಹ್ಮ ಬರೆದನಲ್ಲ | ಇದು ಈಗ ನಮ್ಮ ಮನಸು ಇಲ್ಲ || 2 ||

&&&& ಹೆಣ್ಣಿನವರ ಉತ್ತರ :

ವರನ ವರುಷವ ನೋಡೆ | ಎರಡಾಳುದ್ದವ ನೋಡೆ |
ಅಳಿಯನಿಗಿಂತ ಮಾವ ಕಿರಿದಾದ | ಕಿರಿದಾದ ಮಾವಯ್ಯ |
ಎಲ್ಲಿ ದೊರಕಿದನೋ ಮಗಳೀಗೆ || 1 ||
ಮೂರು ಲೋಕಕು ಗಂಡು | ನಮ್ಮ ಚಿನ್ನದ ಕುವರಿ ಇಂದು |
ನಿಮ್ಮ ಮಗನು ಬಾಣಲಿ ಗುಂಡು | ಕಂಡರೆ ಬರಿಯ ಬೆಂಡು |
ಎಲ್ಲಿ ದೊರಕಿದನೋ ಮಗಳೀಗೆ || 2 ||
------------------------------------------------
3. %%%%   ಗಂಡಿನ ಕಡೆಯವರು :-

ಸೀರೆಯನ್ನುಡು ಎಂದರೆ ನಿಮ್ಮ ಮಗಳು | ಸರಕ್ಕನೆ ಜಾರುವವಳಲ್ಲಾ |
ಸೊಂಟಕೆ ಚೂಡಿದಾರವ ಸಿಕ್ಕಿಸಿಕೊಂಡು | ತೈ ತೈ ಎನ್ನುವ ಫಾರಿನ್ ಸೊಸೆಯನು ತಂದೇವಲ್ಲಾ ||
ರಂಗೋಲಿ ಹಾಕೆಂದರೆ ನಿಮ್ಮ ಮಗಳು | ಸೀಮೆಸುಣ್ಣ ಗೀಚಿದಳಲ್ಲಾ ||
ರಂಗನು ಹಚ್ಚಿದ ತೊಂಡೆಹಣ್ಣಿನ ತುಟಿಯಾ | ಕಂಡು ವಿದ್ಯಾವಂತಳೆಂದು ನಾವು ತಂದೇವಲ್ಲಾ ||
ಅಡುಗೆ ಮಾಡೆಂದರೆ ನಿಮ್ಮ ಮಗಳು | ಯಾಕ್ವರ್ಡ್ [ Awkward ] ಎಂದು ಎರಗಿದಳಲ್ಲಾ | 
ಹಾಲಿಗೆ ಒಗ್ಗರಣೆ ಕೊಟ್ಟು ಆಲ್ ರೈಟ್ ಎಂದ | ವಳನ್ನು ಬರಿದೇ ನಾವು ತಂದೇವಲ್ಲಾ ||

&&&& ಹೆಣ್ಣಿನವರ ಉತ್ತರ :-

ಕಟ ಕಟೆ ಅತ್ತೇರು ಕಿಟಿ ಕಿಟಿ ಮಾವ್ನೋರು ಸೂತ್ರದ ಗೊಂಬೆ ನನ ಗಂಡ |
ಪಂಜರದ ಧಗೆಯಲ್ಲಿ ಬಾಳುವುದೇ ಕಷ್ಟ ಮನೆಯಲ್ಲಿ ||
ಮಾವ್ನೋರು ಮಾತಾಡಿದರೆ ಸಿಂಹ ಘರ್ಜಿಸಿದಂತೆ ಅತ್ತೇರು ಘಟಸರ್ಪ |
ಘಟಸರ್ಪಕೆ ಬಾಗಿದ ನನ ಗಂಡನೆ ನಷ್ಟ ಮನೆಯಲ್ಲಿ ||
ಅತ್ತೆ ಮಾವರ ಜಗಳ ಮಾತಿಗೆ ಮಾತು ಬಹಳ ನನಗೆ ಪೀಕಲಾಟ |
ಪೀಯ ಪಿಟ್ಟ ಉಸಿರದ ಗಂಡ ಬೆಂಕಿಯ ಚೆಂಡು ಮನೆಯಲ್ಲಿ ||
----------------------------------------------------------------
4.%%%%   ಗಂಡಿನ ಕಡೆಯವರು ಜರೆದದ್ದು :-

ಅಂಗಳ ತುಂಬೆಲ್ಲಾ ಜೋಡು ಒಲೆ ಹೂಡಿ ಹೇನಾರಿ ಕಟ್ಟಿಗೆ ಕೂಡಿ |
ಮಿತ್ರೆ ಅತ್ಯೆಮ್ಮ ಎಡಗೈಯಾ | ಎಡಗೈಯ ಕಾಸುತ್ತಾ |
ಸಾರಿಗೆ ಉಪ್ಪ ಹಾಕದಕೆ ಮರೆತಳು ||
ಸಾಂಬಾರು ಕಲಸಿದ ಅನ್ನವ ನಮ್ಮ ಭೀಗರು ಗಟ್ಟಿ ಜಗಿಯಲಾಗಿ |
ಹಲ್ಲಿಗೆ ಹಲ್ಲು ಸಿಕ್ಕಿತೋ ಹಲ್ಲ ನೋಡಲಾಗಿ |
ಅತ್ಯೆಮ್ಮ ಕಟ್ಟಿಸಿದ ಹಲ್ಲು ಸೆಟ್ಟು ||
ಪಾಯಸ ಬಡಿಸಿದ ಅತ್ಯೆಮ್ಮನ ಬಡಿವಾರ ಭುಗಿಲೆದ್ದು ಕುಣಿಯಿತು ಕಾಣಿ |
ದ್ರಾಕ್ಷಿಯೆಂದು ಅವಳ ಸರದ ಹವಳ ತೆವಳಾಡಿತು |
ಅಬ್ಬರದ ಪಾಯಸದ ಸವಿಯ ಬನ್ನಿ ||

&&&& ಹೆಣ್ಣಿನ ಕಡೆಯವರ ಉತ್ತರ :-

ಉಪ್ಪು ಹಾಕಲು ಮರೆತರೆ ಮೇಲುಪ್ಪ ಮರೆತೆರೇನೆ |
ಉಂಡು ದೂರುವ ದರ್ಭಾರಿನ ನೆಂಟರು ನೀವು |
ಯಾರು ಮಾಡದ ಅಡುಗೆಯ ನಾ ಮಾಡಿದೆನೇನೆ ? |
ಉಂಡು ದೂರುವುದು ಥರವಲ್ಲ ||
ಔತಣವನುಂಡು ದೂರುವ ದೂರುಗಳ್ಳೆರಾ ನೀವು |
ಬಾಳೆಯಲಿ ಅನ್ನದ ಅಗುಳ ಉಳಿಸಿದಿರೇನೆ ?
ಒಲ್ಲದ ಗಂಡನಿಗೆ ಮೊಸರಲಿ ಕಲ್ಲ ಕಂಡ |
ಭಂಡತನ ಇದು ಥರವಲ್ಲ ||
-------------------------------------------------------------
5. %%%%   ಗಂಡಿನವರು ಜರೆದದ್ದು :-
ಮೈಲುದ್ದಕೂ ಶ್ಯಾಮಿಯಾನದ ಚಪ್ಪರ ಅಂಗಳವೆಲ್ಲಾ ರಂಗೋರಂಗು |
ಹಾಸಿದ ಜಮಖಾನದ ಮೇಲೆ ತಾಂಬೂಲದ ಹರಿವಾಣ ||
ಹತ್ತಾರು ಹರಿವಾಣಗಳೆಂದು ನಾವು ಹಿಗ್ಗಿದೆವಲ್ಲ ಹರಿವಾಣ ತೆಗೆದರೆ
ಜಮಖಾನ ಹರಕೋ ಹರಕು ನೋಡಿರಿ ಭೀಗರ ದವಲತ್ತು ||
ಭೀಗರು ಬಾಯಿ ತೆರೆದರೆ ಸಾಟಿ - ಮೇಟಿ ಇಲ್ಲದ ಕೋಟಿ ಕೋಟಿಯ ಮಾತು |
ಮಾತಿನ ಬಂಗಾರ ಮಗಳಿಗೆ, ನೋಡಿರಿ ಭೀಗರ ದವಲತ್ತು ||

&&&& ಹೆಣ್ಣಿನವರ ಉತ್ತರ :

ನಮ್ಮ ಬಳಗ ದೇಶದುದ್ದಕೂ ಬಹಳ ನಿಮ್ಮ ಕಿಷ್ಕಿಂಧೆ ಸಾಲದೆನ್ದಿರಲ್ಲೇ |
ಶಹರದ ರಂಗಿನಲ್ಲಿ ಮದುವೆ ಹಂದರ ಮೆರೆಯಲೆಂದಿರಲ್ಲೇ ||
ತಾಂಬೂಲ ಜಗಿವುದ ಬಿಟ್ಟು ಹರಿವಾಣವೆತ್ತಿ ಹುಳುಕ ಹರಡುವುದೇನೆ ? |
ನಿಮಗಿಟ್ಟ ಗೌರವ ಸರಿಸಿ ಸೊಸೆ ತವರ ಹೆಂಚಿನ ಲೆಕ್ಕವೇನೆ ? ||
ನಮ್ಮ ಮಗಳೆ ಬಂಗಾರ, ಅರಗಿಲ್ಲದ ಅರಗಿಣಿಗೆ ಮೇಲು ಬಂಗಾರವೇಕೆ ? |
ನಿಮ್ಮ ಮನೆಯ ಬೆಳಗುವ ಚಿನ್ನದ ಕನ್ಯಾ ಇದುವೆ ನಮ್ಮ ಗಮ್ಮತ್ತು ||

-----------------------------------------------------------------


6. %%%%  ಗಂಡಿನವರು ಜರೆದದ್ದು :
ನಿಮ್ಮ ಮಗಳ ರೂಪವ ನೋಡಿರೆ ಮೂರು ಲೋಕದಲ್ಲೂ ಕಾಣದ ಚೆಲುವೆ |
ಮೋಸಹೋದನಲ್ಲೆ ನಮ್ಮ ಮಗ ಅವಳ ಪಕ್ಕ ಕುಳಿತವಳ ಮುಖ ನೋಡಿ |
ತರಗ ಎಳೆಯುವ ಜಾಲರಿ ಹಲ್ಲು, ಬಿಲ್ಲನು ನಾಚಿಸುವ ಗೂನು ಬೆನ್ನು |
ಕನ್ನಡದ 'ಡ' ತೋರಿಸುವ ಚಪ್ಪಟ್ಟೆ ಮೂಗು, ಕಿವಿಯವರೆಗೂ ಬಾಯಿ |
ವಿದ್ಯಾವಂತಳೆಂದು ಹೇಳಿದಿರಲ್ಲ ಎರಡು ಸೊನ್ನೆಯ ಮುಂದೆ ಒಂದಂ-
ಕೆಯ ಬರೆದು ನೂರು ಎಂದಳಲ್ಲ, ಜಾಣೆ ನಿಮ್ಮ ಮುದ್ದಿನ ಮಗಳು |

&&&& ಹೆಣ್ಣಿನವರ ಉತ್ತರ :
ತನ್ನ ರೂಪಕೆ ಅನುರೂಪದ ಬಾಲೆ ಎಂದನಲ್ಲೆ ನಿಮ್ಮ ಚೆಲುವ ಚೆನ್ನಿಗರಾಯ |
ನಮ್ಮ ಮಗಳ ಚೆಲುವಿಗಿಂತ ನಿಮ್ಮ ಮಗನ ಚೆಲುವೇ ಮೇಲೆಂದು ಸಾರಿದರು ಎಲ್ಲಾ |
ನಿಮ್ಮ ಕಂದನ ಸೊಟ್ಟ ಮೆರುಗನರಿಯದೆ ಬರಿದೆ ನಮ್ಮ ಕುವರಿಯ ಓರೆಯ ಕಂಡಿರೇನೆ |
ವರನಿಗೆ ತಕ್ಕ ವಾರಿಗೆ ನಮ್ಮ ಚೆನ್ನೆ, ಕಬ್ಬು ಡೊಂಕಾದರೆ ಸವಿ ಡೊಂಕಲ್ಲ ಕಾಣೆ |
ಬಳೆಯನಿಟ್ಟಮೇಲೆ ಕೈಕೊಡವಿದರೆ ವರಿಸಿದ ಬಂಧನ ದೂರ ಸರಿದೀತೇನೆ |
ತೊಟ್ಟ ಒಡವೆಯ ಒರೆಯನೆಣಿಸದೆ ಕೊಟ್ಟ ಸುಖವನರಸಿ ಅರಸಾಗು ಎನ್ನೆ ಮಗನಿಗೆ 
----------------------------------------------------------------------------

7. %%%% ಗಂಡಿನವರು ಜರೆದದ್ದು :
ನೋಡಿರಣ್ಣ ಹೇಗಿದೆ ಭೀಗರಣ್ಣನ ಜೋಡಿ ಭೀಗಿತಿಯ ಕೂಡಿ ಕೂಡಿ |
ಮದುವೆ ಚಪ್ಪರದಲ್ಲೆಲ್ಲಾ ಹಳೆಜೋಡಿಯ ದರ್ಭಾರ ಭಲೇ ಅಬ್ಬರ ||
ಭೀಗರಣ್ಣನ ಹಾರಿದ ಹುಬ್ಬಿಗೆ ಭೀಗಿತಿ ಕುಣಿಸಿದಳು ತನ್ನ ಹುಟ್ಟುಮೀಸೆ |
ಭೀಗಿತಿಯ ಕಣ್ಣ ಸನ್ನೆಗೆ ತಣ್ಣಗಾಯಿತು ಭೀಗರಣ್ಣನ ಬಾಯಿ ಕಹಳೆ |
ಭೀಗಿತಿಯ ಕೈ ಕೈ ತಾಳ ಭೀಗರಣ್ಣನ ತೈ ತೈ ಕುಣಿತ, ಹೆಂಡತಿ ಕೈಯ ಗಂಡ |
ಗಮ್ಮತ್ತಿನ ನೆಂಟಸ್ತಿಕೆಯ ಮಾಡಿದೆವಲ್ಲಾ ನಾವು, ನಮಗೆ ಬೇಕು ದಂಡ ||

&&&& ಹೆಣ್ಣಿನವರ ಉತ್ತರ :
ಮಕ್ಕಳ ಮದುವೆಯಾದರೆ ನಾವು ಹಳೆ ಮುದುಕರೇನೆ |
ಮುದುಡಿ ಮೂಲೆ ಸೇರಬೇಕೇನೆ ||
ಹಣ್ಣಾಗುವ ಎಲೆಯಲ್ಲ ನಾವು ನಿತ್ಯಹರಿಧ್ವರ್ಣ |
ಎಳೆಯ ಚಿಗುರಿಗೆ ತಂಪಿನ ಆಸರೆ |
ಕೂಡಿ ನಲಿಯುವ ಮಾದರಿ ಜೋಡಿ ನಂಜಲ್ಲ ನೋಡಿ |
ಮದುವೆ ಮಕ್ಕಳಿಗೆ ನಮ್ಮದೇ ಮೋಡಿ 
----------------------------------------------------------------------------------
8. %%%% ಗಂಡಿನವರು ಜರೆದದ್ದು :
ಗಂಡಿನವರು ನಾವು ಕೇಳಲೆಂದು ಸಿ.ಡಿ. ಹಾಕಿ ಮೈಕ್ ಸೆಟ್ ಸಾರಿದಿರಲ್ಲಾ |
ಹೆಣ್ಣಿನ ಪಾಳೆಯದಲಿ ಹಾಡಿನ ಕಲೆಯ ಹೆಂಗಸರಿಲ್ಲ ||
ಹಾಡು ಬರೋದಿಲ್ಲ ಸೇಡಿ ಬರೋದಿಲ್ಲ ನಾವೈದೇವಕ್ಕ ದುರ್ದುಂಡೇರು |
ಎಂದು ಬೀಗುವಿರಲ್ಲ ಫ್ಯಾಶನ್ನಿನ ಲೇಡಿಯರೇ ಎಲ್ಲ ||
ಎದುರುಗೊಂಬುವ ಹಾಡಿನ ಬದಲಿಗೆ 'ವಿರಹಾ ನೂರು ನೂರು ತರಹ' ಎಂಬುದೇನೆ |
ನಮ್ಮ ವರನಿಗೆ ವರಹವ ನೀಡುವ ಸೊಲ್ಲ ಉಸುರಿದವರಿಲ್ಲ ||
&&&& ಹೆಣ್ಣಿನವರ ಉತ್ತರ :
ಗಂಡಿನ ದಿಬ್ಬಣದಲಿ ಶಾಸ್ತ್ರದ ಹಾಡು ಸವಿಯುವ ರಸಿಕರೇ ಸೊನ್ನೆ |
ರಾಗವೆಂದರೆ ಸೊಳ್ಳೆರಾಗವೆಂದು ಸಸಾರಗೈಯುವ ಶೂನ್ಯರೆ ಎಲ್ಲ ||
ಸಭೆಯಲಿ ಕೂರುವ ಗಂಡಸರೆಲ್ಲಾ ಉಪ್ಪರಿಗೆ ಹತ್ತಿಹರು ಇಸ್ಪೀಟಿಗೆ |
ಯಕ್ಕ,ರಾಜ,ರಾಣಿಯ ಎದುರು ಎದುರುಗೊಂಬುವ ಹಾಡು ಯಡವಟ್ಟು ||
ಟಾಕುಟೀಕಿನ ಹುಡುಗಿಯರು ವಾಟ್ಸ್ ಅಪ್ ಅಲೆಯಲಿ ತೇಲಾಡುವರಲ್ಲ |
ರಂಗು ರಂಗಿನ ಚಿತ್ರದ ಮುಂದೆ ಸಂಪ್ರದಾಯವೇ ವಿಚಿತ್ರ ಎಂದರಲ್ಲ ||
ಹರೆಯದ ಹುಡುಗರ ಕುಡಿನೋಟ ನಮ್ಮ ಬೆಡಗಿಯರಯತ್ತ ಕುದುರೆಯೋಟ |
ಕೋಟಲೆ ಅವರಿಗೆ ಹರಿ ಹಾಡಿನ ಪಾಠ, ಸಾಕು ನಿಮ್ಮ ದೊಂಬರಾಟ ||
---------------------------------------------------------------------------------

9. %%%% ಗಂಡಿನವರು ಜರೆದದ್ದು :
ಕೇಳು ಬಾರೆ ಅತ್ತಿಗೆ ಆಲಿಸು ಬಾರೋ ಅಣ್ಣಯ್ಯ ನೆಂಟರ ಮನೆ ಸುದ್ದಿ |
ಹುಣ್ಣಿಮೆ ಬೆಳಕಿನ ತಂಪನು ಮರೆಸುವ ಹೊಸ ಬೀಗರ ನಯ ತಳುಕಿನ ಬುದ್ಧಿ ||
ಬೀಗರೇ ಬಂಗಾರ ಬೀಗಿತಿಯೆ ಬಂಗಾರ ಒಡವೆಯ ಕವಚವೆ ಮೈತುಂಬಾ |
ಒಳಗೆಲ್ಲಾ ಅಳುಕು ಮೇಲೆ ಬಂಗಾರದ ತಳುಕು ಮುಖ ಹೊಳಪೋ ಹೊಳಪು ||
ಮಗಳ ಬಳುವಳಿ ಕೇಳಿ ಕಬ್ಬಿಣದ ಪಾತ್ರೆ - ಪಗಡೆ ಲಾರೀ ತುಂಬಾ |
ಮಗಳ ಕೊರಳಿಗೆ ಕಬ್ಬಿಣದ ಸರಿಗೆಯಲ್ಲಿ ದೃಷ್ಟಿ - ತಾಯಿತದ ಮೆಹರ್ಬಾನು ||
ತನ್ನ ಬಾಲೆಯ ಬಣ್ಣವೇ ಬಂಗಾರ ಹಲ್ಲುಗಳೇ ಬೆಳ್ಳಿಯ ಸೆಟ್ಟು |
ಎಂದು ತುಪ್ಪವ ಸುರಿಸಿ ಬೀಗರು ಕುಣಿಸಿದರು ಮುತ್ತ ಸುರವಿದ ಮೀಸೆಯ ||

&&&& ಹೆಣ್ಣಿನವರ ಉತ್ತರ :
ಕ್ವಿಂಟಾಲ್ ಮೂಟೆಯ ಬಂಗಾರದ ನೆಂಟರೆಂದು ಮರುಳಾದಿರಿ ನಮಗೆ ಮಗಳಿಗಲ್ಲ |
ಬಾಲೆಯ ನೋಡದೆ ವರನ ಚಪ್ಪರಕೆ ತಂದಿರಲ್ಲ ಒಡವೆಯೇ ನಿಮಗೆ ವಧುವಾಯ್ತೇ ||
ನೆಂಟರೆ ಕೇಳಿ ನಮ್ಮ ಹೊಳಪಿನ ಬಂಗಾರ ಸಂತೆ ಪೇಟೆಯ ನಕಲಿ ಬಂಗಾರ |
ಕಳ್ಳರ ಭಯದಿಂದೆ ಕ್ವಿಂಟಾಲ್ ಒಡವೆಯ ಬ್ಯಾಂಕ್ ಲಾಕರಿಗಿಟ್ಟೆವು ಗುಟ್ಟೇನು ||
ಮಗಳ ತೂಕದ ಚಿನ್ನದೊಡವೆಯ ಭಂಡಾರ ಘಟ್ಟಿ ಲಾಕರಿನಲ್ಲಿದೆ ಆಲೋಕ |
ಸೊಸೆಯ ಕೊರಳ ಕೊಳವೆಯಲ್ಲಿಟ್ಟೆವು ಲಾಕರ್ ಕೀಯನು ತಾಯಿತವಲ್ಲ, ಜೋಪಾನ||
------------------------------------------------------------------------

10. %%%% ಗಂಡಿನವರು ಜರೆದದ್ದು :
ಚೂರು ಹೋಳಿಗೆ ಸೂಜಿಲಿ ತುಪ್ಪವ ಬಡಿಸಿದಳೇ ಬೀಗಿತ್ತಿ | ಹಾರ್ರ್ಯಾಡಿದಳೇ ಬೀಗಿತ್ತಿ || ಪ ||
ಬೀಗಿತ್ತಿ ಮಾಡಿದ ಸಾಸಿಮೆಯು ಕಯ್ ಕಯ್ ಕಯ್ ಕಯ್ ಆಗಿತ್ತು |
ಬೀಗಿತ್ತಿ ಮಾಡಿದ ಸಾಸಿಮೆ ಸುದ್ಧಿ ಸಾಗರದ ತನಕ ಅದೇ ಸುದ್ಧಿ | ಶಿರಸಿ ತನಕ ಅದೇ ಸುದ್ಧಿ || ೧ ||
ಬೀಗಿತ್ತಿ ಮಾಡಿದ ಹಪ್ಪಳವು | ಖರ್ಚಾಗದೆಯೇ ಉಳಿದಿತ್ತು | ಪುಟ್ಟಿ ತುಂಬಾ ತುಂಬಿತ್ತು | ಮೊದಲೇ ಕಪ್ ಕಪ್ ಆಗಿತ್ತು | ಬೀಗಿತ್ತಿ ಮಾಡಿದ ಹಪ್ಪಳದ ಸುದ್ಧಿ ಎಲ್ಲೀ ನೋಡಿದರಲ್ ಸುದ್ಧಿ || ೨ ||
ಬೀಗಿತ್ತಿ ಮಾಡಿದ ಉಪ್ಪಿನಕಾಯಿ ಹಳಸೀ ಅಲ್ಲೇ ಮುಗ್ಗಿತ್ತು |
ಪಾತ್ರೆ ತುಂಬಾ ಒದಗಿತ್ತು | ಇಂಥಾ ಚತುರೆ ಬೀಗಿತ್ತಿ ಸುದ್ಧಿ ಯಾವಾಗ್ಲೂ ಹೇಳ್ತಾ ಇರಬೇಕು | ಇವರತ್ರ ಕಲಿಬೇಕು || ೩ ||

A ). &&&& ಹೆಣ್ಣಿನವರ ಉತ್ತರ ;

ಬೋಡು ಬಾಯಿಗೆ ಅಣೆದೀತೆಂದು ಅಣಿಮಾಡಿದ ಹೋಳಿಗೆ ಚೂರಾ |
ಚೂರು ಹೋಳಿಗೆಯೆಂದು ಅಣುಕಿಸಿ ಚಪ್ಪರಿಸುವುದ ಬಿಟ್ಟಿರೇನೆ ||
ಸಾಸಿಮೆ ಹಪ್ಪಳ ಉಪ್ಪಿನಕಾಯಿ ಮೀರಿ ತಿಂದರೆ ಆಗುವುದೇನೆ |
ಒಗಡಿಕೆಯ (ವಗಚಟ್ಟಿದ)  ನಾಲಿಗೆ ಹಾಲುಂಡರೂ ರುಚಿ ಕಾಣದು ಸುಳ್ಳೇನೆ ||
ಊಟಬಲ್ಲವರಿಗೆ ರುಚಿಯೆಲ್ಲಾ  ಉಂಡು ಜರೆವರಿಗೆ ಹುಳಿಯೆಲ್ಲಾ |
ಮುಗ್ಗಿದ ನಾಲಿಗೆಯಲಿ ಸವಿನೋಡಿದ ನಿಮ್ಮ ಹಿಗ್ಗು ಬಲು ಅಗ್ಗ ||

B ).  &&&& ಹೆಣ್ಣಿನವರ ಉತ್ತರ :
ನೆಂಟರ ಮನೆ ಸುದ್ಧಿ ಬಂದ್ಕೇಳು ಅಜ್ಜಮ್ಮ |
ಹತ್ತು ಬಾಗಿಲಿಗೂ ಕದ ಒಂದು | ಕದವೊಂದು ಕೀಲೆರಡು |
ನೆಂಟರ ಮನೆ ಸುದ್ಧಿ ಶುಭನವ || ಪ ||
ದಬ್ಬಣಧಾರೆ ತುಪ್ಪ ಇಬ್ಬರಿಂದ್ಹೋಳಿಗೆ | ಬಗ್ಗಿ ಬಗ್ಗಿ ತುಪ್ಪ ಎರೆವಳು |
ಎರೆವಾಗ ಯಜಮಾನನ ಹುಬ್ಬು ಹಾರಿದಾವೆ ಗಗನಾಕೆ || ೧ ||
ಆಚೆ ಪಂಕ್ತಿಗೆ ದೊನ್ನೆ ಈಚೆ ಪಂಕ್ತಿಗೆ ದೊನ್ನೆ | ನಮ್ಮ ಪಂಕ್ತಿಗೆ ಕೈಯ ಸನ್ನೆ |
ಕೈಸನ್ನೆ ಬೀಗರ ಡಮಕ ಕೇಳಿದರೆ ಶಿವ ಬಲ್ಲ || ೨ ||
ಹೋಳಿಗೆ ಪುಟ್ಟಿಗೆ ಯಜಮಾನನ ಕಾವಲು | ಮನೆ ಅಳಿಯ ಎಂಬ ತಳವಾರ |
ತಳವಾರ, ಬೀಗರ ಸುದ್ಧಿ ಇನ್ನೇನ ಹೊಗಳಾಲಿ || ೩ ||
ಒಂದಕ್ಕಿ ಬೆಂದರೆ ಒಂದಕ್ಕಿ ಬೇಯಲಿಲ್ಲ | ನಂದಿಯ ಸವುದಿ ಉರಿಲಿಲ್ಲ |
ಉರಿಲಿಲ್ಲ ತಂಗ್ಯವ್ವ ಹೊಟಗಚ್ಚು ನಮಗೆ ಹಿರಿದಾದ || ೪ ||
ಆನೆ ಆನೆ ತೂಕ ಆನೆ ಸರಪಳಿ ತೂಕ | ಬೀಗ ಬೀಗಿತ್ತಿ ಸಮತೂಕ |
ಸಮತೂಕ ಇಂಥಾ ನೆಂಟು ಸಿಕ್ಕಿತು ಶಿವನ ಕೃಪೆಯಿಂದ || ೫ ||

ವಿ. ಸೂ : ಬೀಗ, ಬೀಗಿತ್ತಿ ಸಪುರ ಇದ್ದರೆ " ಮೇಕೆ ಮೇಕೆಯ ತೂಕ ಮೇಕೆ ಹಂಗಡ ತೂಕ " ಎಂದು ಹೇಳಿಕೊಳ್ಳಬೇಕು.


ಪ್ರಸ್ತುತಿ : ಎಂ. ಗಣಪತಿ ಕಾನುಗೋಡು.

---------------------------------------------------------

{ ಭಾಗ --- 2 }

%%%% ಗಂಡಿನವರು ಜರೆದಿದ್ದು :
ಪಟ್ಟೆ ಹಚ್ಚಡಗಳಿಲ್ಲ ಮಾವಯ್ಯಗೆ ಮುತ್ತಿನುಂಗುರವೇ ಇಲ್ಲ ಮುತ್ತಿನುಂಗುರವೇ ಇಲ್ಲ | ಬೆಳ್ಳಿಯ ತಾಳಿ ತಂಬಿಗೆ ಕೊಡಲಿಲ್ಲ ಪುತ್ರಿ ಮುಂದಕೆ ಮಾಡಿ ಧಾರೆ ಎರೆದಿರಲ್ಲಾ | ಬೆರಗಾದಿರೇನೆ ನೀವು ಬಂಗಾರಕ್ಕೆ ಮರುಳಾದಿರೇನೆ ನೀವು ಬಂಗಾರಕ್ಕೆ ಮರುಳಾದಿರೇನೆ ನೀವು ||
ಸಾಲಿ ಹಚ್ಚಡಗಳಿಲ್ಲ ಮಾವಯ್ಯಗೆ ನೀಲದುಂಗುರವೇ ಇಲ್ಲ ಮಾವಯ್ಯಗೆ ನೀಲದುಂಗುರವೇ ಇಲ್ಲ | ಚೆಲುವಾದ ತಾಳಿ ತಂಬಿಗೆ ಕೊಡಲಿಲ್ಲ ಬಾಲೆ ಮುಂದಕೆ ಮಾಡಿ ಧಾರೆ ಎರೆದಿರಲ್ಲಾ | ಬೆರಗಾದಿರೇನೆ ನೀವು ಬಂಗಾರಕ್ಕೆ ಮರುಳಾದಿರೇನೆ ನೀವು ಬಂಗಾರಕ್ಕೆ ಮರುಳಾದಿರೇನೆ ನೀವು ||
ಬಣ್ಣದಚ್ಚಡವಿಲ್ಲ ಮಾವಯ್ಯಗೆ ಹರಳಿನುಂಗುರವೇ ಇಲ್ಲ ಹರಳಿನುಂಗುರವೇ ಇಲ್ಲ | ಚೆಲುವಾದ ತಾಳಿ ತಂಬಿಗೆ ಕೊಡಲಿಲ್ಲ ಬಾಲೆ ಮುಂದಕೆ ಮಾಡಿ ಧಾರೆ ಎರೆದಿರಲ್ಲಾ | ಬೆರೆಗಾದಿರೇನೆ ನೀವು ಬಂಗಾರಕ್ಕೆ ಮರುಳಾದಿರೇನೆ ನೀವು ಬಂಗಾರಕ್ಕೆ ಮರುಳಾದಿರೇನೆ ನೀವು ||
&&&& ಹೆಣ್ಣಿನವರ ಉತ್ತರ :
ಪಟ್ಟೆಹಚ್ಚಡವೇತಕೆ ಮಾವಯ್ಯಗೆ ಮುತ್ತಿನುಂಗುರವೇತಕೆ ಮಾವಯ್ಯಗೆ ಮುತ್ತಿನುಂಗುರವೇತಕೆ | ಬೆಳ್ಳಿಯ ತಾಳಿ ತಂಬಿಗೆಯೇತಕೆ ಅದಕ್ಕಿಂತ ಮಿಗಿಲಾದ ಮಗಳ ಕೊಟ್ಟಮೇಲೆ | ಬೆರಗಾಗ್ವರಲ್ಲ ನಾವು ಬಂಗಾರಕೆ ಮರುಳಾಗ್ವರಲ್ಲ ನಾವು ಬಂಗಾರಕೆ ಮರುಳಾಗ್ವರಲ್ಲ ನಾವು ||
ಸಾಲಿ ಹಚ್ಚಡವೇತಕೆ ಅಣ್ಣಯ್ಯಗೆ ನೀಲದುಂಗುರವೇತಕೆ ಅಣ್ಣಯ್ಯಗೆ ನೀಲದುಂಗುರವೇತಕೆ | ಚೆಂದದ ತಾಳಿ ತಂಬಿಗೆಯೇತಕೆ ಅದಕ್ಕಿಂತ ಮಿಗಿಲಾದ ಹೆಣ್ಣು ಕೊಟ್ಟಮೇಲೆ | ಬೆರಗಾಗ್ವರಲ್ಲ ನಾವು ಬಂಗಾರಕೆ ಮರುಳಾಗ್ವರಲ್ಲ ನಾವು ಬಂಗಾರಕೆ ಮರುಳಾಗ್ವರಲ್ಲ ನಾವು ||
ಬಣ್ಣದಚ್ಚಡವೇತಕೆ ಅಣ್ಣಯ್ಯಗೆ ಚಿನ್ನದುಂಗುರವೇತಕೆ ಅಣ್ಣಯ್ಯಗೆ ಚಿನ್ನದುಂಗುರವೇತಕೆ | ಚೆಲುವಾದ ತಾಳಿ ತಂಬಿಗೆಯೇತಕೆ ಅದಕ್ಕಿಂತ ಮಿಗಿಲಾದ ಅನುಜೆ ಕೊಟ್ಟಮೇಲೆ | ಬೆರಗಾಗ್ವರಲ್ಲ ನಾವು ಬಂಗಾರಕೆ ಮರುಳಾಗ್ವರಲ್ಲ ನಾವು ಬಂಗಾರಕೆ ಮರುಳಾಗ್ವರಲ್ಲ ನಾವು ||
%%%% ಗಂಡಿನವರು ಜರೆದದ್ದು :
ಪಟ್ಟೆಯ ಸೆರಗೀಗೆ ಪುತ್ರಿಯ ಜಾತಕ ಕಟ್ಟಿ ಹತ್ತೆಂಟೂರಾ ತಿರುಗಾಡಿ | ತಿರುಗಾಡಿ ಬಂದನು ಮಗಳಿಗೊಂದ್ವರವೂ ಸಿಗಲಿಲ್ಲ ||
ಸಾಲಿಯ ಸೆರಗೀಗೆ ಮಗಳ ಜಾತಕ ಕಟ್ಟಿ ಆರೇಳೂರಾ ತಿರುಗಾಡಿ | ತಿರುಗಾಡಿ ಬಂದನು ಮಗಳಿಗೊಂದ್ವರವೂ ಸಿಗಲಿಲ್ಲ ||
ಬಣ್ಣದ ಸೆರಗೀಗೆ ಮಗಳ ಜಾತಕ ಕಟ್ಟಿ ಊರೂರನೆಲ್ಲಾ ತಿರುಗಾಡಿ | ತಿರುಗಾಡಿ ಬಂದರೂ ಬಾಲೆಗೊಂದ್ವರವೂ ಸಿಗಲಿಲ್ಲಾ ||
&&&& ಹೆಣ್ಣಿನವರ ಉತ್ತರ :
ಹೊಸ್ತಿಲವನಿಳಿದರೆ ಹತ್ತೆಂಟು ವರವುಂಟು ಈಗ ಈ ಸಂಬಂಧ ಬಿಡಬಾರ | ಬಿಡಬಾರದೆಂದ್ ಹೇಳಿ ಹೇಳ್ಕಳ್ಸಿ ಧಾರೆ ಎರೆದೇವು ||
ಬಾಗಿಲನ್ನಿಳಿದರೆ ಬಹಳಷ್ಟು ವರವುಂಟು ಆದರೂ ಈ ಸಂಬಂಧ ಬಿಡಬಾರ | ಬಿಡಬಾರದೆಂದ್ ಹೇಳಿ ಹೇಳ್ಕಳ್ಸಿ ಧಾರೆ ಎರೆದೇವು ||
ಅಂಗಳವ ದಾಟಿದರೆ ಬೇಕಷ್ಟು ವರವಿತ್ತು ಇಂಥಾ ಸಂಬಂಧ ಬಿಡಬಾರ | ಬಿಡಬಾರದೆಂದ್ ಹೇಳಿ ಹೇಳ್ಕಳ್ಸಿ ಧಾರೆ ಎರೆದೇವು ||
%%%% ಗಂಡಿನವರು ಜರೆದಿದ್ದು :
ಪುತ್ರಿಗೆ ಮೂವತ್ತು ವರುಷ ನಾಳಿನ ಆಷಾಡಕ್ಕಾಯಿತಲ್ಲಾ | ಇನ್ನೂ ತನ್ನ ಮಗಳಿಗೆ ವರವಿಲ್ಲವೆಂದು ಯೋಚಿಸಿ ಯೋಚಿಸಿ ಮಾವಯ್ಯ ಬಳಲಿದ್ದ | ಚಿಂತೆ ಪರಿಹಾರವಾಯಿತೋ ಮಾವಯ್ಯ ನಿಮಗೆ ಸಂತೋಷ ಸ್ಥಿರವಾಯಿತೋ ಅತ್ತೆಮ್ಮ ನಿಮಗೆ ಸಂತೋಷ ಸ್ಥಿರವಾಯಿತೋ | ಅಂಥಿಂಥ ವರವಲ್ಲ ಅರಗಿಳಿಯಂಥ ಅಳಿಯ ಮಂಟಪದೊಳಗೆ ಮಗಳ ಕೈ ಹಿಡಿದನು ಚಿಂತೆ ಪರಿಹಾರವಾಯಿತೋ ಮಾವಯ್ಯ ನಿಮಗೆ ಸಂತೋಷ ಘನವಾಯಿತೋ ಅತ್ತೆಮ್ಮ ನಿಮಗೆ ಸಂತೋಷ ಸ್ಥಿರವಾಯಿತೋ ||
ಮಗಳಿಗೆ ಮೂವತ್ತು ಮೀರಿತು ಮುಂದಿನ ಜೇಷ್ಟಮಾಸಕೆ ಬಿಡದೆ | ಇನ್ನು ತನ್ನ ಮಗಳಿಗೆ ವರವಿಲ್ಲವೆಂದು ಚಿಂತಿಸಿ ಚಿಂತಿಸಿ ಮಾವಯ್ಯ ಬಳಲಿದ್ದ | ಚಿಂತೆ ಪರಿಹಾರವಾಯಿತೋ ಮಾವಯ್ಯ ನಿಮಗೆ ಸಂತೋಷ ಘನವಾಯಿತೋ ಅತ್ತೆಮ್ಮ ನಿಮಗೆ ಸಂತೋಷ ಸಂತೋಷ ಸ್ಥಿರವಾಯಿತೋ | ಅಂತಿಂಥ ವರವಲ್ಲ ಅರಗಿಳಿಯಂಥ ಅಳಿಯ ಮಂಟಪದೊಳಗೆ ಮಗಳ ಕೈ ಹಿಡಿದನು | ಸಂತೋಷ ಘನವಾಯಿತೋ ಮಾವಯ್ಯ ನಿಮಗೆ ಚಿಂತೆ ಪರಿಹಾರವಾಯಿತೋ ಅತ್ತೆಮ್ಮ ನಿಮಗೆ ಸಂತೋಷ ಸ್ಥಿರವಾಯಿತೋ ||
ಮಗಳಿಗೆ ಮೂವತ್ತು ಹಾರಿತು ಮುಂದಿನ ಶ್ರಾವಣಮಾಸಕೆ ಬಿಡದೆ | ಇನ್ನು ತನ್ನ ಮಗಳಿಗೆ ಪತಿ ಇಲ್ಲವೆಂದು ಚಿಂತಿಸಿ ಚಿಂತಿಸಿ ಮಾವಯ್ಯ ಬಳಲಿದ್ದ | ಚಿಂತೆ ಪರಿಹಾರವಾಯಿತೋ ಮಾವಯ್ಯ ನಿಮಗೆ ಸಂತೋಷ ಘನವಾಯಿತೋ ಅತ್ತೆಮ್ಮ ನಿಮಗೆ ಸಂತೋಷ ಸ್ಥಿರವಾಯಿತೋ | ಅಂತಿಂಥ ವರವಲ್ಲ ಅರಗಿಳಿಯಂಥ ಅಳಿಯ ಮಂಟಪದೊಳಗೆ ಮಗಳ ಕೈಹಿಡಿದನು | ಸಂತೋಷ ಸ್ಥಿರವಾಯಿತೋ ಮಾವಯ್ಯ ನಿಮಗೆ ಚಿಂತೆ ಪರಿಹಾರವಾಯಿತೋ ಅತ್ತೆಮ್ಮ ನಿಮಗೆ ವ್ಯಥೆಯು ಪರಿಹಾರವಾಯಿತೋ ||
&&&& ಹೆಣ್ಣಿನವರ ಉತ್ತರ :
ಮುತ್ತಿನ ಚೀಟಿ ಮೇಲೆ ಸೂಜಿ ದಾರದ ಮೇಲೆ ಓಲೆಮೇಲ್ ಓಲೆ ಕಳುಹಿದ |
ಕಳುಹಿದ ಕಾರಣದಿಂದ ಕೊಟ್ಟೆವು ನಿಮ್ಮ ಮಗನಿಗೆ ||
ಚೆಂದದ ಹಾಳೆಮೇಲೆ ಸೂಜಿದಾರದ ಮೇಲೆ ಪತ್ರದ ಮೇಲ್ ಪತ್ರ ಕಳುಹಿದ |
ಕಳುಹಿದ ಕಾರಣದಿಂದ ಕೊಟೆವು ನಿಮ್ಮ ಮಗನಿಗೆ ||
ಎಷ್ಟು ಹೇಳಿದರಿವನ ಚೆಂದ ಹೆಚ್ಚಾಯಿತು ಎಂದು ಮೆಚ್ಚಿಗೆಯಿಂದ ಕೊಡಲಿಲ್ಲ |
ಕೊಡಲಿಲ್ಲ ಮುದ್ದಿನ ಮಗಳ ಬೇಕೆಂದೇ ಧಾರೆ ಎರೆದೇವು ||
%%%% ಗಂಡಿನವರು ಬೀಗಿತಿಯನ್ನು ಜರೆದದ್ದು :
ನೆಂಟರು ಬರುತಾರೆಂದು ಮಂಟಪ ಗುಡಿಸಲ್ಹೋಗಿ ಸೊಂಟುಳುಕಿ ಅಲ್ಲೇ ಕುಳಿತಾಳು | ಕುಳಿತ ಬೀಗಿತ್ತಿಗೆ ದಂಟ್ಕೋಲ ಕೊಟ್ಟು ಕರೆತನ್ನಿ ||
ಬೀಗರು ಬರಿತಾರೆಂದು ಬೀದಿ ಗುಡಿಸಲ್ಹೋಗಿ ಕಾಲುಳುಕಿ ಅಲ್ಲೇ ಕುಳಿತಾಳು | ಕುಳಿತ ಬೀಗಿತ್ತಿಗೆ ಊರ್ಗೋಲ ಕೊಟ್ಟು ಕರೆತನ್ನಿ ||
ಅತಿಥಿಗಳು ಬರುತಾರೆಂದು ಅಂಗಳ ಗುಡಿಸಲ್ಹೋಗಿ ಬೆನ್ನುಳುಕಿ ಅಲ್ಲೇ ಕುಳಿತಾಳು |
ಕುಳಿತ ಬೀಗಿತ್ತಿಯ ಹಿಡಿದೆತ್ತಿ ಒಳಗೆ ಕರೆತನ್ನಿ ||
%%%% ಗಂಡಿನವರು ಬೀಗಿತಿಯನ್ನು ಜರೆದಿದ್ದು :
ಮಿತ್ರೆ ತಾನುಟ್ಟಿದ್ದು ಎಪ್ಪತ್ತು ಗಂಟಿನ ಸೀರೆ | ನಸುನಾಚಿ ಹೊರಗೆ ಬರಲೊಲ್ಲ |
ಬರಲೊಲ್ಲ ನಾವ್ ತಂದ ಪಟ್ಟೇ ಕೊಡುತೇವೆ ಬರಹೇಳಿ ||
ನಾರಿ ಬೀಗಿತಿ ತಾನು ಅರವತ್ ಗಂಟಿನ ಸೀರೆ | ಉಟ್ಟಾಗ ಹೊರಗೆ ಬರಲೊಲ್ಲ |
ಬರಲೊಲ್ಲ ನಾವ್ ತಂದ ಸಾಲಿ ಕೊಡುತೇವೆ ಬರಹೇಳು ||
ರಂಭೆ ಬೀಗಿತಿ ತಾನು ಹರಕು ಸೀರೆಯನುಟ್ಟು | ಬೀಗರಿಗೆ ನಾಚಿ ಬರಲೊಲ್ಲ |
ಬರಲೊಲ್ಲ ನಾವ್ ತಂದ ಬಣ್ಣಾ ಕೊಡುತೇವೆ ಬರಹೇಳು ||
ವಿ.ಸೂ : ಪಟ್ಟೇ, ಸಾಲಿ, ಬಣ್ಣಾ ಇವುಗಳು ಹಿಂದಿನ ಕಾಲದಲ್ಲಿ ಬಹಳ ಒಳ್ಳೆಯ ಜಾತಿಯ ಸೀರೆಗಳ ಹೆಸರು.
&&&& ಹೆಣ್ಣಿನವರ ಉತ್ತರ :
ಉಪ್ಪರಿಗೆ ಒಳವಿಕ್ಕೇ [ ಒಳದಿಕ್ಕೇ ] ಹತ್ತು ಸುತ್ತಿನ ಕೋಟೆ | ಮಿತ್ರೆ ಬೀಗಿತ್ತಿಯ ಒಳಕೂಡಿ |
ಒಳಕೂಡಿ ಬೀಗವನ್ಹಾಕಿ ಪಟ್ಟೆ ಕೊಟ್ಟ ನಾಕ [ ತನಕ ] ಬಿಡಬೇಡಿ ||
ಅಂದರದ ಒಳವಿಕ್ಕೇ ಆರುಸುತ್ತಿನ ಕೋಟೆ | ನಾರಿ ಬೀಗಿತ್ತಿಯ ಒಳಕೂಡಿ ||
ಒಳಕೂಡಿ ಬೀಗವನ್ಹಾಕಿ ಸಾಲಿ ಕೊಟ್ಟ ನಾಕ ಬಿಡಬೇಡಿ ||
ಅಂಕಣದ ಒಳವಿಕ್ಕೇ ಸುತ್ತುಸುತ್ತಿನ ಕೋಟೆ | ನಾರಿ ಬೀಗಿತ್ತಿಯ ಒಳಕೂಡಿ |
ಒಳಕೂಡಿ ಬಾಗಿಲ ಹಾಕಿ ಬಣ್ಣ ಕೊಟ್ಟ ನಾಕ ಬಿಡಬೇಡಿ ||
ವಿ. ಸೂ : ಅಂದರ = ಜಗುಲಿ [ veranda ]. ನಾಕ = ತನಕ. ಒಳವಿಕ್ಕೇ [ ಒಳದಿಕ್ಕೇ ].
[ ಇಲ್ಲಿ ಎಪ್ಪತ್ತು, ಅರವತ್ ಗಂಟಿನ ಸೀರೆ ಎಂದರೆ ಬೀಗಿತಿಗೆ ಉಡಲು ಸರಿಯಾದ ಸೀರೆಯಿಲ್ಲದೆ ಹರಕು ಸೀರೆಯನ್ನೇ ಅಷ್ಟು ಗಂಟುಗಳನ್ನು ಹಾಕಿಕೊಂಡು ಉಟ್ಟಿದ್ದಾಳೆ ಎಂದು ಜರೆಯುವುದು ].
%%%% ಗಂಡಿನವರು ಜರೆದದ್ದು :
ಹತ್ತು ಮಂದಿಯ ಒಳಗೆ ತಾಯವ್ವಗೆ | ಚೊಚ್ಚಲ ಮಗನಿವನು |
ಮತ್ತೆ ಇವರ್ ಮನೆ ಹೆಣ್ಣು ತರಲಾಗ ಎಂದರೆ | ಬ್ರಹ್ಮ ಸಂಕಲ್ಪವು ತಪ್ಪಲೇ ಇಲ್ಲ |
ಬ್ರಹ್ಮ ಬರೆದನಲ್ಲ | ಇದು ಈಗ ನಮ್ಮ ಮನಸು ಇಲ್ಲ || ೧ ||
ಆರು ಮಂದಿಯ ಒಳಗೆ ತಾಯವ್ವಗೆ | ಮೋಹದ ಮಗನಿವನು | ಈಗ ಇವರ್ ಮನೆ ಹೆಣ್ಣು ತರಲಾಗ ಎಂದರೆ ಬ್ರಹ್ಮ ಸಂಕಲ್ಪವು ತಪ್ಪಲೇ ಇಲ್ಲ | ಬ್ರಹ್ಮ ಬರೆದನಲ್ಲ | ಇದು ಈಗ ನಮ್ಮ ಮನಸು ಇಲ್ಲ || ೨ ||
&&&& ಹೆಣ್ಣಿನವರ ಉತ್ತರ :
ಇಪ್ಪತ್ತು ವರುಷವ ನೋಡೆ | ಎರಡಾಳುದ್ದವ ನೋಡೆ | ಅತ್ತೆಗಿಂತ ಅಳಿಯ ಹಿರಿದಾದ | ಹಿರಿದಾದ ತಮ್ಮಯ್ಯ | ಎಲ್ಲಿ ದೊರಕಿದನೋ ಮಗಳಿಗೆ || ೧ ||
ಮೂವತ್ತು ವರುಷವ ನೋಡೆ | ಮೂರಾಳುದ್ದವ ನೋಡೆ |
ಮಾವನಿಂದಳಿಯ ಹಿರಿದಾದ | ಹಿರಿದಾದ ತಮ್ಮಯ್ಯ | ಎಲ್ಲಿ ದೊರಕಿದನೋ ಮಗಳಿಗೆ || ೨ ||
%%%% ಗಂಡಿನವರು ಜರೆದಿದ್ದು :
ಹಾಡನ್ನು ಹೇಳೆಂದರೆ ನಿನ್ನ ಮಗಳು | ಕತ್ತೆತ್ತಿ ನೋಡಲಿಲ್ಲ ವಿದ್ಯಾವಂತಳೆಂದು ನಾವು ತಂದೆವಲ್ಲ | ಹಾಡನ್ನು ಹೇಳದೆ ಓಡಿ ಹೋಗುವಳಲ್ಲ || ೧ ||
ಹಾಡನ್ನು ಓದು ಎಂದರೆ ನಿನ್ನ ಮಗಳು | ಮುಖವನ್ನೇ ನೋಡುವಳು | ಪುಸ್ತಕದ ಗುರುತನ್ನು ಅರಿಯದಿದ್ದವಳನ್ನು ವಿದ್ಯಾವಂತಳೆಂದು ನಾವು ತಂದೆವಲ್ಲ || ೨ ||
ಶಿಸ್ತನ್ನು ಮಾಡೆಂದರೆ ನಿನ್ನ ಮಗಳು | ಮುಖ ಎತ್ತಿ ನೋಡಲಿಲ್ಲ | ಶಿಸ್ತಿನ ಬಗೆಯನ್ನು ತಿಳಿಯದಿದ್ದವಳನ್ನು ಬುದ್ಧಿವಂತಳೆಂದು ನಾವು ತಂದೆವಲ್ಲ || ೩ ||
&&&& ಹೆಣ್ಣಿನವರ ಉತ್ತರ :
ಕಟೆ ಕಟೆ ಅತ್ತೇರು ಕಿಟಿ ಕಿಟಿ ಮಾವ್ನೋರು | ಬೆಂಕಿ ಕಿಡಿಯಂತ ಪತಿಗಳು |
ಪತಿಗಳ ಕಾಲ್ದಲ್ಲಿ ಬಾಳುವುದೇ ಕಷ್ಟ ಮನೆಯಲ್ಲಿ || ೧ ||
ಮಾವ್ನೋರು ಮಾತಾಡಿದರೆ ಸಿಂಹ ಘರ್ಜಿಸಿದಂತೆ | ಅತ್ತೇರು ಘಟಸರ್ಪ |
ಘಟಸರ್ಪನ ಕಾಲ್ದಲ್ಲಿ ಬಾಳುವುದೇ ಕಷ್ಟ ಮನೆಯಲ್ಲಿ || ೨ ||
ಅತ್ತೇರ ಕಾಲ್ದಲ್ಲಿ ಒಪ್ಪೊತ್ತೂಟವ ಬಿಟ್ಟೆ | ಮತ್ತೆ ಮನೆ ಕೆಲಸ ಬಹು ಕಷ್ಟ |
ಬಹು ಕಷ್ಟ ಮನೆಯೊಳಗೆ | ಬಾಳುವುದೇ ಕಷ್ಟ ಮನೆಯಲ್ಲಿ || ೩ ||
ಕಿಟಿ ಕಿಟಿ ಅತ್ತೇರು ಕಟೆ ಕಟೆ ಮಾವ್ನೋರು | ಸಣ್ಣ ಮೆಣಸಿನಂಥ ಪತಿಗಳು |
ಪತಿಗಳ ಕಾಲ್ದಲ್ಲಿ ಬಾಳುವುದೇ ಕಷ್ಟ ಮನೆಯಲ್ಲಿ || ೪ ||
%%%% ಗಂಡಿನವರು ಜರೆದದ್ದು :
ಉಪ್ಪರಿಗೆ ಒಳದಿಕ್ಕೆ ಹತ್ತು ಜೋಡು ಒಲೆ ಹೂಡಿ ಮಿತ್ರೆ ಅತ್ತೆಮ್ಮ ನಡು ಬೆನ್ನ | ನಡು ಬೆನ್ನ ಕಾಸುತ್ತಾ ಸಾರಿಗೆ ಉಪ್ಪ ಹಾಕಲಿಕೆ ಮರೆತಳು || ೧ ||
ಮಾಳಿಗೆ ಒಳದಿಕ್ಕೆ ಆರು ಜೋಡು ಒಲೆ ಹೂಡಿ ರಂಭೆ ಅತ್ತೆಮ್ಮ ನಡು ಬೆನ್ನ | ನಡುಬೆನ್ನ ಕಾಸುತ್ತಾ ಪಲ್ಯಕೆ ಉಪ್ಪ ಹಾಕಲಿಕೆ ಮರೆತಳು || ೨ ||
ಅಂದರದ ಒಳದಿಕ್ಕೆ ಮೂರು ಜೋಡು ಒಲೆ ಹೂಡಿ ರಾಣಿ ಅತ್ತೆಮ್ಮ ಎಡಗೈಯ್ಯ | ಎಡಗೈಯ್ಯ ಕಾಸುತ್ತಾ ಗೊಜ್ಜಿಗ್ ಉಪ್ಪ ಹಾಕಲಿಕೆ ಮರೆತಳು || ೩ ||
&&&& ಹೆಣ್ಣಿನವರ ಉತ್ತರ ;
ಸಾರಿಗ್ ಉಪ್ಪ ಹಾಕದಿದ್ರೆ ಆಶ್ಚರ್ಯವೇನೆ | ಮೇಲ್ ಉಪ್ಪ ಹಾಕ್ಕೊಂಡು ತಿನಬಾರದೇನೆ |
ಯಾರೂ ಮಾಡದಡಿಗೆಯ ನಾ ಮಾಡಿದನೇನೆ | ಉಂಡು ದೂರುವುದು ಥರವಲ್ಲ || ೧ ||
ಪಲ್ಯಕೆ ಉಪ್ಪ ಹಾಕದಿದ್ರೆ ಆಶ್ಚರ್ಯವೇನೆ | ಮೇಲ್ ಉಪ್ಪು ಹಾಕೊಂಡು ತಿನಬಾರದೇನೆ |
ಯಾರೂ ಮಾಡದ ಪಲ್ಯವ ನಾ ಮಾಡಿದನೇನೆ | ಉಂಡು ದೂರುವುದು ಥರವಲ್ಲ [ ದೂರುಗಳ್ಳೆರಾ ಮೊದಲ್ಹೋಗಿ ] || ೨ ||
%%%% ಗಂಡಿನವರು ಜರೆದದ್ದು :
ಹತ್ತು ಜೋಡು ವಾದ್ಯವ ಒಪ್ಪಕೆ ತಂದಿರುವೆವು | ಇಂದು ಬೀಗರ ಮನೆ ಸಣ್ಣ | ಮನೆ ಸಣ್ಣ ಎಂದ್ಹೇಳಿ ವಾದ್ಯ ಹಿಂದಕೆ ಕಳಿಸೇವು || ೧ ||
ಆರು ಜೋಡು ಕಹಳೆಯ ಆಯಕೆ ತಂದಿರುವೆವು | ಈಗ ಬೀಗರ ಮನೆ ಸಣ್ಣ | ಮನೆ ಸಣ್ಣ ಎಂದ್ಹೇಳಿ ಕಹಳೆ ಹಿಂದಕೆ ಕಳಿಸೇವು || ೨ ||
&&&& ಹೆಣ್ಣಿನವರ ಉತ್ತರ :
ಉದ್ದಿನ ಹಕ್ಕಲಿಗೆ ಹದ್ದು ಬಂದಿಳಿದಂತೆ | ಸದ್ದಿಲ್ಲದೆ ಬೀಗರು ಬರುತಾರೆ | ಬರುತಾರೆಂಬುದ ಕೇಳಿ ವಾದ್ಯವ ಕೊಟ್ಟು ಕರೆಸೇವು || ೧ ||
ಗೋದಿಯ ಹಕ್ಕಲಿಗೆ ಮಂಗ ಬಂದಿಳಿದಂತೆ | ಸದ್ದಿಲ್ಲದೆ ಬೀಗರು ಬರುತಾರೆ | ಬರುತಾರೆಂಬುದ ಕೇಳಿ ಕಹಳೆಯ ಕೊಟ್ಟು ಕರೆಸೇವು || ೨ ||
%%%% ಗಂಡಿನವರು ಜರೆದದ್ದು :
ಮಿತ್ರೇರು ನಾವ್ ಬರುವ ರಭಸವ ನೋಡೆ | ನಿನ್ನ ಚಪ್ಪರ ಮಂಡೆಯ ಅತ್ತಿತ್ತ ಮಾಡೆ |
ಮಿತ್ರೆ ಬೀಗಿತ್ತಿ ಇನ್ನೆಲ್ಲಡಗಿಹಳೊ | ನಾರಿಯರೇ ಹೋಗಿ ಕರೆತನ್ನಿ || ೧ ||
ನಾರಿಯರು ನಾವ್ ಬರುವ ರಭಸವ ನೋಡೆ | ನಿನ್ನ ಸೋಗೆಯ ಮಂಡೆಯ ಅತ್ತಿತ್ತ ಮಾಡೆ |
ರಂಭೆ ಬೀಗಿತ್ತಿ ಇನ್ನೆಲ್ಲಡಗಿದಳೊ | ಮಿತ್ರೆಯರೇ ಹೋಗಿ ಕರೆತನ್ನಿ || ೨ ||
&&&& ಹೆಣ್ಣಿನವರ ಉತ್ತರ :
ದಿಬ್ಬಣ ಬಂತು ನೋಡಲು ಬನ್ನಿರೇ | ಆ ಊರಾ ದಿಬ್ಬಣ ಬಂತು ನೋಡಲು ಬನ್ನಿರೇ || ಪ ||
ದಿಬ್ಬಣ ಬಂತು ನೋಡುವ ಬನ್ನಿ ಒಬ್ಬರಿಗಿಂಥ ಒಬ್ಬರು ಚೆಂದಾ | ನೋಡುವವರಿಗಾನಂದ ಕಂಬಳಿ ಕುರಿ ಹಿಂಡಿನಂತೆ |
ಕಬ್ಬಿಣ ಗದ್ದೆಲವರ ಸಂತೆ ದಿಬ್ಬಣ ಬಂತು ನೋಡುವ ಬನ್ನಿರೆ || ೧ ||
ಒಬ್ಬರಿಗಿಂಥಾ ಒಬ್ಬರು ಚೆಂದಾ ಬೆಕ್ಕಿಗಿಂತ ಬೀಗಿತಿ ಚೆಂದಾ | ಮರವನೇರಿದ ಕೋಡಗನಿಗಿಂತ ಬೀಗರೆ ಚೆಂದಾ |
ವಡ್ಡರಿಗಿಂತ ಇವರೆ ಚೆಂದ ದಿಬ್ಬಣ ಬಂತು ನೋಡುವ ಬನ್ನಿರೆ || ೨ ||
%%%% ಗಂಡಿನವರು ಜರೆದಿದ್ದು :
ಹತ್ತಕೆ ಕೊಂಡಿದ್ದಲ್ಲ | ಇಪ್ಪತ್ತಕೆ ಬೆಲೆಯಾದ್ದಲ್ಲ |ತೌಡಿಗೆ ಕೊಂಡ ಬಿದಿರ್ ಚಾಪೆ |
ಬಿದುರ್ ಚಾಪೆ ಕುರುಬರ ಜಾಡಿ | ತಂದು ಹಾಸಿದಿರಿ ಜಗುಲಿಗೆ || ೧ ||
ಆರಕೆ ಕೊಂಡಿದ್ದಲ್ಲ | ಮೂರಕೆ ಬೆಲೆಯಾದ್ದಲ್ಲ | ನುಚ್ಚಿಗೆ ಕೊಂಡ ಹರಕ್ ಚಾಪೆ |
ಹರಕ್ ಚಾಪೆ ಕುರುಬರ ಜಾಡಿ | ತಂದು ಹಾಸಿದಿರಿ ಜಗುಲಿಗೆ || ೨ ||
&&&& ಹೆಣ್ಣಿನವರ ಉತ್ತರ :
ಹತ್ತಕೆ ಕೊಂಡಿದ್ಹೌದು ಇಪ್ಪತ್ತಕೆ ಬೆಲೆಯಾದ್ಹೌದು |ನೂರಕೆ ಕೊಂಡ ಜಮಖಾನ |
ಜಮಖಾನ ಬೀಗರೇ | ತಂದು ಹಾಸಿರುವೆ ಜಗುಲಿಗೆ ||
ಆರಕೆ ಕೊಂಡಿದ್ಹೌದು ಮೂರಕೆ ಬೆಲೆಯಾದ್ಹೌದು | ಐನೂರಕೆ ಕೊಂಡ ಜಮಖಾನ |
ಜಮಖಾನ ಬೀಗರೇ | ತಂದು ಹಾಸಿರುವೆ ಜಗುಲಿಗೆ || ೨ ||
%%%% ಗಂಡಿನವರು ಜರೆದಿದ್ದು :
ವಾದ್ಯದ ಧ್ವನಿಯ ಕೇಳುತಲಿ ಓಡಿಹೋದನು ಮಾವಯ್ಯ |
ಓಡದಿರು ಅಡಗದಿರು ಬಹಳ ಮಂದಿಯು ಬರಲಿಲ್ಲ || ೧ ||
ಕಹಳೆಯ ಧ್ವನಿ ಕೇಳಿ ಹೆದರಿ ಹೋದನು ಬಾವಯ್ಯ |
ಹೆದರದಿರು ಅಂಜದಿರು ಬಹಳ ಮಂದಿಯು ಬರಲಿಲ್ಲ || ೨ ||
&&&& ಹೆಣ್ಣಿನವರ ಉತ್ತರ :
ವಾದ್ಯದ ಧ್ವನಿಯ ಕೇಳುತಲಿ ಓಡಿಬಂದನು ಅಪ್ಪಯ್ಯ |
ಹೆದರದೆ ಬೆದರದೆ ಬಹಳ ಮಂದಿಯು ಬನ್ನಿರೆಂದು || ೧ ||
ಕಹಳೆಯ ಧ್ವನಿಯ ಕೇಳುತಲಿ ಬೇಗ ಬಂದನು ಅಣ್ಣಯ್ಯ |
ಅಂಜದೆ ಅಳುಕದೆ ಬಹಳ ಮಂದಿಯು ಬನ್ನಿರೆಂದು || ೨ ||
%%%% ಗಂಡಿನವರು :
ನಾವೇನ್ ವರದಕ್ಷಿಣೆ ಕೇಳೋದಿಲ್ಲ
ನೀವೇನ್ ಸಾಲ ಮಾಡಿ ತರಬೇಕಿಲ್ಲ
ವರೋಪಚಾರ ಮಾತ್ರ ಮಾಡ್ಲೇಬೇಕು
ಕೇಳಿದ್ದೆಲ್ಲಾ ಗೌರವದಿಂದ ಕೊಟ್ರೆ ಸಾಕು || ಪ ||
ಹೊದಿಲಿಕ್ಕೊಂದು ಶಲ್ಯ ನೀವು ಕೊಡಲೇಬೇಕು
ಜರಿ ಅಂಚಿನಿಂದ ಅದು ಕೂಡಿರಲೇಬೇಕು
ಜರಿ ಅಂಚಿನ ಪೇಟ ನೀವು ಕೊಡ್ಲೇಬೇಕು
ಮಿರಿ ಮಿರಿ ಮಿರಿ ಅಂತಾ ಮಿರಗಾಬೇಕು || ೧ ||
ಪೂಜೆ ಸಂಧ್ಯಾವಂದನೆ ಎಲ್ಲಾ ಮಾಡೋದಕ್ಕೆ
ಬೆಳ್ಳಿ ತಟ್ಟೆ ಬೆಳ್ಳಿ ತಂಬಿಗೆ ಸಾಕೇಸಾಕು
ಊಟ ಕಾಫಿ ತಿಂಡಿ ಎಲ್ಲಾ ಮಾಡೋದಕ್ಕೆ
ಬೆಳ್ಳಿ ತಟ್ಟೆ ಬೆಳ್ಳಿ ಲೋಟ ಬೇಕೇಬೇಕು || ೨ ||
ಇರಲಿಕ್ಕೊಂದು ಬಂಗಲೆ ನೀವು ಕೊಡ್ಲೇಬೇಕು
ಸಕಲ ವ್ಯವಸ್ಥೆಯಿಂದ ಅದು ಕೂಡಿರಬೇಕು
ಘನತೆಗೆ ತಕ್ಕ ಮದುವೆ ಮಾತ್ರ ಮಾಡ್ಲೇಬೇಕು
ಮಹಾರಾಜರ ಮದುವೆಯ ಮೀರಿಸಲೇಬೇಕು || ೩ ||
%%%% ಗಂಡಿನವರು ಜರೆದದ್ದು :
ಹತ್ತು ನಿಂಬೆಯ ಹಣ್ಣ ತರಿಸಲಿಲ್ಲ | ಒಳ್ಳೆಯ ಉಕ್ಕುವ ಪಾನಕವ ಕರಡಲಿಲ್ಲ |
ಮಿತ್ರೆ ಬೀಗಿತ್ತೆರಿಗೆ ತಂದು ಕೊಡಲೇ ಇಲ್ಲ | ಸಾಕು ಅತ್ತಿಗೆ ನಿಮ್ಮ ಉಪಚಾರ || ೧ ||
ಆರು ನಿಂಬೆಯ ಹಣ್ಣ ತರಿಸಲಿಲ್ಲ | ಒಳ್ಳೆಯ ತಣ್ಣನೆಯ ಪಾನಕವ ಕರಡಲಿಲ್ಲ |
ನಾರಿ ಬೀಗಿತ್ತೆರಿಗೆ ತಂದು ಕೊಡಲೇ ಇಲ್ಲ | ಸಾಕು ಅತ್ತಿಗೆ ನಿನ್ನ ಬಡಿವಾರ || ೨ ||
&&&& ಹೆಣ್ಣಿನವರ ಉತ್ತರ :
ಹತ್ತು ನಿಂಬೆಯ ಹಣ್ಣ ತರಿಸಿದೆವು | ಒಳ್ಳೆಯ ಉಕ್ಕುವ ಪಾನಕವ ಕರಡಿದೆವು |
ಮಿತ್ರೆ ಬೀಗಿತ್ತೆರಿಗೆ ತಂದುಕೊಟ್ಟೆವಲ್ಲ | ಸಾಕು ಅತ್ತಿಗೆ ನಿಮ್ಮ ಬಡಿವಾರ | ಸಾಕು ಅತ್ತಿಗೆ ನಿಮ್ಮ ವೈಯ್ಯಾರ || ೧ ||
ಆರು ನಿಂಬೆಯ ಹಣ್ಣ ತರಿಸಿದೆವು | ಒಳ್ಳೆಯ ರುಚಿಯಾದ ಪಾನಕವ ಕರಡಿದೆವು |
ನಾರಿ ಬೀಗಿತ್ತೆರಿಗೆ ತಂದು ಕೊಟ್ಟೆವಲ್ಲ | ಸಾಕು ಅತ್ತಿಗೆ ದುಷ್ಟತನವ ಮಾಡದಿರು | ಉತ್ತಮರಾದವರ ದೂರದಿರು || ೨ ||
&&&& ಹೆಣ್ಣಿನವರ ಉತ್ತರ :
ನಾವೇನ್ ಹೆಚ್ಚಿನ ವಸ್ತು ಕೇಳೋದಿಲ್ಲ
ನೀವೇನ್ ಸಾಲ ಮಾಡಿ ತರಬೇಕಿಲ್ಲ
ವಧುವಿಗೊಂದು ಪದಕದ ಸರ ಕೊಡ್ಲೇಬೇಕು
ಕೊರಳಿಗೊಂದು ನೆಕ್ಲೇಸ್ ಮಾತ್ರ ಬೇಕೇಬೇಕು || ೧ ||
ಪಟ್ಟೆ ಸೀರೆ ಪಟ್ಟೆ ಕುಪ್ಪಸ ಕೊಡ್ಲೇಬೇಕು
ಜರಿ ಅಂಚಿನಿಂದ ಅದು ಕೂಡಿರಬೇಕು
ಉಡಲಿಕ್ಕೊಂದು ಪೀತಾಂಬರ ಬೇಕೇಬೇಕು
ಮಿರಿ ಮಿರಿ ಮಿರಿ ಅಂತ ಮಿರಗಬೇಕು || ೨ ||
ಕೈಗೆ ಮಾತ್ರ ನಾಲ್ಕು ಬಳೆ ಬೇಕೇಬೇಕು
ಅದರ ಜೊತೆಗೆ ಮುತ್ತಿನ್ ಬಳೆ ಸಾಕೇಸಾಕು
ಅದಕೆ ತಕ್ಕ ವಾಚು ಉಂಗುರ ಬೇಕೇಬೇಕು
ತಲೆಗೊಂದು ಕೇಶಗೊಂಡ್ಯ ಸಾಕೇಸಾಕು || ೩ ||
ಕಿವಿಗೆ ಮಾತ್ರ ವಜ್ರದೋಲೆ ಬೇಕೇಬೇಕು
ಇದಕೆ ತಕ್ಕ ಜುಮುಕಿಯನ್ನು ಇಟ್ರೆ ಸಾಕು
ಮುಂದುಗಡೆ ಟಿ. ವಿ. ಮಾತ್ರ ಇಡ್ಲೇಬೇಕು
ಗೌರವದಿಂದ ಇಷ್ಟು ಮಾತ್ರ ಕೊಡ್ಲೇಬೇಕು || ೪ ||
%%%% ಗಂಡಿನವರು ಜರೆದಿದ್ದು :
ಹೋಳಿಗೆಯ ಕಂಪಿಲ್ಲೆ | ಮಾಳಿಗೆಯ ತಂಪಿಲ್ಲೆ | ಮಿತ್ರೆ ಬೀಗಿತ್ತಿಯ ಸುಳಿವಿಲ್ಲೆ |
ಸುಳಿವಿಲ್ಲೆ ಅತ್ತಿಗೆ | ನಾವೆಲ್ಲ ಹೋಗಿ ಬರುತ್ತೇವೆ || ಪ ||
ಕಾಫಿ ಬೇಕೆಂದರೆ ಪಾನಕ ತಂದುಕೊಟ್ಟು | ನೆಂಟರಿಗೆ ಬೇಗ ಉಪಚಾರ ಉಪಚರಿಸಿದ ಅತ್ತಿಗೆ ನಾವೆಲ್ಲ ಹೋಗಿಬರುತ್ತೇವೆ || ೧ ||
ಊಟವಾದಮೇಲೆ ತಗಡಿನಡಿಗೆ ಕುಳಿತು | ಕಾಲ ಕಳೆಯುವುದೇ ಬಲುಕಷ್ಟ |
ಬಲುಕಷ್ಟ ಆಯಿತು ನಾವೆಲ್ಲ ಹೋಗಿಬರುತ್ತೇವೆ || ೨ ||
ಮದುಮಗನ ಕರೆದರೆ ಮದುವಣತಿ ಓಡಿಬಂದು | ಒಂದೂ ಮಾತಾಡಲು ಬಿಡಲಿಲ್ಲ |
ಬಿಡಲಿಲ್ಲ ಅತ್ತಿಗೆ ನಾವೆಲ್ಲ ಹೋಗಿಬರುತ್ತೇವೆ || ೩ ||
&&&& ಹೆಣ್ಣಿನವರ ಉತ್ತರ :
ಬಂದು ನೋಡಿಕೊ ಸೊಸೆಯ ಬೀಗಿತ್ತಿಯೆ | ನಿಂದು ನೋಡಿಕೊ ಸೊಸೆಯ |
ಬಂದು ನೋಡಿಕೊ ಮುದ್ದಿನ ಸೊಸೆಯನು | ಅರಗಿಣಿಯಂಥ ಮಗಳನು || ೧ ||
ಉಟ್ಟ ಸೀರೆಯ ನೋಡೆ ಬೀಗಿತ್ತಿಯೆ | ಇಟ್ಟ ಕಾಲುಂಗುರ ನೋಡೆ |
ಕೊಟ್ಟ ಉಂಗುರ ನೋಡೆ ಬೀಗಿತ್ತಿಯೆ | ಇಟ್ಟ ಕುಂಕುಮವ ನೋಡೆ || ೨ ||
%%%% ಗಂಡಿನವರು ಜರೆದದ್ದು :
ನೆಂಟರುಪಚರಿಸಲು ಮುಂಚುಟ್ಟಳು ಕೂರೆಯ | ಕಂಚಿಯ ಸೊಪ್ಪು ತಲೆತುಂಬಾ |
ತಲೆತುಂಬಾ ಮುಡಕೊಂಡು | ನೆಂಟರುಪಚರಿಸಲು ಹೊರಟಳು || ೧ ||
ಬೀಗರು ಬಂದರತ್ತಿಗೆ ನೆಂಟರು ಬಂದರು ನಾದಿನಿ | ನೆಂಟರು ಬಂದರೆಂಬ ಸಡಗರ |
ನೆಂಟರು ಬಂದರೆಂಬ ಸಡಗರ | ಸಡಗರದಿಂದತ್ತಿಗೆ ಸೊಂಟುಳುಕಿ ಅಲ್ಲೇ ಕುಳಿತಳು |
ಕುಳಿತ ಬೀಗಿತ್ತಿಯ ದಂಟಕೋಲ ಕೊಟ್ಟು ಕರೆತನ್ನಿ || ೨ ||
ವಿ. ಸೂ : ಕೂರೆಯ = ಕೊಳಕಾದ ಬಟ್ಟೆ.
&&&& ಹೆಣ್ಣಿನವರ ಉತ್ತರ :
ನೆಂಟರುಪಚರಿಸಲಿಕೆ ಮುಂಚುಟ್ಟಳು ಪಟ್ಟೇಯ | ಸೇವಂತಿಗೆ ಹೂವ ತಲೆತುಂಬಾ |
ತಲೆತುಂಬಾ ಮುಡಕೊಂಡು ಬೀಗರುಪಚರಿಸಲು ಹೊರಟಳು || ೧ ||
ಬೀಗರುಪಚರಿಸಲಿಕೆ ಮುಂಚುಟ್ಟಳು ಸಾಲಿಯ | ಮಲ್ಲಿಗೆ ಹೂವ ತಲೆತುಂಬಾ ||
ತಲೆತುಂಬಾ ಮುಡಕೊಂಡು ಬೀಗರುಪಚರಿಸಲು ಹೊರಟಳು || ೨ ||
&&&& ಹೆಣ್ಣಿನವರ ಉತ್ತರ :
ಕಪ್ಪಾದರೆ ನಿನ್ನ ಕುಲಕೆ ತಪ್ಪೇನ ಬಂದಿತೆ ಎಪ್ಪತ್ತು ವರಹದ ಸರಿಗೆಯ | ಸರಿಗೆಯನಿಟ್ಟರೂ ಕಪ್ಪಿನ ಬಟ್ಟೊನ್ದ ಇಡಬೇಕು ||
ಕರಿದಾದರೆ ನಿನ್ನ ಕುಲಕೆ ಕೆಡುಕೇನು ಆಯಿತೆ ಅರುವತ್ವರಹದ ಸರಿಗೆಯ | ಸರಿಗೆಯನಿಟ್ಟರೂ ಕರಿಯ ಬಟ್ಟೊನ್ದ ಇಡಬೇಕು ||
ಬಣ್ಣ ಕಪ್ಪಾದರೆ ತಪ್ಪು ಏನಾಯಿತೆ ನಲವತ್ವರಹದ ಸರಿಗೆಯ | ಸರಿಗೆಯನಿಟ್ಟರೂ ಸಾದಿನ [ ಕರಿಯ ] ಬಟ್ಟೊನ್ದ ಇಡಬೇಕು ||
%%%% ಮೇಲಿನ ಹಾಡಿಗೆ ಗಂಡಿನವರ ಉತ್ತರ :
ಪುತ್ರ ಕಪ್ಪಾದರೆ ಸೃಷ್ಟಿಯನಾಳ್ಯಾನು | ಮಿತ್ರೆ ನಿನ್ನ ಮಗಳು ಅತಿ ಚೆಲುವೆ |
ಅತಿ ಚೆಲುವೆಯಾದರೂ ಉಪ್ಪರಿಗೆ ಕಸವ ಮೊಗಿಬೇಕು || ೧ ||
ಬಾಲ ಕಪ್ಪಾದರೆ ರಾಜ್ಯವನಾಳ್ಯಾನು | ನಾರಿ ನಿನ ಮಗಳು ಚೆಲುವೆಯು |
ಚೆಲುವೆಯಾದರೂ ಮಾಳಿಗೆಯ ಕಸವ ಮೊಗಿಬೇಕು || ೨ ||
ಕಂದ ಕಪ್ಪಾದರೆ ಪಟ್ಟವನೇರ್ಯಾನು | ರಂಭೆ ನಿನ ಮಗಳು ಸ್ಪುರಧ್ರೂಪಿ |
ಸ್ಪುರಧ್ರೂಪಿಯಾದರೂ ಅಂದರದ ಕಸವ ಮೊಗಿಬೇಕು ||
ಸಂಗ್ರಹ : ಎಂ. ಗಣಪತಿ
ಕಾನುಗೋಡು
ಅಂಚೆ : B . ಮಂಚಾಲೆ ----577431
ಸಾಗರ ತಾಲ್ಲೂಕು. ಶಿವಮೊಗ್ಗ ಜಿಲ್ಲೆ.
ಮೊ : 9481968771

ನನಗೊಂದು ಹೆಣ್ಣು ಬೇಕು, ಹುಡುಕಿಕೊಡಿ ------- ಒಂದು ಲಹರಿಯ ಕಥೆ

.

~~~~~~ ಎಂ. ಗಣಪತಿ. ಕಾನುಗೋಡು.
ನನಗೆ ಈಗಾಗಲೇ ಮದುವೆಯಾಗಿ ಐವತ್ತು ವರ್ಷಗಳಾಗಿವೆ. ಹತ್ತು ಮಕ್ಕಳು. ನಾಲ್ಕು ಹೆಣ್ಣು ಮಕ್ಕಳು. ಮದುವೆಯಾಗಿ ಮೊಮ್ಮಕ್ಕಳನ್ನು ಕಾಣಲಿದ್ದಾರೆ. ಆರು ಗಂಡುಮಕ್ಕಳು. ಎಲ್ಲರಿಗೂ ಮದುವೆಯಾಗಿದೆ. ಉಳಿದ ವಿಚಾರಗಳೆಲ್ಲಾ ಸುಖವೇ.


ಒಂದು ಸಮಸ್ಯೆ ದಿನಾ ನನ್ನನ್ನು ಪೀಡಿಸುತ್ತಿದೆ. ಸಾಕಷ್ಟು ಆಸ್ತಿ ಇದ್ದುದರಿಂದ ಗಂಡುಮಕ್ಕಳೆಲ್ಲ ಮನೆಯಲ್ಲೇ ಇದ್ದಾರೆ.

ಅದೇ ನನಗೆ ಬಂದ ಸಮಸ್ಯೆ. ನನ್ನ ಹೆಂಡತಿ ಗಂಡುಮಕ್ಕಳು, ಸೊಸೆಯಂದಿರನ್ನು ಕೂಡಿಕೊಂಡು ಕೆಲವು ವರ್ಷಗಳಿಂದ ನನ್ನನ್ನು ಬಹಳ ಹೀನಾಯವಾಗಿ ಪರಿಗಣಿಸುತ್ತಿದ್ದಾಳೆ. ತಾನೊಂದೇ ಅಲ್ಲ, ನನ್ನ ಮಕ್ಕಳು, ನನ್ನ ಸೊಸೆಯಂದಿರು ನನ್ನ ಮೇಲೆ ಎರಗುವಂತೆ ಆಗಾಗ್ಯೆ ಷಡ್ಯಂತ್ರವನ್ನು ಹುನ್ನಾರ ಹಾಕುತ್ತಾಳೆ.

ನನ್ನ ಚಿಕ್ಕ ವಯಸ್ಸಿನಿಂದ ಸಾಕಷ್ಟು ಆಸ್ತಿ ಮಾಡಿದೆ. ಒಳ್ಳೆಯ ಟೆರೇಸ್ ಮನೆಯನ್ನು ಕಟ್ಟಿದೆ. ಇವೆಲ್ಲವೂ ನನ್ನಿಂದಲೇ ಆಗಿದ್ದು. ಇದರ ಒಳಗೆ ಮತ್ತು ಮೇಲೆ ಹತ್ತು ಮಕ್ಕಳು. ಇದು ನನ್ನಿಂದಲೇ ಆಗಿದೆ ಎಂದು ನಾನು ಅಹಂಕಾರ ಪಡುವುದಿಲ್ಲ. ಅವು ಭಗವಂತ ಕೊಟ್ಟಿದ್ದು. ಆ ಹೊತ್ತಿನ ನನ್ನಾಕೆಯ ಹತ್ತು ಬಸಿರು, ಬಾಣಂತನ ಎಲ್ಲಾ ಕೆಲಸ, ಖರ್ಚುಗಳನ್ನು ನಾನೇ ನಿಭಾಯಿಸುವುದು ಅನಿವಾರ್ಯವಾಗಿತ್ತು. ಏಕೆಂದರೆ ನನ್ನ ಮಾವನ ಮನೆಯವರು ಕಡುಬಡವರು. ಕೆಲವೊಮ್ಮೆ ಅವಳ ಅಪ್ಪನ ಮನೆಗೆ ನಾನು ದುಡಿದು ತಂದ ಅಕ್ಕಿಯನ್ನೇ ನನ್ನಾಕೆ ಕದ್ದು ಕಳಿಸಿದ್ದು ನನಗೆ ಗೊತ್ತಾಗದೆ ಇರಲಿಲ್ಲ. ಕೇಳಿದ್ದರೆ ನಾನೇ ಅವರ ಮನೆ ಹೊತ್ತೊಯ್ದು ಕೊಟ್ಟು ಬರಿತ್ತಿದ್ದೆ. ಏಕೆಂದರೆ ನನ್ನ ಮಾವ ನನಗೆ ಒಂದು ಹೆಣ್ಣನ್ನು ಕೊಟ್ಟಿರದಿದ್ದರೆ ನನಗೆ ಮನೆಯಲ್ಲಿ ಮಕ್ಕಳೇ ಆಗುತ್ತಿರಲಿಲ್ಲ.

ನಾನು ಆಸ್ತಿ, ಮನೆ, ಮಕ್ಕಳು ಮತ್ತು ಅವರ ನಿಗಾ ಮಾಡುವಾಗ, ದೊಡ್ಡ ಮಾಡುವಾಗಲೆಲ್ಲಾ ನನ್ನವಳು ನನ್ನನ್ನು ಅತಿ ಪ್ರೀತಿಯಿಂದ ನೋಡುತ್ತಿದ್ದಳು. ನನಗೆ ಮನೆಯಲ್ಲಿ ಬಹಳ ಗೌರವ ಇತ್ತು. ಆಗ ನಮ್ಮಿಬ್ಬರ ಪ್ರಾಯವೂ ಹಾಗಿತ್ತು. ಯಾರನ್ನು ಕಂಡರೂ ಹಲ್ಲು ಕಿರಿಯುವ ಕಾಲ.

ಮಕ್ಕಳು ದೊಡ್ಡ ಆದದ್ದೇ ನನಗೆ ಮುಳುವಾಯಿತು. ನನ್ನವಳು ಮಕ್ಕಳೆದುರು ನನ್ನನ್ನು ಹಿಯಾಳಿಸಲು ಪ್ರಾರಂಭಿಸಿದಳು. ನನ್ನ ಹೆಣ್ಣು ಮಕ್ಕಳು ನನ್ನ ಪರವಾಗಿಯೇ ಇದ್ದರು. ಏನು ಮಾಡುವುದು ಅವರು ಇರುವುದು ಅವರ ಗಂಡನ ಮನೆಯಲ್ಲಿ . ಅಯ್ಯೋ .. ನನ್ನ ಗ್ರಹಚಾರವೇ !. ಇಷ್ಟು ಹೊತ್ತಿಗೆ ನಮ್ಮ ದಾಂಪತ್ಯಕ್ಕೆ ಮೂವತ್ತರ ಮುಪ್ಪು ಬಂದು ಹೋಗಿತ್ತು.

ಯಾರೋ ನನ್ನ ಗೆಳೆಯರು ಹೇಳಿದರು. " ಮಕ್ಕಳು ಮಾಡುತ್ತಾರೆ ಸುಮ್ಮನೆ ಮೂಲೆಯಲ್ಲಿ ಕುಕ್ಕರಿಸಿ ಎಂದು ಈಗ ನಿನ್ನ ಹೆಂಡತಿ ಹೇಳುತ್ತಾಳೆ. ಗಂಡುಮಕ್ಕಳಿಗೆ ಮದುವೆ ಮಾಡಿಬಿಟ್ಟರೆ ಹೇಗೂ ಆರು ತಿಂಗಳಲ್ಲಿ ಅತ್ತೆ - ಸೊಸೆ ಕದನ ಪ್ರಾರಂಭವಾಗುತ್ತದೆ. ಆಗ ನಿನ್ನ ಗಂಡುಮಕ್ಕಳು ಅವರ ಹೆಂಡತಿಯ ಜೊತೆಗೆ ಸೇರಿಕೊಳ್ಳುತ್ತಾರೆ. ತಾಯಿಯ ಪಡೆಯನ್ನು ಬಿಡುತ್ತಾರೆ. ಆಗ, ಮಕ್ಕಳು ಮಾಡುತ್ತಾರೆ, ಮೂಲೆಯಲ್ಲಿ ಕುಕ್ಕರಿಸಿ ಎಂದು ಹೇಳಿದ ನಿನ್ನ ಹೆಂಡತಿ ಅದೇ ನಾಲಿಗೆಯಿಂದಲೇ ' ಸಾಕು... ಸಾಕು........ ಅವರು ಮಾಡಿದಷ್ಟನ್ನು ಉಳಿಸಿಕೊಂಡು ಹೋಗಿ ಸಾಕು ' ಎಂದು ಮಕ್ಕಳ ವಿರುದ್ಧ ಮಾತನಾಡುತ್ತಾಳೆ. ನಿನ್ನ ಮಗ್ಗುಲಿಗೆ ಬರುತ್ತಾಳೆ." ಎಂದು ಸಲಹೆ ಕೊಟ್ಟರು.

ಓಹೋ .. ಇದು ಮಕ್ಕಳಿಗೆ ಬೆಚ್ಚಗೆ ಮಾಡುವುದಲ್ಲ. ನನಗೆ ಬೆಚ್ಚಗಿರುವುದಕ್ಕೆ ಹೇಳಿದ ಉಪಾಯ ಎಂದು ಖುಷಿಪಟ್ಟೆ. ಹಾಗೆಯೇ ಮೂರೇ ವರ್ಷಗಳಲ್ಲಿ ನನ್ನ ಆರೂ ಗಂಡುಮಕ್ಕಳಿಗೆ ಕಸರತ್ತಿನಿಂದ ಮದುವೆ ಮಾಡಿದೆ. ಇಲ್ಲಿಗೆ ನನ್ನ ದಾಂಪತ್ಯಕ್ಕೆ ನಲವತ್ತರ ಹಳತು. ಇನ್ನು ಅದು ' ನಲವತ್ತರ ಹರೆಯ ' ಎಂದು ಭಾವಿಸಿಕೊಂಡೆ. ನಾನೂ ನನ್ನ ಹಣ್ಣು ಕೂದಲಿಗೆ hair - dye ಮಾಡಿಸಿಕೊಂಡೆ. ನನ್ನ ಹೆಂಡತಿಯ ತಲೆಕೂದಲಿಗೂ -- ಆಕೆ ಬೇಡವೆಂದರೂ -- ನಾನೇ hair - dye ಮಾಡಿದೆ. ಮತ್ತೆ ಹರೆಯ ಬಂತು ಎಂದ ಮೇಲೆ ಇಬ್ಬರೂ ಟಾಕುಟೀಕು ಇರಬೇಕಲ್ಲಾ.

ಅಯ್ಯೋ... ದೇವರೇ.... ಕೊನೆಗೆ ನಡೆದದ್ದೇ ಬೇರೆ. ನನ್ನ ಸ್ನೇಹಿತರು ಹೇಳಿದ ಹಾಗೆ ನಮ್ಮ ಮನೆಯಲ್ಲಿ ಅತ್ತೆ - ಸೊಸೆಯಂದಿರಿಗೆ ಜಗಳ ಬೀಳಲೇ ಇಲ್ಲ. ನನ್ನ ಹೆಂಡತಿಗೆ ನನ್ನನ್ನು ಮೂಲೆಗೆ ತಳ್ಳಬೇಕು, ತಾನು ಮನೆಯಲ್ಲಿ ಆಡಳಿತ ನಡೆಸಬೇಕು, ತಾನೊಬ್ಬಳೇ ಮೆರೆಯಬೇಕು ಎನ್ನುವುದೇ ಅವಳ ಘಟ್ಟಿ ನಿರ್ಧಾರ. ಈ ಅಮಲಿನಲ್ಲಿ ಸೊಸೆಯಂದಿರ ಮೇಲೆ ಹರಿಹಾಯುವ ಸನ್ನಿವೇಶ [ ನಾನೂ ಅದನ್ನೇ ಕಾಯುತ್ತಿದ್ದೆ ] ಬಹಳಷ್ಟು ಸಾರಿ ಬಂದರೂ ಅದನ್ನೆಲ್ಲಾ ಅದುಮಿಟ್ಟುಕೊಂಡು ನನ್ನನ್ನೇ ಮೆಟ್ಟುವ ಪ್ರಯತ್ನ ಮಾಡುತ್ತಿದ್ದಾಳೆ. ಇದು ಹತ್ತು ವರ್ಷಗಳಿಂದ ದಿನನಿತ್ಯದ ಧಾರಾವಾಹಿ. ನನ್ನ ಹೆಂಡತಿ, ಗಂಡುಮಕ್ಕಳು, ಸೊಸೆಯಂದಿರು, ಮಾತನಾಡಲು ಕಲಿತ ಮನೆಯ ಮೊಮ್ಮಕ್ಕಳು ಎಲ್ಲರೂ ಒಂದು ಕಡೆ. ನಾನೊಬ್ಬನೇ ಒಂದು ಕಡೆ.

ಮುಂಚಿನ ನನ್ನ ಪ್ರಯತ್ನ, ಅಂದು ಮನೆಯಲ್ಲಿ ನನಗಿದ್ದ ಗೌರವಗಳನ್ನು ಕಣ್ಣಾರೆ ಕಂಡಿದ್ದ ನನ್ನ ಹಳೆಯ ಗೆಳೆಯನೊಬ್ಬ ಮೊನ್ನೆ ತಾನೇ ನಮ್ಮ ಮನೆಗೆ ಬಂದಿದ್ದ. ನನ್ನ ಈ ಹತಾಶ ಸ್ತಿತಿಯನ್ನು ಕಂಡ. ಆಗ ನನಗೊಂದು ಸಲಹೆಯನ್ನು ಕೊಟ್ಟು ಹೋದ. ಬಹಳ ಒಳ್ಳೆಯ ಸಲಹೆ. ಸಂಸಾರವನ್ನು ಕಟ್ಟಿ ಬೆಳೆಸಿಕೊಳ್ಳುವ ಸಲಹೆ.

ಅವನ ಸಲಹೆ ಪ್ರಕಾರ ನಾನು ಮತ್ತೊಂದು ಮದುವೆಯಾಗಲು ನಿರ್ಧರಿಸಿದ್ದೇನೆ. ನನಗೀಗ ಎಪ್ಪತ್ತು ವರ್ಷ. ಮೊದಲನೆ ಮದುವೆ ನನ್ನ ಇಪ್ಪತ್ತನೇ ವಯಸ್ಸಿನಲ್ಲಾಗಿತ್ತು. ಆಸ್ತಿ - ಭವ್ಯ ಕಟ್ಟಡದ ವಾಸದ ಮನೆಯನ್ನು ನನ್ನ ಹೆಂಡತಿ, ಅವಳ ಮಾತಿನಂತೆ ಕುಣಿಯುವ ಗಂಡುಮಕ್ಕಳು, ಸೊಸೆಯಂದಿರು, ಮೊಮ್ಮಕ್ಕಳು ನನಗೆ ಕೊಡುವುದಿಲ್ಲ. ನನಗೆ ಗೊತ್ತು. ಆದರೆ ನಾನು ಆ ಮನೆಯನ್ನು ಬಿಟ್ಟು ಅತ್ತಿತ್ತ ಹಂದಾಡುವುದಿಲ್ಲ. ಬರುವ ಹೆಂಡತಿಯು ಅದೇ ಮನೆಯಲ್ಲಿ ವಾಸವಾಗಿರಬೇಕು. ಮನೆಯಲ್ಲಿ ಎಲ್ಲಿ, ಹೇಗೆ ಎಂಬುದನ್ನು ಮದುವೆಯಾದ ಮೇಲೆ ಆಕೆಗೆ ತಿಳಿಸುತ್ತೇನೆ. ಆಕೆ ಭಯಪಡಬೇಕಾಗಿಲ್ಲ. ಏಕೆಂದರೆ ನಾನು ಹಲವು ಲಕ್ಷ ರುಪಾಯಿಗಳನ್ನು ಕೂಡಿಟ್ಟುಕೊಂಡಿದ್ದೇನೆ. ನಾನು ಮುದುಕನಾದರೇನಂತೆ. ನಾನು ಸತ್ತಮೇಲೆ ನನ್ನ ಹಣಕ್ಕೆ [ ಹುಷಾರ್..... ಹೆಣಕ್ಕೆ ಅಲ್ಲ. ] ಭಾರತದಲ್ಲಿ ಎಲ್ಲಿ ಹೋದರೂ ಬೆಲೆ ಇದೆ. ನನ್ನ ಬರುವ ಹೆಂಡತಿ ನಾನು ಕೂಡಿಟ್ಟ ಧನದೊಂದಿಗೆ ಬಿಂದಾಸ್ [ ಐಷಾರಾಮ ] ಇರಬಹುದು. ಅವಳಿಗೂ ಭಗವಂತ ಮಕ್ಕಳನ್ನು ಕೊಟ್ಟಾನು. ಏಕೆಂದರೆ ನಾನು ದೇವರನ್ನು ನಂಬಿದವ. ಹಾಗಂತ ' ಹರೇ ರಾಮ ' ಎಂದು ಮೂಗುಮುಚ್ಚಿ ಕೈ ಮುಗಿದುಕೊಂಡು ಕೂರುವ ಕಾಲ ನನ್ನದು ಎಂದು ಭಾವಿಸುವ ಜಡಭರತತ್ವ ನನ್ನದಲ್ಲ.

ನನಗೊಂದು ಹೆಣ್ಣು ಹುಡುಕಿ ಕೊಡಿ. ಕನ್ಯಾ ಹೇಗಿರಬೇಕು ಕೇಳಿ. ನನ್ನ ಹೆಂಡತಿಗೆ ವರುಷ 68 . ಅವಳಿಗಿಂತ ಕನಿಷ್ಠ ಮೂರು ವರ್ಷ ಚಿಕ್ಕವಳಿರಬೇಕು. ಸುಂದರಿಯಾಗಿರಬೇಕು ಎಂದೇನೂ ಇಲ್ಲ. ಯಾರೂ ಮದುವೆ ಆಗಲು ಇಚ್ಚಿಸದೆ ಕೈ ಬಿಟ್ಟ, ಮೂಗು ಹರುಕ, ತುಟಿಹರುಕ, ತಲೆಯ ಕೂದಲು ಪೂರ್ತಿ ಉದುರಿದ ..... ಹೀಗೆ ಈ ರೀತಿ ಯಾವುದೇ ಊನ ಇರಬಹುದಾದ ' ಹುಡುಗಿಯಾದರೂ 'ಸರಿಯೇ. ಮೈ ತುಂಬಾ ಬಂಗಾರ ಹಾಕುತ್ತೇನೆ. ನಿಜ ಬಂಗಾರ. one - gram gold ಅಲ್ಲ. ಬಹಳ ವರ್ಷಗಳಿಂದ ನನ್ನ ಹೆಂಡತಿ ಮಕ್ಕಳಿಗೆ ಗೊತ್ತಾಗದಂತೆ ಚಿನ್ನವನ್ನು ಕೂಡಿಟ್ಟು ಬ್ಯಾಂಕ್ ಲಾಕರ್ ನಲ್ಲಿ ಇಟ್ಟಿದ್ದೇನೆ. ನಿಜ ಹೇಳಬೇಕೋ........ ನನ್ನನ್ನು ಈ ವಯಸ್ಸಿನಲ್ಲಿ ಮದುವೆಯಾಗ ಬರುವವಳು ಅಧ್ರುಷ್ಟವಂತೆ. ನನ್ನ ಇಪ್ಪತ್ತನೆಯ ವಯಸ್ಸಿನಲ್ಲಿ ನನ್ನ ಮೊದಲನೇ ಹೆಂಡತಿಗೆ ಕೊಡಲು ನನ್ನಲ್ಲಿ ಇದ್ದಿರದ ಹಣ ಮತ್ತು ಬಂಗಾರ ನನ್ನ ಎಪ್ಪತ್ತನೆಯ ವಯಸ್ಸಿನಲ್ಲಿ ಇದೆ. ನನಗೆ ಈ ಇಳಿವಯಸ್ಸಿನಲ್ಲಿ ಬೇರೆ ಯಾವುದೇ ವಾಂಛೆ, ಕಾಮ ನೆ ಇಲ್ಲ.

ಇರುವುದು ಒಂದೇ ಗುರಿ. " ನನ್ನ ಮೊದಲನೇ ಹೆಂಡತಿಯನ್ನು ಹೆದರಿಸಲಿಕ್ಕೆ ಒಂದು ಎರಡನೆಯ ಹೆಂಡತಿ. ಅಷ್ಟೆ. ".

ತಾರೀಖು : 24 - 4 -2015 .

************************************************************************************************************

ಈ ಕಥೆಯಲ್ಲಿ ನಾನು ತಂದ ವಿಷಯಗಳು ಇಷ್ಟು. + ಮದುವೆಯಾದ ಪ್ರಥಮ ವರ್ಷಗಳಲ್ಲಿ ದಾಂಪತ್ಯ ಹೇಗಿರುತ್ತದೆ ಮತ್ತು ದ್ವಿತಿಯಾರ್ಧದಲ್ಲಿ ಹೇಗಿರುತ್ತದೆ?. + ಸಾಮಾನ್ಯವಾಗಿ [ ಎಲ್ಲ ಕುಟುಂಬದಲ್ಲೂ ಅಲ್ಲ.] ಕುಟುಂಬದ ಯಜಮಾನನ ಸ್ಥಿತಿ ಒಂದು ಹಂತದಲ್ಲಿ ಯಾವ ಮಟ್ಟಕ್ಕೆ ಕನಿಷ್ಟವಾಗುತ್ತದೆ ?. + ಕುಟುಂಬದಲ್ಲಿ ಗಂಡ ಹೆಂಡತಿಯ ನಡುವೆ ಶೀತಲ ಸಮರ ಹೇಗಿರುತ್ತದೆ ?. ಗಂಡ ಹೆಂಡತಿಯನ್ನು ಮಟ್ಟಲು ಹಾಗೂ ಹೆಂಡತಿಯು ಗಂಡನನ್ನು ಮೆಟ್ಟಲು ಕುಟುಂಬದಲ್ಲಿ ಆಗಾಗ್ಯೆ ನಡೆಸುವ ಪ್ರಯತ್ನಗಳೇನು ?. + ನಮ್ಮ ಸಂಸಾರದಲ್ಲಿ ಬಿರುಕು ತಂದುಕೊಂಡು ನಾವು ಹಗುರವಾದರೆ ನಮಗೆ ಪುಕ್ಕಟ್ಟೆ ಸಲಹೆ ಕೊಟ್ಟು ಚೆಂದ ನೋಡುವವರಿರುತ್ತಾರೆ. + ವ್ಯಕ್ತಿಯೊಬ್ಬ ತನ್ನ ಹಣ ಮತ್ತು ಬಂಗಾರ ಮುಂತಾದ ಕೇವಲ ಆರ್ಥಿಕ ಶಕ್ತಿಯಿಂದ ಏನನ್ನಾದರೂ ಮಾಡಬಹುದು ಎಂದು ಯೋಚಿಸುವ ಭ್ರಮೆ. + ವಿರೂಪವಾದ ಮಾತ್ರಕ್ಕೆ ಹೆಣ್ಣೊಂದು ಹೇಗೂ ಹಗುರವಾಗಿರುತ್ತಾಳೆ ಎನ್ನುವ ತಪ್ಪು ಕಲ್ಪನೆ. + ತನ್ನ ಹೆಂಡತಿಯನ್ನು ಹದ್ದುಬಸ್ತಿನಲ್ಲಿ ಇಡಲು ಗಂಡನೊಬ್ಬ ಮಾಡುವ ಕೆಟ್ಟ ಯೋಚನೆ . ಹಾಗೆಯೇ ಹೆಂಡತಿಯೂ ಕೂಡಾ.

*********************************************************************************************************

%%%%%% ಕುರಿಗೆ ಶೃಂಗಾರ ವೈಭವ %%%%%%

~~~~~~ ಎಂ. ಗಣಪತಿ. ಕಾನುಗೋಡು.
ಕುರಿಯೆಂದರೆ ಎಲ್ಲರ ಭಾವನೆಯಲ್ಲಿ ಕನಿಷ್ಠ. ಆದರೆ ಅದಕ್ಕೂ ಅದರ ಭಾವನೆಯಲ್ಲಿ ಸಂದರ್ಭದಲ್ಲಿ ತಾನು ಗರಿಷ್ಟ ಎನ್ನುವುದಿದೆ. ವಿಷಯ ತಿಳಿದರೆ ಹಾಗೆಂದು ಅದು ತಪ್ಪೂ ಅಲ್ಲ.
ಕುರಿಗೆ ಬೆಲೆ ಬರಬೇಕಾದರೆ ಅದಕ್ಕೆ ಚೆನ್ನಾಗಿ ಹೊಟ್ಟೆಗೆ ಹಾಕಿ ಬೆಳೆಸುತ್ತಾರೆ, ಸಾಕುತ್ತಾರೆ. ಅದನ್ನು ಖರೀದಿಸಿದವ ಅದರ ಮೈಯನ್ನು ನೋಡಿಯೇ ಅಷ್ಟೊಂದು ಹಣವನ್ನು ಕೊಡುತ್ತಾನೆ. ಬಹಳ ಖುಷಿಯಿಂದಲೇ ಅದನ್ನು ಮನೆಗೆ ತರುತ್ತಾನೆ. ನೋಡಿ, ಅದಕ್ಕೆ ಇದ್ದಲ್ಲಿಯೂ ಗೌರವ, ಕೊಟ್ಟಲ್ಲಿಯೂ ಗೌರವದ ಹೆಮ್ಮೆ.
ಖರೀದಿಸಿ ತಂದವ ಅದನ್ನು ಮನೆಯವರಿಗೆ ಮತ್ತು ಸುತ್ತಲಿನವರಿಗೆ ತೋರಿಸಿ ಹೆಮ್ಮೆಪಡುತ್ತಾನೆ. ಮನೆಗೆ ತಂದವನು ಅದಕ್ಕೆ ಸ್ನಾನ ಮಾಡಿಸುತ್ತಾನೆ.ಸಂತೋಷದಿಂದ ಹಣೆಗೆ ಕುಂಕುಮವನ್ನು ಹಚ್ಚುತ್ತಾನೆ. ಕೆಂಪು ದಾಸವಾಳ ಹೂವಿನ ಮಾಲೆಯನ್ನು ಅದರ ಕೊರಳಿಗೆ ಹಾಕುತ್ತಾನೆ. ಹಣೆಗೂ ಹೂವಿನ ದಂಡೆಯನ್ನು ಕಟ್ಟುತ್ತಾನೆ. ಹೇಗೆ ಬೇಕೋ ಹಾಗೆ ಮನಸೋ ಇಚ್ಛೆ ಅದನ್ನು ಶೃಂಗರಿಸುತ್ತಾನೆ. ಭಕ್ತಿಯಿಂದ ಅದಕ್ಕೆ ಪೂಜೆ ಮಾಡುತ್ತಾನೆ. ಕರ್ಪೂರದ ಆರತಿ ಎತ್ತುತ್ತಾನೆ. ಎಷ್ಟೊಂದು ವೈಭವ ಅದಕ್ಕೆ.
ಇಷ್ಟೆಲ್ಲಾ ಸಂಭ್ರಮವನ್ನು ಮಾಡಿದ ಮೇಲೆ ಆ ಕುರಿಗೂ ಸಂತೋಷವಾಗಿರಬೇಕು. ಸಂಭ್ರಮಿತ ಆ ಕುರಿಯನ್ನು ಮನೆಯ ಜನರು, ನೆರೆಹೊರೆಯ ಜನರು, ಕುರಿಯ ಒಡೆಕಾರನ ಮನೆಯ ಹತ್ತಿರದ ನೆಂಟರು ಒಡಗೊಂಡು ಊರಿನುದ್ದಕ್ಕೂ ಜಾಘಂಟೆ, ತಾಳಗಳ ಢಮ,ಢಮದೊಂದಿಗೆ ಮೆರವಣಿಗೆ ಒಯ್ಯುತ್ತಾರೆ. ಕುರಿಯು ಖುಷಿಯಿಂದ ಕುಣಿದು ಕುಪ್ಪಳಿಸುತ್ತಲೇ ನಡೆಯುತ್ತಿರುತ್ತದೆ.
ಊರ ತುದಿಯಲ್ಲಿರುವ ಭೂತಪ್ಪನ ಗುಡಿಯೆದುರು ಮೆರವಣಿಗೆ ಬಂದು ನಿಲ್ಲುತ್ತದೆ. ತಮ್ಮಲ್ಲೆರ ಜೊತೆಗೆ ಭೂತಪ್ಪ ದೇವರ ದರ್ಶನವನ್ನು ತನಗೂ ತನ್ನ ಒಡೆಕಾರನು ಮಾಡಿಸಲು ವ್ಯವಸ್ಥೆ ಮಾಡಿದ್ದಾನೆಂದು ಕುರಿ ಭಾವಿಸಿರಬೇಕು.
ಸರಿ. ಭೂತಪ್ಪ ದೇವರಿಗೆ ಪೂಜೆ , ಮಹಾಮಂಗಳಾರತಿಯನ್ನು ಯಜಮಾನನು [ ಒಡೆಕಾರ ]ನಡೆಸುತ್ತಾನೆ. ಕುರಿಗೂ ಆ ಮಹಾಮಂಗಳಾರತಿಯನ್ನು ದೇವರ ಆರತಿಯೆಂದು ತೋರಿಸಿ ಎತ್ತುತ್ತಾನೆ.
ಒಡೆಕಾರ ತನ್ನ ಹೆಗಲ ಮೇಲಿನ ಉದ್ದನೆಯ ಪಂಚೆಯನ್ನು ಕುರಿಯ ಕೊರಳಿಗೆ ಹಾಕುತ್ತಾನೆ. ಓಹೋ .. ಯಜಮಾನ ತನ್ನ ಪಂಚೆಯನ್ನೇ ತನಗೆ ಉಡುಗೊರೆ ಹೊಚ್ಚಿದನೆಂದು ಕುರಿ ಸಂತೋಷಗೊಂಡಿರಬೇಕು. ಹಾಕಿದ ಪಂಚೆಯಿಂದ ಕುರಿಯ ಕೊರಳನ್ನು ಒಂದೆಡೆ ಯಜಮಾನ ಘಟ್ಟಿಯಾಗಿ ಎಳೆದು ಹಿಡಿದುಕೊಂಡ. ಅಷ್ಟೊತ್ತಿಗೆ ಅದರ ಸೊಂಟವನ್ನು ಯಾರೋ ಘಟ್ಟಿಯಾಗಿ ಎಳೆದು ಹಿಡಿದುಕೊಂಡಿದ್ದರು. ಅಹಹ ....... ತನ್ನ ಯಜಮಾನ ಮತ್ತು ಅವನ ಕಡೆಯವರು ತನ್ನ ಕೊರಳು ಮೈಯನ್ನು ಹಿಡಿದುಕೊಂಡು ಮುದ್ದಾಡುತ್ತಿದ್ದಾರೆಂದು ಶೃಂಗಾರ ವೈಭವದಿಂದ ಸಂಭ್ರಮಿತವಾದ ಕುರಿಯು ಭಾವಿಸಿರಬೇಕು.
ಕಣ್ಣು ರೆಪ್ಪೆ ಮಿಡುಕಿಸುವುದರಲ್ಲಿ ತನ್ನ ಕುತ್ತಿಗೆಯನ್ನು ಕತ್ತರಿಸಿ ಭೂತಪ್ಪ ದೇವರಿಗೆ ತನ್ನನ್ನು ಬಲಿಕೊಟ್ಟಿದ್ದು ಕುರಿಗೆ ಕೊನೆಗೂ ಗೊತ್ತಾಗಲೇ ಇಲ್ಲ.
" ಬದುಕಿನಲ್ಲಿ ನಮ್ಮ ಪಾಡೂ ಹಲವು ಬಾರಿ ಈ ಸಂಭ್ರಮಿತ ಕುರಿಯ ಪಾಡಿನಂತೆಯೇ ಆಗುತ್ತದೆ ".
ತಾರೀಖು : 29 - 3 - 2015

@ ಕಚಗುಳಿ :

ನಾಗಪ್ಪ ಶೆಟ್ಟರ ಅಂಗಡಿಗೆ ಮೊನ್ನೆ ರಾತ್ರಿ ಜೀನಸು ಸಾಮಾನು ತರೋಣ ಅಂತ ಹೋಗಿದ್ದೆ. ಶೆಟ್ಟರು ನಾನು ಹೇಳಿದ ಸಾಮಾನಿನ ಪಟ್ಟಿಯನ್ನು ಬರೆಯುತ್ತಿದ್ದರು. ತಕ್ಷಣ ವಿದ್ಯುತ್ ಹೋಗಿ ಅಂಗಡಿಯೆಲ್ಲಾ ಕಪ್ಪಾಯಿತು.ತತ್ ಕ್ಷಣ ಶೆಟ್ರು ನನ್ನ ಎರಡೂ ಕೈಗಳನ್ನು ಘಟ್ಟಿಯಾಗಿ ಹಿಡಿದುಕೊಂಡು " ದೇವ್ರೂ ಇವತ್ತು ನೀವು ನಮ್ಮ ಮನೆಗೆ ಊಟಕ್ಕೆ ಬರಬೇಕು " ಅಂದ್ರು. 
"ಇವತ್ತು ಆಗಲ್ಲ, ಇನ್ನೊಂದು ದಿನ ಖಂಡಿತ ಬರ್ತೀನಿ " ಎಂದೆ.
" ಹಾಗಂದ್ರೆ ಆಗೋಲ್ಲ ದೇವ್ರೂ, ನಾನೇನು ನಿಮ್ಮನ್ನ ದಿನಾ ಊಟಕ್ಕೆ ಕರೀತೀನಾ ? " ಎನ್ನುತ್ತಾ ನನ್ನ ಕೈಗಳನ್ನು ಕಪ್ಪಿನಲ್ಲಿಯೇ ಮತ್ತಷ್ಟು ಬಿಗಿಯಾಗಿ ಹಿಡಿದುಕೊಂಡರು.
ನಾನು ಬೇಡವೆಂದಷ್ಟೂಅವರ ಒತ್ತಾಯ ಜಾಸ್ತಿ ಆಗ್ತಾ ಹೋಯ್ತು. ನನ್ನ ಕೈಗಳನ್ನಂತೂ ಬಿಡಲೇ ಇಲ್ಲ.
ಸದ್ಯ ವಿದ್ಯುತ್ ಬಂದು ದೀಪ ಬಂತು.
ಶೆಟ್ರು " ಸರಿ, ನಿಮಗಿಷ್ಟ ಇಲ್ಲ ಎಂದ ಮೇಲೆ ನಾನು ಯಾಕೆ ಒತ್ತಾಯ ಮಾಡಲಿ " ಎನ್ನುತ್ತಾ ನನ್ನ ಕೈಗಳನ್ನು ಬಿಟ್ಟರು.
ದೀಪ ಆರಿ ಅಂಗಡಿಯೆಲ್ಲಾ ಕಪ್ಪಾದಾಗ ನಾನು ಅವರ ಹಣದ ಪೆಟ್ಟಿಗೆ ಬಳಿ ಕುಳಿತಿದ್ದುದೇ ಅವರ ಆ ಒತ್ತಾಯಕ್ಕೆ ಕಾರಣವಾಗಿತ್ತು

&&&&&& ಗ್ಯಾಸ್ಟ್ರಿಕ್ ಎಂದರೇನು ? &&&&

ನಮಗೆಲ್ಲರಿಗೂ ಒಂದಲ್ಲ ಒಂದು ರೀತಿಯಲ್ಲಿ ಗ್ಯಾಸ್ಟರೈಟಿಸ್ ನ ಅನುಭವವಾಗಿರುತ್ತದೆ. ಇದನ್ನು ನಿರ್ಲಕ್ಷ ಮಾಡಿದರೆ ಕ್ರಮೇಣವಾಗಿ ಗಂಭೀರ ಅರೋಗ್ಯ ಸಮಸ್ಯೆಗಳು ಉಂಟಾಗುವ ಸಂದರ್ಭ ಇರುತ್ತದೆ.
ನಾವು ಸೇವಿಸುವ ಆಹಾರವು ಅನ್ನನಾಳದ ಮೂಲಕ ಜಠರವನ್ನು ಸೇರುತ್ತದೆ.ಜಠರದಲ್ಲಿರುವ ಸೆಲ್ ನಿಂದ ಗ್ಯಾಸ್ಟರೈಟೀಸ್ ದ್ರವ ಯುತ್ಪತ್ತಿಯಾಗುತ್ತದೆ.ನಾವು ತೆಗೆದುಕೊಂಡ ಆಹಾರವು ಗ್ಯಾಸ್ಟ್ರಿಕ್ ದ್ರವದ ಜೊತೆ ಮಿಶ್ರವಾಗಿ ಜೀರ್ಣಕ್ರಿಯೆಗೆ ಸಹಾಯ ಮಾಡುತ್ತದೆ.
ಕೆಲವು ಸಮಯದಲ್ಲಿ ಈ ಗ್ಯಾಸ್ಟ್ರಿಕ್ ದ್ರವ ಬೇಕಾದ ಪ್ರಮಾಣಕ್ಕಿಂತ ಜಾಸ್ತಿಯಾಗಿ ಯುತ್ಪತ್ತಿಯಾದರೆ ಗ್ಯಾಸ್ಟ್ರೈಟೀಸ್ ಉಂಟಾಗುತ್ತದೆ. ಇದನ್ನೇ ನಾವು ಗ್ಯಾಸ್ಟ್ರಿಕ್ ಅಥವಾ ಕನ್ನಡದಲ್ಲಿ ಆಮ್ಲಪಿತ್ತ ಎನ್ನುತ್ತೇವೆ. ಒಮ್ಮೆ ಈ ದ್ರವ ಯುತ್ಪತ್ತಿಯಾಗುವ ಸಂದರ್ಭದಲ್ಲಿ ಅದು ಬೆರೆಯಲಿಚ್ಚಿಸುವ ಆಹಾರ ಜಠರಕ್ಕೆ ಹೋಗದಿದ್ದಾಗಲೂ ಗ್ಯಾಸ್ಟ್ರೈಟೀಸ್ ಉಂಟಾಗುತ್ತದೆ.
ಅವಸರದ ಜೀವನ ಶೈಲಿಯೂ ಗ್ಯಾಸ್ಟ್ರೈಟೀಸ್ ಗೆ ಪ್ರಮುಖ ಕಾರಣ.ಇದು ಮಿದುಳಿನ ಮೇಲೆ ಹೆಚ್ಚಿನ ಒತ್ತಡ ಬೀಳುವುದರಿಂದ ಎಡರ್ನಲ್ ಗ್ಲಾಂಡ್ಸ್ ನ ಸ್ರವಿಸುವಿಕೆ ಹೆಚ್ಚಾಗುತ್ತದೆ.ಮಾನಸಿಕವಾಗಿ ಒತ್ತಡಕ್ಕೆ ಒಳಗಾದಾಗ ಹಾರ್ಮೋನ್ ಸಮತೋಲನ ತಪ್ಪಿ ಗ್ಯಾಸ್ಟ್ರೈಟೀಸ್ ಉಂಟಾಗುತ್ತದೆ. ಆಹಾರದಲ್ಲಿ ಹೆಚ್ಚಿನ ಮಸಾಲ ಪದಾರ್ಥ ಮತ್ತು ಅಧಿಕ ಎಣ್ಣೆ ಪದಾರ್ಥ ಸೇವನೆಯಿಂದ, ಅತಿ ಖಾರ, ಅತಿಹುಳಿಪದಾರ್ಥ ಸೇವನೆಯಿಂದ, ಹಾಗೂ ಹಸಿದ ಹೊಟ್ಟೆಯಲ್ಲಿ ಕಾಫೀ,ಟೀ ಯನ್ನು ಕುಡಿಯುವುದರಿಂದ, ದಿನದಲ್ಲಿ ಸಾಕಷ್ಟು ನೀರು ಕುಡಿಯದೇ ಇರುವುದರಿಂದ [ ಒಬ್ಬ ವ್ಯಕ್ತಿಯು ದಿನಕ್ಕೆ ಕನಿಷ್ಠ ಮೂರು ಲೀಟರ್ ನೀರನ್ನು ಕುಡಿಯಬೇಕು. ಒಂದು ಸಾರಿಗೆ ಅರ್ಧ ಲೀಟರಿಗಿಂತ ಹೆಚ್ಚು ನೀರನ್ನು ಕುಡಿಯಬಾರದು ], ನೋವು ನಿರೋಧಕ ಮಾತ್ರೆಗಳನ್ನು ಸೇವನೆ ಮಾಡುವುದರಿಂದ, ಆಲ್ಕೋಹಾಲ್ ನಂತಹ ದುಶ್ಚಟಗಳನ್ನು ಅತಿಯಾಗಿ ಹೊಂದುವುದರಿಂದ, ಸಮಯಕ್ಕೆ ಸರಿಯಾಗಿ ಊಟ ಮಾಡದೇ ಇರುವುದರಿಂದ, ವಿಟಮಿನ್ ಬಿ - 12 ಮತ್ತು ಅನಿಮಿಯಾ ಸಮಸ್ಯೆ ಇರುವ ಕಾರಣದಿಂದ ಗ್ಯಾಸ್ಟ್ರೈಟೀಸ್ ಉಂಟಾಗುವ ಸಾಧ್ಯತೆಗಳು ಬಹಳ ಇದೆ.
ಗ್ಯಾಸ್ಟ್ರೈಟೀಸ್ ಆದಾಗ ಕಂಡುಬರುವ ಲಕ್ಷಣಗಳು ಹಲವಾರು. ಎದೆಯಲ್ಲಿ, ಹೊಟ್ಟೆಯ ಕೆಳಭಾಗದಲ್ಲಿ ಉರಿ, ಹುಳಿತೇಗು, ಒಮ್ಮೊಮ್ಮೆ ವಾಂತಿ ಬಂದ ಹಾಗೆ ಅನ್ನಿಸುತ್ತದೆ, ಹೆಚ್ಚಾದಾಗ ಪಿತ್ತ,ಪಿತ್ತ ವಾಂತಿಯೂ ಆಗುತ್ತದೆ, ಹೊಟ್ಟೆ ಉಬ್ಬರ,ನೋವು, ಅಜೀರ್ಣ, ತಲೆ ಸುತ್ತುವುದು, ಊಟ ಸೇರದೆ ಇರುವುದು ಮುಂತಾದ ಲಕ್ಷಣಗಳು ಕಂಡುಬರುತ್ತವೆ.
ಕ್ರಾನಿಕ್ [ chronic ] ಗ್ಯಾಸ್ಟರೈಟೀಸ್ ಕೂಡ ಕೆಲವರಿಗೆ ಇರುತ್ತದೆ. ಅದರ ವಿವರಣೆ ಬೇರೆಯೇ ಇದೆ.
ಗ್ಯಾಸ್ಟ್ರೈಟಿಸ್ ಬರುವುದಕ್ಕೆ ಮೇಲೆ ತಿಳಿಸಿದ ಅನೇಕ ಕಾರಣಗಳನ್ನು ಗಮನಿಸಿ ಅವುಗಳನ್ನು ಪರಿಹರಿಸಿಕೊಳ್ಳುವತ್ತ ಗಮನ ಹರಿಸಿದರೆ ಅದರ ಸಮಸ್ಯೆ ಇಲ್ಲವಾಗುತ್ತದೆ.
ಮಾಹಿತಿಯ ಕೃಪೆ : ಹೆಸರಾಂತ ವೈದ್ಯರು.
~~~~~~~~ ಸಂಗ್ರಹ : ಎಂ. ಗಣಪತಿ. ಕಾನುಗೋಡು.
ತಾರೀಖು : 27 - 3 - 2015

ಇದು ಗಣರಾಜ್ಯವಲ್ಲ. ಹಣರಾಜ್ಯ

                                                                             ~~~ ಎಂ.ಗಣಪತಿ. ಕಾನುಗೋಡು.

ಬ್ರಿಟಿಷರ ಆಡಳಿತ, ನಂತರದಲ್ಲಿ ಸ್ವದೇಶೀ ರಾಜರ ಆಡಳಿತವನ್ನು ತೊಲಗಿಸಿ ನಮ್ಮ ಅಂದಿನ ರಾಜಕೀಯ ನೇತಾರರು ಭಾರತಕ್ಕೆ ಪ್ರಜಾಪ್ರಭುತ್ವ ಆಡಳಿತವನ್ನು ಒದಗಿಸಿದರು. ಅದಕ್ಕೆ ಅಗತ್ಯವಾದ ಸಂವಿಧಾನವನ್ನು ರೂಪಿಸಿಕೊಟ್ಟರು. 

ಈ ಸಂಭ್ರಮವನ್ನು ಗಣರಾಜ್ಯೋತ್ಸವ ಎಂದು ನಾವಿಂದು ಆಚರಿಸುತ್ತಿದ್ದೇವೆ. ಗಣ ಎಂದರೆ ಸಮೂಹ ಎಂದು ಅರ್ಥ ಒಂದೆಡೆಯಿದ್ದರೂ ಇಲ್ಲಿ ಪ್ರಜೆ ಎಂಬ ಅರ್ಥದಲ್ಲಿ ಈ ಶಬ್ದವನ್ನು ಗೃಹಿಸಲಾಗಿದೆ. ಅಂದರೆ ಜನರ, ಜನರಿಂದ,ಜನರಿಗಾಗಿ ಈ ಆಡಳಿತ ಎಂದು ವರ್ಣಿಸಲಾಗಿದೆ.

ಒಂದು ಸರ್ಕಾರವನ್ನು ಜನರೇ ಸ್ಥಾಪಿಸುತ್ತಾರೆ ಎಂದರೆ ಆ ಜನರಿಗೆ ಅಂಥಹ ಅರ್ಹತೆ ಇರಬೇಕಾದದ್ದು ಅವಶ್ಯಕ. ಅವರಿಗೆ ತಮ್ಮ ಹಕ್ಕು, ಅಷ್ಟೇ ಸರಿಸಮನಾಗಿ ಕರ್ತವ್ಯದ ಬಗ್ಯೆ ಅರಿವು ಇದ್ದರೆ ಮಾತ್ರ ಇಂಥಹ ಜವಾಬ್ದಾರಿಯನ್ನು ನಿರ್ವಹಿಸಲು ಸಾಧ್ಯ.

ನಮ್ಮದು ಪರೋಕ್ಷ ಪ್ರಜಾಪ್ರಭುತ್ವ ಪದ್ಧತಿ. ನಮ್ಮ ಕರ್ನಾಟಕ ರಾಜ್ಯದ ಆರೇಳು ಕೋಟಿ ಜನರನ್ನು ಆಡಳಿತ ಮಾಡಲು ಈ ಜನರು ತಾವು 224 ಮಂದಿಯನ್ನು ಚುನಾಯಿಸಬೇಕು. ನಮ್ಮ ರಾಷ್ಟದ ಸ್ವಲ್ಪ ಹೆಚ್ಚುಕಡಿಮೆ 120 ಕೋಟಿ ಜನರನ್ನು ಆಡಳಿತ ಮಾಡಲು ಈ ಜನರು ತಾವು 542 ಮಂದಿಯನ್ನು ಚುನಾಯಿಸಬೇಕು.

ಚುನಾವಣೆಯಲ್ಲಿ ಸ್ಪರ್ಧಿಸಿದವನು ಮತ ಯಾಚಿಸುವ ಅರಾಜಕತೆ ಪ್ರಜ್ಞಾವಂತ ಮತದಾರನಿಗೆ ಒಂದು ಅವಹೇಳನವಾಗಬೇಕು. ಚುನಾಯಿತನಾಗುವ ಉಮೇದುವಾರ ಜನರ, ಜನರಿಂದ, ಜನರಿಗಾಗಿ ಎಂಬ ಪರಿಕಲ್ಪನೆಯಿದ್ದರೆ ಮತದಾರನೇ ಸ್ವತಃ ಅವನನ್ನು ಗುರುತಿಸಿ ಚುನಾಯಿಸುವಂತಾಗಬೇಕು. ಅಂಥಹ ಮನೋಗತಿ ಮತ್ತು ಹೊಣೆಗಾರಿಕೆಯನ್ನು ಮತದಾರ ಹೊಂದಿರಬೇಕು. ನಾನು ಇಂಥಹವನು, ನನಗೆ ಮತ ಕೊಡಿ ಎಂದು ಪ್ರಜಾಪ್ರತಿನಿಧಿಯಾಗುವವನು ಮತದಾರನಿಗೆ ಸೂಚಿಸುವ ಪ್ರಕ್ರಿಯೆ ಈ ರಾಷ್ಟ್ರದ ಪ್ರಜಾಪ್ರಭುವಿಗೆ ಅವಮಾನದ ಸಂಗತಿಯಾಗಬೇಕು. ಹಾಗೆ ತನ್ನ ಸನಿಹ ಬಂದವನನ್ನು ದೂರ ತಳ್ಳಿ ತಾನು ಯಾರನ್ನು ತನ್ನ ಆಡಳಿತೆಗೆ ಆಯ್ಕೆ ಮಾಡಿಕೊಳ್ಳಬೇಕೆಂಬ ಚುನಾವಣಾ ಪ್ರಕ್ರಿಯೆಯನ್ನು ತನ್ನ ಸ್ವಂತ ಯೋಗ್ಯತೆ ಮತ್ತು ನಿರ್ಣಯಕ್ಕೆ ಹೊಂದಿಸಿಕೊಳ್ಳಬೇಕು. ಇದು ನಿಜವಾದ ಪ್ರಜಾಪ್ರಭುತ್ವದ ಸರ್ಕಾರದ ವಾಸ್ತವ ರೂಪ.

ಇಂದು ಹಾಗಲ್ಲ. ನಿಜವಾದ ಯೋಗ್ಯತೆ ಇದ್ದವನು ಆಯ್ಕೆಯಾಗಲು ಸಾಧ್ಯವಾಗುತ್ತಿಲ್ಲ. ಶಿವರಾಮ ಕಾರಂತ, ಗೋಪಾಲಕೃಷ್ಣ ಅಡಿಗರಂಥವರು ಚುನಾವಣೆಯಲ್ಲಿ ಸೋಲಬೇಕಾಯಿತು. ಎಲ್ಲಿ ನೋಡಿದರೂ ಹಣ, ಹಣ, ಹಣ . ಕೋಟಿಗಟ್ಟಲೆ ಹಣವನ್ನು ತೂರುವವನು ಮಾತ್ರ ಶಾಸಕನಾಗುವ ಪರಿಸ್ಥಿತಿ ಇಂದು ಇದೆ. ಹಾಗೆ ಆಯ್ಕೆ ಆದವನು ತನ್ನ ಸಂದ ಚುನಾವಣಾ ವೆಚ್ಚದ ಹಣ ಭರಿಸಿಕೊಳ್ಳಲಿಕ್ಕೆ, ನಂತರ ಮತ್ತೆ ಆಗಾಗ್ಯೆ ಮತ್ತು ಅಲ್ಲಲ್ಲಿ ಹಣ ಯಾಚಿಸುವ ಮತದಾರನಿಗೆ ತೂರಲಿಕ್ಕೆ ಮತ್ತು ಪುನಃ ಮುಂದಿನ ತನ್ನ ಚುನಾವಣಾ ಸ್ಪರ್ಧೆಗೆ ತಗಲುವ ವೆಚ್ಚಕ್ಕೆ ಹಣಕೂಡಿಕೊಳ್ಳಲಿಕ್ಕೆ ರಾಷ್ಟ್ರದ ಹಣವನ್ನು ಲೂಟಿಹೊಡೆಯಬೇಕು. ಅಂದರೆ ಮತದಾರ ಸರ್ಕಾರಕ್ಕೆ ಜಮೆ ಮಾಡಿದ ಪ್ರತ್ಯಕ್ಷ್ಯ ಮತ್ತು ಪರೋಕ್ಷ್ಯ ತೆರಿಗೆಯನ್ನು ದೋಚಬೇಕು. ಇದು " ಕೆರೆಯ ನೀರನು ಕೆರೆಗೆ ಚೆಲ್ಲಿ ವರವ ಪಡೆದವರಂತೆ ಕಾಣಿರೋ " ಎನ್ನುವ ದಾಸರ ವಾಣಿಯ ದುರುಪಯೋಗ. ಚುನಾವಣಾ ಪ್ರಕ್ರಿಯೆಯಲ್ಲಿ ತೊಡಗಿಸಿಕೊಳ್ಳುವ ವ್ಯಕ್ತಿಯೊಬ್ಬನ ಯಾವುದೇ ಯೋಗ್ಯತೆ ಮತ್ತು ಅನುಭವ ಇಂದು ಪರಿಗಣನೆಯಾಗುತ್ತಿಲ್ಲ. 

ಇದಕ್ಕೆ ಹೊಣೆ ಯಾರು ?. ಇಂದು ಮತದಾರಲ್ಲಿ ಅನಕ್ಷರಸ್ಥರಿರಬಹುದೇ ಅಪ್ರಜ್ನಾವಂತರು ಯಾರೂ ಇಲ್ಲ. ಅಕ್ಷರತೆಯೇ ಬೇರೆ. ಪ್ರಜ್ನಾವಂತಿಕೆಯೇ ಬೇರೆ. ಯಾರಿಂದ, ಹೇಗೆ, ಎಲ್ಲಿ, ಯಾವಾವುದಕ್ಕೆ ಪ್ರಯೋಜನ ಪಡೆದುಕೊಳ್ಳಬೇಕು ಎನ್ನುವ ಬುದ್ಧಿವಂತಿಕೆ, ಸ್ವಾರ್ಥ ಪ್ರತಿ ಮತದಾರನಲ್ಲೂ ಇಂದು ಇದೆ. ಮತದಾರನ ಇದೇ ಮನೋಭಾವವನ್ನು ಅಥವಾ ಈ ಕೊರತೆಯನ್ನು ಚುನಾವಣೆಯಲ್ಲಿ ಸ್ಪರ್ಧಿಸುವ ಉಮೇದುವಾರ ನಮ್ಮ ರಾಷ್ಟದಲ್ಲಿ ಚೆನ್ನಾಗಿ ನಗದು ಮಾಡಿಕೊಳ್ಳುತ್ತಿದ್ದಾನೆ. ಆದ್ದರಿಂದ ಇಂದು ನಮ್ಮ ರಾಷ್ಟ್ರ ಗಣರಾಜ್ಯವಾಗಿ ಉಳಿದಿಲ್ಲ. ಬದಲಿಗೆ ' ಹಣರಾಜ್ಯ ' ವಾಗಿದೆ. ಇಂಥಹ ಸನ್ನಿವೇಶವನ್ನು ಉಂಟುಮಾಡಿದ ಹೊಣೆಗೇಡಿ ಯಾರು ?. 

ರಾಜಕಾರಣಿಯೋ ? ರಾಜಕೀಯ ಸ್ವಾತಂತ್ರ್ಯ ಬಂದು ಅರತ್ತೇಳು ವರ್ಷಗಳ ಸ್ವಾಯತ್ತತೆಯ ಅನುಭವದ 

ಮತದಾರನೋ ?. 

ತಾರೀಖು : 25 - 1 - 2015 .

ಅಜ್ಜಿಯ ಗಂಟು

ಮಧ್ಯಮ ದರ್ಜೆಯ ಅವಿಭಕ್ತ ಕುಟುಂಬ. ಅದರಲ್ಲಿ ಒಬ್ಬಳು 90 ವರ್ಷದ ಅಜ್ಜಿ. ಅಜ್ಜಿಗೆ ತನ್ನದೇ ಆದ ಒಂದು ಟ್ರಂಕು. ಆ ಟ್ರಂಕಿನ ಹತ್ತಿರ ಮನೆಯವರಲ್ಲಿ ಯಾರೂ ಸುಳಿಯುವ ಹಾಗಿರಲಿಲ್ಲ. ಯಾರಾದರೂ ಅದರ ಸನಿಹಕ್ಕೆ ಹೋದರೆ ಮೈಮೇಲೆ ಎರಗುತ್ತಿದ್ದಳು.

ಅದರ ಬಾಗಿಲನ್ನು ಯಾರ ಎದುರು ಯಾವಾಗಲೂ ತೆರೆದಿರಲಿಲ್ಲ. ತೆರೆದಾಗ ಒಮ್ಮೆ ಯಾರಾದರೂ ಎದುರಿಗೆ ಬಂದರೆ ಸಟ್ಟನೆ ಟ್ರಂಕಿನ ಬಾಗಿಲನ್ನು ಹಾಕಿಬಿಡುತ್ತಿದ್ದಳು.

ಅಜ್ಜಿ, ಪಾಪ, ಬಹಳ ಕಾಲದಿಂದ ಟ್ರಂಕನ್ನು ಜೋಪಾನ ಮಾಡಿಕೊಂಡಿದ್ದಾಳೆ, ಏನೋ ಒಂದಿಷ್ಟು ಬಂಗಾರ, ಹಣವನ್ನು ಕೂಡಿಟ್ಟುಕೊಂಡಿದ್ದಾಳೆ. ಕಷ್ಟಪಟ್ಟು ಗಂಟು ಮಾಡಿಕೊಂಡಿದ್ದಾಳೆ. ಅಜ್ಜಿಯ ಕಾಲಾನಂತರ ಹೇಗೂ ನಮಗೆಲ್ಲರಿಗೂ ಪಾಲು ದೊರೆಯುತ್ತದೆಯಲ್ಲ ಎಂದು ಯಾರೂ ಅವಳಿಗೆ ತೊಂದರೆ ಕೊಟ್ಟಿರಲಿಲ್ಲ. ಅವಳು ಹೇಳಿದ ಹಾಗೆಯೇ ಕೇಳುತ್ತಿದ್ದರು. ತುಂಬಾ ಗೌರವವನ್ನು ಕೊಡುತ್ತಿದ್ದರು.

ಅಜ್ಜಿ ಕಾಯಿಲೆಗೆ ಬಿದ್ದಳು. ಎಲ್ಲರೂ ಅವಳ ಬಗ್ಯೆ ಬಹಳ ನಿಗಾ ವಹಿಸಿದರು. ಕೊನೆಯ ಕಾಲ ಸಮೀಪಿಸಿದರೂ ಅಜ್ಜಿಯು ಟ್ರಂಕಿನ ಮೋಹವನ್ನು ಬಿಡಲಿಲ್ಲ. ಅದಕ್ಕೆ ಒಂದು ಹುರಿಯನ್ನು ಕಟ್ಟಿಸಿ ತನ್ನ ಕೈಗೆ ಸಿಕ್ಕಿಸಿಕೊಂಡಿದ್ದಳು. ಅದನ್ನು ಯಾರೂ ಮುಟ್ಟಬಾರದೆಂದು ಮಧ್ಯೆ ಮಧ್ಯೆ ಎಚ್ಚರಿಕೆ ಕೊಡುತ್ತಿದ್ದಳು. ಅಜ್ಜಿ ಹಾಗೆ ಹೇಳಿದ ಹಾಗೆಲ್ಲಾ ಅವಳಮೇಲೆ ಮನೆಯವರ ಕಾಳಜಿಯೂ ಹೆಚ್ಚಾಗತೊಡಗಿತು. ಅಜ್ಜಿ ನಮ್ಮ ಮನೆಯ ದೇವರು ಎನ್ನುತ್ತಾ ಕೈಗೆ ಒಬ್ಬರು, ಕಾಲಿಗೆ ಒಬ್ಬರು ಎನ್ನುವಂತೆ ಅವಳ ಸೇವೆಯನ್ನು ಮಾಡಿದರು. ಹಾಗೆ ಸೇವೆ ಮಾಡಿದವರಲ್ಲಿ ಒಬ್ಬರು ಹೆಸರಾಂತ ವಕೀಲರು ಪ್ರಸ್ತುತದಲ್ಲಿ ಕರ್ನಾಟಕ ವಿದಾನ ಪರಿಷತ್ತಿನ ಸದಸ್ಯರಾಗಿದ್ದಾರೆ.

ಅಜ್ಜಿ ವಯೋಮಾನದ ಕಾಯಿಲೆಯಿಂದ ಸತ್ತಳು. ಮನೆಯ ಎಲ್ಲ ಸದಸ್ಯರ ಗಮನ ಅಜ್ಜಿಯ ಹೆಣದ ಮೇಲೆಗಿಂತ ಅವಳ ಟ್ರಂಕಿನ ಮೇಲೆಯೇ ಇತ್ತು. ಅಷ್ಟೊತ್ತಿಗೆ ಅಜ್ಜಿಯ ಕೊರಳಿನಲ್ಲಿ ದಪ್ಪನೆಯ ದಾರದಲ್ಲಿ ಇದ್ದ ಅವಳ ಟ್ರಂಕಿನ ಕೀಲಿಯನ್ನು ಯಾರೋ ಹೊಡೆದುಬಿಟ್ಟಿದ್ದರು. ಅಜ್ಜಿಯ ಮರಣವಿಧಿಯ 14 ನೇ ದಿನ ಅದನ್ನು ಎಲ್ಲರ ಎದುರಿಗೆ ಒಡೆಯಬೇಕು. ಅಲ್ಲಿಯವರೆಗೆ ಅದು ಅವರೆಲ್ಲರ ಸೋದರಮಾವನ ಸ್ವಾಧೀನದಲ್ಲಿ ಒಂದು ಕೊಟಡಿಯಲ್ಲಿ ಇರಬೇಕು ಎಂದು ಎಲ್ಲರೂ ತೀರ್ಮಾನ ಮಾಡಿದರು. ಅದಕ್ಕಾಗಿಯೇ ಒಂದು ಹೊಸ ಗೋಡ್ರೆಜ್ ಬೀಗವನ್ನು ಖರೀದಿಸಿ ಟ್ರಂಕನ್ನಿರಿಸಿದ ರೂಮಿನ ಬಾಗಿಲಿಗೆ ಎಲ್ಲರ ಸಮಕ್ಷಮ ಹಾಕಿ ಸೋದರಮಾವನ ಕೈಗೆ ಕೊಟ್ಟದ್ದೂ ಆಯಿತು.

ಸರಿ. ಹದಿನಾಲ್ಕನೇ ದಿನ ಅವಳ ಮರಣಕರ್ಮಗಳು ಪೂರೈಸಿತು. ನೆಂಟರೆಲ್ಲಾ ಮನೆಗೆ ಹೋದಮೇಲೆ ರಾತ್ರಿ ಸೋದರಮಾವ ಆ ಟ್ರಂಕಿನ ಬೀಗವನ್ನು ಎಲ್ಲರನ್ನೂ ಕೂರಿಸಿಕೊಂಡು ಸಮಕ್ಷಮ ಒಡೆದ. ಎಲ್ಲರೂ ಅಜ್ಜಿಯ ಬಹಳ ಕಾಲದ ಜೋಪಾನದ ಟ್ರಂಕಿನಲ್ಲಿ ಏನಿಲ್ಲ ಎಂದರೂ ಒಂದು ಕೆ. ಜಿ. ಬಂಗಾರ, ಹಲವು ಸಾವಿರ ರುಪಾಯಿ ಹಣವನ್ನು ನಿರೀಕ್ಷೆ ಮಾಡಿದ್ದರು.

ಒಡೆದು ನೋಡಿದರೆ ಅದರಲ್ಲಿ ಇದ್ದದ್ದು ಕೆಲಸಕ್ಕೆ ಬಾರದ ಒಂದಿಷ್ಟು ಹಳೆಯ ಬಟ್ಟೆ.

ಅದರಲ್ಲಿ ಏನೋ ಮಹಾ ಇದೆಯೆಂದು ಸೋಗು ಹಾಕಿ ತಮ್ಮಂತಹ ವಿದ್ಯಾವಂತರು, ಬುದ್ದಿವಂತರನ್ನೆಲ್ಲಾ ಮಂಕು ಮಾಡಿ ತಮ್ಮೆಲ್ಲರಿಂದ ಬೇಕುಬೇಕಾದ ಹಾಗೆ ಸೇವೆಮಾಡಿಸಿಕೊಂಡ ಅಜ್ಜಿ ಮಹಾ ಬುದ್ದಿವಂತೆಯೋ ಬುದ್ದಿವಂತೆ ಎಂದು ಎಲ್ಲರೂ ತಮ್ಮ ದಡ್ಡತನಕ್ಕೆ ನಕ್ಕೂ ನಕ್ಕೂ ಸತ್ತರು.

ಕಳ್ಳನನ್ನು ಕಂಡುಹಿಡಿದ ಕುರುಡ

ಸಂತೆಯ ದಿನ ಪೇಟೆಯ ರಸ್ತೆ ಪಕ್ಕದಲ್ಲಿ ಕುರುಡನೊಬ್ಬ ಬೇಡುತ್ತಿದ್ದ. ' ನೋಡಿ ಸರ್ .. ಕಣ್ಣಿಲ್ಲ , ಕುರುಡ , ದಯವಿಟ್ಟು ಧರ್ಮ ನೀಡಿ ಸರ್ ' ಎಂದು ವಿನೀತ ಧ್ವನಿಯಲ್ಲಿ ಬೇಡುತ್ತಲೇ ಇದ್ದ. ಒಂದೇ ಥರ ಅಲ್ಲ. ಪರಿ ಪರಿಯಾಗಿ ಬೇಡಿಕೊಳ್ಳುತ್ತಿದ್ದ. ದಾರಿಯಲ್ಲಿ ಸಾಗುವವರು ಅವನ ಕೇಳಿಕೆಗೆ ಮನಸೋತು ಎರಡು, ಐದು, ಹತ್ತು ರುಪಾಯಿ... ಹೀಗೆ.. ಹೀಗೆ ಹಾಕಿ ಹೋಗುತ್ತಿದ್ದರು. ಯಾರೋ ಒಬ್ಬ ಧಾರಾಳಿ ಐವತ್ತು ರೂಪಾಯಿನ ನೋಟೊಂದನ್ನು ಹಾಕಿ ಹೋದದ್ದು ಅಲ್ಲಿಯೇ ಸಾಗುತಿದ್ದ ನನ್ನ ಕಣ್ಣಿಗೆ ಬಿತ್ತು.

ನನಗೂ ಏಕೋ ಅವನೆಡೆಗೆ ಮನಸ್ಸು ಹೋಯಿತು. ನನ್ನಲ್ಲಿ ಚಿಲ್ಲರೆ ಇಲ್ವಲ್ಲಪ್ಪಾ ಎಂದೆ. 'ನೋಟು ಹಾಕಿ ಚಿಲ್ಲರೆ ತೆಕ್ಕೊಳ್ಳಿ ಸ್ವಾಮಿ' ಎಂದ. ನಾನು ಒಂದು ನೋಟನ್ನು ಹಾಕಿ ಚಿಲ್ಲರೆಯೆಂದು ಮತ್ತೊಂದು ನೋಟನ್ನು ತೆಗೆಯುವುದರಲ್ಲಿದ್ದೆ. ಅಷ್ಟು ಹೊತ್ತಿಗೆ ತಟ್ಟನೆ ಆತ ನನ್ನ ಕೈ ಹಿಡಿದುಕೊಂಡು ಬಿಟ್ಟ. ' ಏನ್ರೀ.... ನೋಡಲಿಕ್ಕೆ ದೊಡ್ಡ ಸಂಭಾವಿತರ ಹಾಗೆ ಸರಿಯಾಗಿ ಕಾಣುತ್ತಿದ್ದೀರಿ. ಏನೋ ಕಣ್ಣಿಲ್ಲ ಕುರುಡ ಅಂತ ಬಿಕ್ಷೆ ಬೇಡೋಕೆ ಕುಂತುಕೊಂಡರೆ ನನಗೇ ಮೋಸ ಮಾಡ್ತೀರಲ್ಲ. ಮೊದಲು ಇಡ್ರೀ ಅದನ್ನ.' ಎಂದು ನನ್ನನ್ನು ಜೋರಿನ ಧ್ವನಿಯಲ್ಲಿ ಕಣ್ಣು ಬಿಟ್ಟು ಹೆದರಿಸಿದ. ಅವನ ಗಲಾಟೆ ಕೇಳಿ ಸಂತೆಗೆ ಬಂದ ಜನ ನಮ್ಮಿಬ್ಬರನ್ನು ಕುತೂಹಲದಿಂದ ಸುತ್ತುವರಿದರು. ಗುಜು ಗುಜು ಗಲಭೆ ಶುರುವಾಯಿತು. ನಾನೂ ಮರ್ಯಾದೆ ಉಳಿಸಿಕೊಳ್ಳಬೇಕಲ್ಲ !. ' ಯಾಕಪ್ಪ.. ಧರ್ಮ ನೀಡಲಿಕ್ಕೆ ಬಂದರೆ ಹಾಗೆ ಗದರಿಸುತ್ತೀಯೆ' ಎಂದೆ.

" ಏನ್ರೀ ನೀವು ಮನುಷ್ಯರಾ... ಚಿಲ್ಲರೆಯಿಲ್ಲ ಎಂದು ಹೇಳಿ ಐದು ರುಪಾಯಿ ನೋಟು ಹಾಕಿ ಐವತ್ತು ರುಪಾಯಿ ನೋಟು ತೆಗಿತಿದ್ದೀರಲ್ಲಾ " ಎಂದು ಎಲ್ಲರೆದುರು ಕೂಗಾಡಿಬಿಟ್ಟ.

ನಮ್ಮ ವಿವಾಹ ಸಂಸ್ಕಾರದ ವಿಧಿ - ವಿಧಾನಗಳು

ಪ್ರಸ್ತುತಿ : ಎಂ.ಗಣಪತಿ ಕಾನುಗೋಡು.

ವಿವಾಹ ಸಂಸ್ಕಾರವೂ ಬ್ರಾಹ್ಮಣನಿಗೆ ಆಗಬೇಕಾದ ಹದಿನಾರು ಸಂಸ್ಕಾರಗಳಲ್ಲಿ ಹದಿನೈದನೆಯದು. ನಮ್ಮ ವಿವಾಹ ಸಂಸ್ಕಾರದಲ್ಲಿ ಇಪ್ಪತ್ತೊಂದು ವಿಧಿ - ವಿಧಾನಗಳಿವೆ. ಅವುಗಳ ಹೆಸರನ್ನು ಮಾತ್ರ ಇಲ್ಲಿ ಪ್ರಸ್ಥಾಪಿಸಲಾಗಿದೆ. ಇದರ ಜೊತೆಜೊತೆಯಾಗಿ, ಇದಕ್ಕೆ ಪೂರಕವಾಗಿ ಸುಮಂಗಲೆಯರು ನಡೆಸುವ ಪದ್ಧತಿಗಳೂ ಅನೇಕ ಇವೆ. ಅವುಗಳನ್ನು ಈಗ ಪ್ರಸ್ಥಾಪಿಸಲಾಗುತ್ತಿಲ್ಲ.

1 . ವರಾಗಮನ. 2 . ವಾಗ್ದಾನ 3 . ಮಧುಪರ್ಕ 4 . ನಿರೀಕ್ಷೆ 5 . ಕನ್ಯಾದಾನ 6 . ಅಕ್ಷತಾರೋಹಣ ಮತ್ತು ಮಾಂಗಲ್ಯಧಾರಣೆ 7 . ಪಾಣಿಗ್ರಹಣ 8 . ಸಪ್ತಪದಿ 9 . ವಿವಾಹ ಹೋಮ 10 . ಅಶ್ಮಾರೋಹಣ [ ವಧುವು ಅರಳನ್ನು ಸಮರ್ಪಿಸುತ್ತ ಹೋಮಕುಂಡವನ್ನು ಪ್ರದಕ್ಷಿಣೆ ಮಾಡುವುದು.] 11 . ವ್ರತಗ್ರಹಣ ಹೋಮ 12 . ಔಪಾಸನ ಹೋಮ 13 . ಆರುಂಧತೀ [ಅರುಂಧತೀ ಎನ್ನುವುದು ವಾಡಿಕೆಯಲ್ಲಿದೆ] ಮತ್ತು ಧ್ರುವನಕ್ಷತ್ರದರ್ಶನ 14 . ಚತುರ್ಥೀ [ ಪಕ್ವ] ಹೋಮ 15 . ವ್ರತವಿಸರ್ಜನ ಹೋಮ 16 . ಉಪಸಂವೇಶನ 17 ಸ್ಥಾಲೀಪಾಕ ಹೋಮ 18 . ಓಕುಳಿ 19 . ಸಮಾರೋಪಣ 20 .ವಧೂಪ್ರವೇಶ 21 . ಗೃಹಸ್ಥಾಶ್ರಮ ವಿಧಿ

ತಾರೀಖು : 04 - 12 -2014

ಮಾಹಿತಿಯ ಕೃಪೆ : ವಿದ್ವಾನ್ ಹೇರಂಭ. ಆರ್. ಭಟ್ಟ ಅಗ್ಗೆರೆ. [ಅವರ ' ಸನಾತನ ಸಂಸ್ಕಾರಗಳು ' ಪುಸ್ತಕದಿಂದ]

ಒಂದು ಚಿಂತನೆ :

ಎಡ ವಯಸ್ಸಿನಲ್ಲಿ ಹೆಂಡತಿಯನ್ನು ಕಳೆದುಕೊಳ್ಳುವುದು ಗಂಡಸಿಗೆ ಬಹಳ ಕಷ್ಟ.
ಕಾರಣ :
+ ಅವನು ತನ್ನ ಜೀವನದಲ್ಲಿ ಪ್ರತಿಯೊಂದಕ್ಕೂ ಹೆಂಡತಿಯನ್ನೇ ಅವಲಂಬಿಸಿರುತ್ತಾನೆ. ಹೆಂಡತಿ ಹಾಗಲ್ಲ. ತನ್ನ ದಿನನಿತ್ಯದ ಬೇಕುಗಳಿಗೆಲ್ಲಾ ತನ್ನನ್ನೇ ಅವಲಂಬಿಸಿರುತ್ತಾಳೆ.
+ ಹೆಂಡತಿ ತನ್ನ ಗಂಡನನ್ನು ಆಶಿಸಿ ಸಲಹಿದ ಹಾಗೆ ಮಕ್ಕಳು ತಂದೆಯನ್ನು ಅಷ್ಟೊಂದು ಆಶೆಪಡುವುದಿಲ್ಲ. ತಾಯಿಯ ವಿಚಾರದಲ್ಲಿ ಹಾಗಲ್ಲ. ಮಕ್ಕಳು ಅವಳನ್ನು ತಂದೆಗಿಂತ ಹೆಚ್ಚಿನ ಪ್ರೀತಿಯಿಂದ ನೋಡುತ್ತಾರೆ.
+ ಗಂಡಸು ಸಂಸಾರದೊಳಗಿನ ಕೆಲಸಗಳಲ್ಲಿ ಭಾಗಿಯಾಗುವುದು ಕಡಿಮೆ. ಹೆಂಗಸು ಹಾಗಲ್ಲ. ಅವಳು ಮಗ,ಸೊಸೆ, ಮೊಮ್ಮಕ್ಕಳ ಮೇಲೆ ಮೈಮುಟ್ಟಿ ಕಾಳಜಿ ವಹಿಸುತ್ತಾಳೆ. ಹಾಗಾಗಿಯೇ ಅವಳನ್ನು ಕುಟುಂಬದ ಸದಸ್ಯರು ಅಶೆಪಡುತ್ತಾರೆ. ಗಂಡಸಿನ ಚಹರೆ ಹಾಗಲ್ಲ.
+ ಹಣ ಕಾಸಿನ ನೆರವನ್ನು ಜೀವಂತ ಇದ್ದಾಗ ಗಂಡ ಹೆಂಗಸಿಗೆ ನೀಡಿರುತ್ತಾನೆ. ನಂತರ ಮಕ್ಕಳು ಅವಳಿಗೆ ಆ ನೆರವನ್ನು ನೀಡುತ್ತಾರೆ.[ ಈಗಿನ ಸ್ತ್ರೀ ದುಡಿಮೆಯ ಸನ್ನಿವೇಶ ಒಂದು ಅಪವಾದ]. ಈ ಮೂಲಭೂತ ವ್ಯವಸ್ಥೆಯಿಂದಾಗಿ ಹೆಂಗಸು ' ಪಡೆದುಕೊಳ್ಳುವ ' ಸ್ವಭಾವವನ್ನು ರೂಡಿಸಿಕೊಂಡಿರುತ್ತಾಳೆ. ಗಂಡಸು ವಯಸ್ಸಾಗುತ್ತಾ ಬಂದಂತೆಲ್ಲಾ ಎಲ್ಲದಕ್ಕೂ ಕುಟುಂಬದ ಇತರ ಸದಸ್ಯರನ್ನು ಅವಲಂಬಿಸುವುದು ಅನಿವಾರ್ಯ. ಆಗ ಅವನಿಗೆ ಅನಾಥ ಪ್ರಜ್ಞೆ ಮೂಡುತ್ತದೆ. ಹೆಂಗಸಿಗೆ ಹಾಗಾಗುವುದಿಲ್ಲ. ಏಕೆಂದರೆ ಅವಳು ಆ ಸ್ವಭಾವವನ್ನು ತನ್ನ ಜೀವನದ ಪ್ರಾರಂಭದಿಂದಲೇ ರೂಢಿಸಿಕೊಂಡಿರುತ್ತಾಳೆ.
+ ಒಮ್ಮೆ ಗಂಡಸಿಗೆ ಕುಟುಂಬದ ಇತರ ಸದಸ್ಯರಿಂದ ಒಳ್ಳೆಯ ಸ್ಪಂದನ ಸಿಕ್ಕರೂ ಕೂಡ ಅವು ಯಾವುದೂ ತನ್ನ ಹೆಂಡತಿಯಿಂದ ದೊರಕಿದಷ್ಟು ಮನಸ್ಸಿಗೆ ಸಮಾಧಾನವಾಗುವುದಿಲ್ಲ.

ತೀರ್ಮಾನ :
ಹಾಗಾಗಿ ಗಂಡನಾದವನು ಹೆಂಡತಿಗೆ " ದೀರ್ಘ ಸುಮಂಗಲೀ ಭವ " ಎಂದು ಹಾರೈಸುವುದು ಅನಿವಾರ್ಯ. 

krupe : M Ganapathi Kangod
5/Dec/2014

ಬಾ ಲ ಗ್ರ ಹ

 ಪ್ರಸ್ತುತಿ : ಎಂ. ಗಣಪತಿ ಕಾನುಗೋಡು.

ಬಾಲಗ್ರಹವೂ ಒಂದು ವಿಧದ ಮೂರ್ಛೆರೋಗ. ಇದಕ್ಕೆ ಇಂಗ್ಲಿಷ್ ನಲ್ಲಿ Febrile convulsion ಎನ್ನುತ್ತಾರೆ. ಇದು ಆರು ತಿಂಗಳಿನಿಂದ ಐದು ವರ್ಷದೊಳಗಿನ ಮಕ್ಕಳಲ್ಲಿ ಕಾಣುವ ಮೂರ್ಛೆ. ಮಕ್ಕಳಿಗೆ ಆಗಲಿ ಅಥವ ದೊಡ್ಡವರಿಗೆ ಆಗಲಿ ಈ ರೋಗವು ಮೆದುಳಿನಲ್ಲಿ ಉಂಟಾಗುವ ವಿದ್ಯುತ್ ತರಂಗಗಳ ವ್ಯತ್ಯಾಸದಿಂದ ಮತ್ತು ರಾಸಾಯನಿಕ ಪ್ರಕ್ರಿಯೆಗಳ ಬದಲಾವಣೆಗಳಿಂದ ಕಾಣಿಸಿಕೊಳ್ಳುತ್ತದೆ. ಈ ದೋಷದಿಂದ ಮೆದುಳಿನ ಪ್ರಕ್ರಿಯೆಯಲ್ಲಿ ಬದಲಾವಣೆಯುಂಟಾಗಿ ಮೂರ್ಛೆ ಬರುತ್ತದೆ.
ಬಾಲಗ್ರಹ ಇರುವ ಮಕ್ಕಳಲ್ಲಿ ಜ್ವರ ಬಂದಾಗ ಮಾತ್ರ ಮೂರ್ಛೆ ಕಾಣಿಸಿಕೊಳ್ಳುತ್ತದೆ. ಸಾಮಾನ್ಯವಾಗಿ ಐದು, ಆರು ವರ್ಷಗಳ ನಂತರ ಇಂಥಹ ಮಕ್ಕಳಲ್ಲಿ ಈ ಕಾಯಿಲೆ ನಿಂತು ಹೋಗುತ್ತದೆ. ಜ್ವರ ಬಂದಾಗ ಸೂಕ್ತ ಆರೈಕೆ ಮಾಡುವುದರಿಂದ ಇಂಥಹ ಬಾಲಗ್ರಹ ಬಾಧೆಯನ್ನು ತಪ್ಪಿಸಬಹುದು.
ಬಾಲಗ್ರಹದ ಬಾಧೆ ಸಾಮಾನ್ಯ ಮಟ್ಟದಲ್ಲಿ ಇರುವ ಮಕ್ಕಳಿಗೆ ಸಾಂದರ್ಭಿಕ ಔಷಧ ಸೇವನೆ ಸಾಕು. ಸತತವಾದ ಔಷಧ ಸೇವನೆಯ ಅಗತ್ಯವಿರುವುದಿಲ್ಲ. ಆದರೆ ಕೆಲವು ಮಕ್ಕಳಿಗೆ ಈ ತೊಂದರೆ ತೀವ್ರ ಪ್ರಮಾಣದಲ್ಲಿ ಇರುತ್ತದೆ. ಇಂಥಹ ತೀವ್ರ ಪ್ರಮಾಣದ ಬಾಲಗ್ರಹಕ್ಕೆ ಇಂಗ್ಲಿಷ್ ನಲ್ಲಿ Complex febrile seizures ಎನ್ನುತ್ತಾರೆ. ಇಂಥಹ ರೋಗಪೀಡಿತ ಮಕ್ಕಳಿಗೆ ಮಾತ್ರ ಸತತವಾಗಿ ಎರಡು ವರ್ಷ ಔಷಧದ ಸೇವನೆಯು ಅಗತ್ಯವಾಗಿರುತ್ತದೆ. ಯಾವುದಕ್ಕೂ ಇಂಥಹ ರೋಗಬಾಧಿತ ಮಗುವನ್ನು ಕೂಡಲೆ ನರರೋಗತಜ್ಞರಿಂದ ತಪಾಸಣೆಗೊಳಿಸಬೇಕು.
ಮೂರ್ಛೆ ಬಂದಾಗ ಮಗುವಿನ ಪೋಷಕರು ಗಾಬರಿಗೊಳ್ಳದೆ ಶಾಂತಿಯಿಂದ ಇರಬೇಕು. ಇದು ಮಾರಕ ರೋಗವಲ್ಲ ಎನ್ನುವುದನ್ನು ಅರಿತಿರಬೇಕು. ಮೂರ್ಛೆ ಬಂದ ಕೂಡಲೆ ಮಗುವನ್ನು ಮಗ್ಗುಲಾಗಿ ಮಲಗಿಸಬೇಕು. ಅದು ಧರಿಸಿದ ಬಟ್ಟೆಯನ್ನು ಸಡಿಲಗೊಳಿಸಬೇಕು. ಅದಕ್ಕೆ ಚೆನ್ನಾಗಿ ಗಾಳಿ, ಬೆಳಕು ಸಿಗುವಂತೆ ನೋಡಿಕೊಳ್ಳಬೇಕು. ಅಂಥಹ ಸಂದರ್ಭದಲ್ಲಿ ಮಗುವಿನ ಶರೀರವನ್ನು ಬಾಗಿಸುವುದಾಗಲಿ, ಅದರ ಒದ್ದಾಟದ ಚಲನೆಯನ್ನು ಬಲಾತ್ಕಾರವಾಗಿ ನಿಲ್ಲಿಸುವುದಾಗಲಿ ಮಾಡಕೂಡದು. ಅದು ಹಲ್ಲು ಕಚ್ಚಿಹಿಡಿಯಬಾರದೆಂದು ಅಥವ ನಾಲಿಗೆ ಕಚ್ಚಬಾರದೆಂದು ಬಾಯಿಗೆ ಚಮಚವನ್ನೋ, ಇನ್ನಾವುದೋ ವಸ್ತುವನ್ನು ಬಾಯೊಳಗೆ ಅಡ್ಡ ಇಡಬಾರದು. ಅಂಥಹ ಸಂದರ್ಭದಲ್ಲಿ ಮಗುವಿನ ಹತ್ತಿರ ಅಪಾಯಕಾರಿ ವಸ್ತುಗಳನ್ನು ಇಡಬಾರದು. ಮಗುವಿಗೆ ಪೂರ್ಣ ಪ್ರಜ್ಞೆ ಬರುವ ತನಕ ಕುಡಿಯಲು ಅಥವ ತಿನ್ನಲು ಏನನ್ನೂ ಕೊಡಬಾರದು. ಮೂರ್ಛೆ ಬಂದಾಗ ಮುಖದ ಎದುರಿಗೆ ಚಿಟಿಕೆ ಹಾಕುವುದು, ಕೈಗೆ ಕಬ್ಬಿಣ ಹಿಡಿಸುವುದು, ಈರುಳ್ಳಿ ಅಥವ ಚಪ್ಪಲಿಯನ್ನು ಮಗುವಿನ ಮೂಗಿಗೆ ಹಿಡಿದು ಮೂಸಿಸುವ ಪ್ರಯತ್ನ ಮಾಡುವುದು ಇತ್ಯಾದಿ ಕ್ರಿಯೆಗಳಿಂದ ಮಗು ಎಚ್ಚರಗೊಳ್ಳುತ್ತದೆ ಎಂಬುದು ಮೂಢನಂಬಿಕೆಯೇ ವಿನಃ ವೈಜ್ಞಾನಿಕ ಆಧಾರಿತವಲ್ಲ.
ತಾರೀಖು : 26 - 11 - 2014
ಮಾಹಿತಿಯ ಕೃಪೆ : ಡಾ|| ಎ .ಶಿವರಾಮಕೃಷ್ಣ .ನರರೋಗತಜ್ಞರು. ಶಿವಮೊಗ್ಗ. [ಅವರ " ಮೆದುಳಿನ ಕಾಯಿಲೆಗಳು " -- ಪುಸ್ತಕದಿಂದ ].

ಸಂಕ್ರಮಣದ ಸ್ಥಿತಿಯಲ್ಲಿ ಇಂದಿನ ನವದಂಪತಿಗಳ ಬದುಕು

ಇಂದಿನ ತೀವ್ರಗಾಮಿ ಚಲನೆಯ ಸಮಾಜದಲ್ಲಿ ಯುವತಿಯರು ಯುವಕರಿಗೆ ಸರಿಸಮನಾಗಿ ವಿದ್ಯಾರ್ಹತೆ, ಸ್ವಂತ ದುಡಿದು ಹಣ ಗಳಿಸಬೇಕೆನ್ನುವ ಹಪಾಹಪಿ, ಗಂಡಿನ ಆಧಾರವಿಲ್ಲದೆ ಒಬ್ಬಂಟಿಯಾಗಿ ಮುನ್ನುಗ್ಗುವ ದಾಷ್ಟ್ಯ ...... ಈ ಎಲ್ಲವನ್ನು ಹೊಂದಿದ್ದಾರೆ. ಇದರ ಪರಿಣಾಮವಾಗಿ ಹೆಚ್ಚಿನ ಭಾಗದ ಯುವತಿಯರಿಗೆ ಜೀವನೋಪಾಯಕ್ಕಾಗಿ ಹಿಂದಿನಂತೆ ಪುರುಷನನ್ನು ಅವಲಂಬಿಸುವ ಅಗತ್ಯವಿಲ್ಲ. ಇದಕ್ಕೆಲ್ಲ ಕಾರಣ ಅವರು ಹೊಂದಿರುವ ಆರ್ಥಿಕ ಸ್ವಾವಲಂಬನೆ.
ಇಲ್ಲಿ ಒಂದು ಪ್ರಶ್ನೆ ಇದೆ. ಪುರುಷನಿಗೆ ಆಗಲಿ ಮಹಿಳೆಗೆ ಆಗಲಿ, ಹಣವೊಂದೇ ಜೀವನದ ಏಕಮೇವ ಪೂರೈಕೆಯೇ? ಅಲ್ಲ. ಬದುಕಿನ ಅನೇಕ " ಬೇಕು " ಗಳಲ್ಲಿ ಹಣವು ಒಂದು ಅಷ್ಟೆ. ಆದರೆ ಹಣವೊಂದರಿಂದಲೇ ಬದುಕಿನ ಎಲ್ಲ ಬಯಕೆಗಳನ್ನು ನಿಭಾಯಿಸಿಕೊಳ್ಳಲು ಸಾಧ್ಯವಿಲ್ಲ. ಮನುಷ್ಯನ ಅನೇಕ " ಬೇಕು " [ Wants ] ಗಳಲ್ಲಿ ಒಂದು ಹೆಣ್ಣಿಗೆ ಒಂದು ಗಂಡು, ಒಂದು ಗಂಡಿಗೆ ಒಂದು ಹೆಣ್ಣು ಬೇಕು ಎನ್ನುವುದು ಪ್ರಮುಖ. ಈ 'ಬೇಕು' ಅನೇಕ ಕಾರಣಗಳಿಂದ ಒಂದು ಅಗತ್ಯ. ಇದರಿಂದಾಗಿಯೇ ' ವಿವಾಹದ ಪರಿಕಲ್ಪನೆ ' ಹುಟ್ಟಿಕೊಂಡಿದ್ದು.
ಇವತ್ತಿನ ದುಡಿಮೆಯ ಸುಪತ್ತಿಗೆಯಲ್ಲಿ ಆ ಕ್ಸೇತ್ರದಲ್ಲಿರುವ ಎಲ್ಲ ಯುವಜನರಿಗೂ ಹಣದ ಜಲದ ಬುಗ್ಗೆ [ Foutain ] ಅವರ ಅಂಗೈಯಲ್ಲೇ ಇದೆ. ಈ ಅಮಲಿನಲ್ಲಿ ದಾಂಪತ್ಯದ ಬಾಂಧವ್ಯ ಬಹುತೇಕ ಯುವಜನರಲ್ಲಿ ಶಿಥಿಲವಾಗುತ್ತಿದೆ. ಯಾರಿಗೆ ಯಾರೂ ಕೇರ್ ಮಾಡುವ ಸ್ಥಿತಿಯಲ್ಲಿಲ್ಲ. ಏಕೆಂದರೆ ತನ್ನ ಹೊಟ್ಟೆಗೆ ಯಾರೂ ಏನು ದುಡಿದು ಹಾಕುವ ಅನಿವಾರ್ಯತೆ ಇಲ್ಲ. ಹಣದ ಎದುರು ಬದುಕಿನ ಉಳಿದ ಎಲ್ಲಾ 'ಬೇಕು 'ಗಳು ಅವರಿಗೆ ಈಗ ಗೋಚರಿಸುವುದಿಲ್ಲ.
ಇದರ ಪರಿಣಾಮ ವಿಚ್ಚೇದನ . ನಂತರ ತನ್ನ ಮಾತನ್ನೇ ಕೇಳುವಂಥಹ ಸಂಗಾತಿಗಾಗಿ ಶೋಧನೆ, ಅಂಥಹವರು ಸಿಕ್ಕಿದರೆ ತನ್ನ ಕರಾರುಗಳನ್ನು ಮುಂಚೆಯೇ ಮಂಡಿಸಿ ಅದು ಓ. ಕೆ . ಆದರೆ ನಂತರ ಮದುವೆ. ಆ ಮದುವೆಯಿಂದಾದ ದಾಂಪತ್ಯವೂ ಸಾಪ್ರದಾಯಿಕವಾದುದಲ್ಲ. ಅದು " Get together " ಮಾದರಿ. ಇದೇ ಸಂಕ್ರಮಣದ ಸ್ಥಿತಿಯಲ್ಲಿ ಇಂದಿನ ನವದಂಪತಿಗಳ ಬದುಕು.
ಒಮ್ಮೆ ವಿಚ್ಚೇದನವಾಗದಿದ್ದರೂ ಬಹು ದಂಪತಿಗಳಲ್ಲಿ ಸಾಮರಸ್ಯವಿರುವುದಿಲ್ಲ. ಅದು ಶಿಥಿಲ ದಾಂಪತ್ಯ. ಪರಸ್ಪರ ಭಿನ್ನಾಭಿಪ್ರಾಯ, ಬದ್ಧತೆಯ ಕೊರತೆ, ಯಾರಿಗೆ ಯಾರೂ ಸೋಲುವುದಿಲ್ಲ. ಪರಸ್ಪರರ ಮೇಲೆ ಮಕ್ಕಳನ್ನೇ ಅಸ್ತ್ರವನ್ನಾಗಿ ಪ್ರಯೋಗಿಸುವುದು, ಮಕ್ಕಳಲ್ಲಿಯೂ ತಂದೆ ಅಥವಾ ತಾಯಿಯ ಮೇಲೆ ದ್ವೇಷ ಹುಟ್ಟುವಂತೆ ಪರಸ್ಪರರು ಮಾಡುವುದು, ಇದರಿಂದಾಗಿ ಮಕ್ಕಳ ಭವಿಷ್ಯ ಅಧೋಗತಿಗೆ ಹೋಗುವುದು ಮುಂತಾದುವು ಇಂಥಹ ಶಿಥಿಲ ದಾಂಪತ್ಯದಲ್ಲಿ ಕಂಡು ಬರುತ್ತವೆ.
ಗಂಡು - ಹೆಣ್ಣು ಜೊತೆಗಿರಬೇಕು ಎಂದರೆ ಮದುವೇನೆ ಆಗಬೇಕಾ ?. ಏನೂ ಮಾಡ್ಕೊಳ್ಳದೆ ಸುಮ್ಮನೆ ಕೂಡಿಕೊಂಡಿದ್ದರೆ ಆಗಲ್ವಾ ?. ಗಂಡು ಮತ್ತು ಹೆಣ್ಣು ಸರಿಸಮಾನವಾಗಿ ಕೈತುಂಬಾ ಹಣವನ್ನು ಕಿವುಚುವ ಇಂದಿನ ಕಾಲದಲ್ಲಿ, ಎಲ್ಲರೂ ಅಲ್ಲದಿದ್ದರೂ, ಬಹಳ ಹೆಣ್ಣು - ಗಂಡುಗಳು ತಮ್ಮಲ್ಲಿಯೇ ಕೇಳಿಕೊಳ್ಳುತ್ತಿರುವ ಪ್ರಶ್ನೆಗಳು ಇವು.
ಈ ಗೋಜಲಿನಲ್ಲಿ ವರ್ಷಗಳು ಉರುಳುತ್ತವೆ. ಯೌವನವೂ ಅದರ ಜೊತೆಗೆ ಸಾಗುತ್ತಿರುತ್ತದೆ. ಮುಪ್ಪು ಹತ್ತಿರ ಬಂದಿರುತ್ತದೆ. ಹುಳಿ ಮುಪ್ಪಾಗುತ್ತದೆಯೋ ಇಲ್ಲವೋ ಗೊತ್ತಿಲ್ಲ. ಮರವಂತೂ ಮುಪ್ಪಾಗುತ್ತದೆ. ಯುವಕ ತನ್ನ ಹಳೆತನಕ್ಕೆ ತಲುಪಿ ಚರ್ಮ ಸುಕ್ಕುಗಟ್ಟುತ್ತಿರುವುದನ್ನು ಅನುಭವಿಸುತ್ತಾನೆ. ಯುವತಿಗೆ ಮುಟ್ಟು ಸಾವರಿಸುವ ಹಂತ ಬಂದಿರುತ್ತದೆ.
ಈ ಹಂತದಲ್ಲಿ ಬದುಕಿನ ವಾಸ್ತವಾಂಶ ಅರಿವಿಗೆ ಬರುತ್ತದೆ. ಈ ಸಮಯದಲ್ಲಿ ಮನುಷ್ಯನ ಬಯಕೆಗಳನ್ನು ನಿಭಾಯಿಸಿಕೊಳ್ಳಲು ' ಹಣ ' ವೊಂದೇ ಸಾಲದು. ಜೀವನದಲ್ಲಿ ಒಬ್ಬ ಮನುಷ್ಯನಿಗೆ ಮತ್ತೊಬ್ಬ ಮನುಷ್ಯ ಬೇಕು. ಅದರಂತೆಯೇ ಕೌಟುಂಬಿಕ ಜೀವನದಲ್ಲಿ ಒಂದು ಹೆಣ್ಣಿಗೆ ಗಂಡು ಬೇಕು. ಒಂದು ಗಂಡಿಗೆ ಒಂದು ಹೆಣ್ಣು ಬೇಕು. ಭೌತಿಕ ಅವಲಂಬನೆ ಎನ್ನುವುದು ಒಂದು ಅನಿವಾರ್ಯ ಸಂಗತಿ. ಸರಿಯಾದ ದಾಂಪತ್ಯವನ್ನು ರೂಪಿಸಿಕೊಳ್ಳಬೇಕು. ಬದ್ಧತೆ, ಒಡಂಬಡಿಕೆ, ನೆಮ್ಮದಿ, ಸುಗಮ ಸಾಂಗತ್ಯ ಇರಬೇಕು ಎಂದು ಅರಿವಾಗುವುದು. ಈ ಸೌಹಾರ್ದತೆಯಲ್ಲಿ ಸಂಸಾರ, ಮಕ್ಕಳು .... ಇವನ್ನೆಲ್ಲ ರೂಪಿಸಿಕೊಳ್ಳಬೇಕಾಗಿತ್ತು, ತಾವು ತಮ್ಮ ದಾಂಪತ್ಯದ ಪ್ರಥಮದಲ್ಲಿ ಮಕ್ಕಳನ್ನು ಹೊಂದಿ ನಾವು ಪೋಷಿಸಬೇಕಾಗಿತ್ತು. ತಮ್ಮ ಸುಗಮ ದಾಂಪತ್ಯದ ಮಾತ್ರದಿಂದ ಮಾಡಿದ ಪೋಷಣೆಯಿಂದ ಬೆಳೆದ ಮಕ್ಕಳು ಸಮರ್ಥರಾಗಿ ಇಳಿವಯಸ್ಸಿನಲ್ಲಿ ತಮಗೆ ಪೋಷಕರಾಗಲು ಸಾಧ್ಯವಾಗಿತ್ತು ಎಂಬ ಪ್ರಜ್ಞೆ ಕಾಲ ಮೀರಿದ ಮೇಲೆ ಅವರಿಗೆ ಬರುತ್ತದೆ. ಅಲ್ಲಿಯವರೆಗೂ ಯೌವನದ ಅವಧಿ ಅಲ್ಪ, ಅದು ಬೇಗ ಕಳೆದುಹೋಗುತ್ತದೆ, ಯಾವುದಕ್ಕೂ ಕಾಲವನ್ನೇ ಅನುಸರಿಸಿಕೊಂಡು ಜೀವನದ ಮಿತ ವಿಸ್ತಾರವನ್ನು ಅರಿತು ಮುನ್ನಡೆಯಬೇಕು ಎಂಬ ಸತ್ಯವನ್ನು ಗಮನಿಸುವ ಗೋಜಿಗೆ ಅವರು ಹೋಗಿರುವುದಿಲ್ಲ. ಈ ಸತ್ಯಗಳನ್ನು ತಿಳಿಯುವ ಹೊತ್ತಿಗೆ ಅವರಿಗೆ ಹಲ್ಲು ಬೀಳುವ ಕಾಲ ಬಂದಿರುತ್ತದೆ.
ಆದ್ದರಿಂದ " ಮದುವೆ " ಎನ್ನುವುದು ಹೆಣ್ಣು ಮತ್ತು ಗಂಡು ಈ ಎರಡು ಜೀವಗಳನ್ನು ಮಾನಸಿಕವಾಗಿ, ದೈಹಿಕವಾಗಿ, ಭಾವನಾತ್ಮಕವಾಗಿ, ಹೃದಯ ಪೂರ್ವಕವಾಗಿ ಬೆಸೆಯುವಂಥಹ ಒಂದು ವಿಶೇಷ ಘಟನೆ. ಇದು ಒಬ್ಬರಿಗೊಬ್ಬರು ಸರಿಯಾಗಿ ಅರ್ಥ ಮಾಡಿಕೊಂಡು ಪರಸ್ಪರ ಪರಿಪೂರ್ಣ ಸಮರ್ಪಣೆ ಮಾಡಿಕೊಳ್ಳುವಲ್ಲಿ ಸಹಕಾರಿಯಾಗಬೇಕು. ಕೇವಲ "JUST GET TOGETHER " ಪದ್ಧತಿಯಲ್ಲಿ ಇದು ಸಾಧ್ಯವಾಗುವುದಿಲ್ಲ. ಸಾಂಪ್ರದಾಯಿಕ ಮದುವೆಯ ಮಹತ್ವ ಇರುವುದೇ ಇಲ್ಲಿ. ಅದನ್ನು ಹರಿದುಕೊಂಡು ಹದ್ದು ಮೀರಿದರೆ ಈಗಾಗಲೇ ಹೇಳಿದ ಗೊಂದಲಗಳನ್ನು ಅನುಭವಿಸಬೇಕಾಗುತ್ತದೆ.
ಮಾಡಿಕೊಂಡ ಮದುವೆಯನ್ನು ಮುರಿದುಕೊಂಡು ಇದಕ್ಕಿಂತ ಒಳ್ಳೆಯ ಸಂಗಾತಿಯನ್ನು ಪಡೆಯುತ್ತೇನೆ ಎಂದು ಕನವರಿಸಿ ಮತ್ತೊಬ್ಬನನ್ನು \ ಮತ್ತೊಬ್ಬಳನ್ನು ಕಟ್ಟಿಕೊಂಡರೆ ಸಾಂಗತ್ಯವನ್ನು ಪ್ರಯತ್ನ ಪೂರ್ವಕವಾಗಿ ನಿರ್ಮಿಸಿಕೊಳ್ಳದಿದ್ದರೆ ಅಲ್ಲಿಯೂ ದುರಂತವೇ.
ಇದ್ದಲ್ಲಿಯೇ ಕಾಡಿ ಕೂಡಿಕೊಂಡು ಹೋಗದವರು ಎಲ್ಲಿಯೂ ಹೊಂದಿಕೊಳ್ಳಲು ಕಷ್ಟಸಾಧ್ಯ. ಏಕೆಂದರೆ ಮನುಷ್ಯನ ಮನಸ್ಸು ಮತ್ತು ಸ್ವಭಾವ ಹೇಗಿರುತ್ತದೆಯೆಂದರೆ ಮತ್ತೊಬ್ಬನಿಗೆ ನಾವು ಹೊಂದಿಕೊಂಡು ಮುಂದೆ ಸಾಗಬೇಕೇ ವಿನಃ ಮತ್ತೊಬ್ಬನು ನಮಗೆ ಎಂದೂ, ಎಲ್ಲಿಯೂ, ಹೇಗೂ ಹೊಂದಿಕೊಳ್ಳುವುದಿಲ್ಲ.
~~~~~~ ಎಂ.ಗಣಪತಿ ಕಾನುಗೋಡು.
ತಾರೀಖು : 12 - 11 - 2014

ಮೂರ್ಛೆರೋಗ

ಪ್ರಸ್ತುತಿ : ಎಂ.ಗಣಪತಿ ಕಾನುಗೋಡು.
ಮೂರ್ಛೆರೋಗಕ್ಕೆ ವಿಶೇಷವಾದ ಗಮನ ಮತ್ತು ಚಿಕಿತ್ಸೆ ಬೇಕಾಗುತ್ತದೆ. ಇದಕ್ಕೆ ನರರೋಗ ತಜ್ಞರಿಂದ ಸಲಹೆಯನ್ನು ಪಡೆಯಬೇಕಾಗುತ್ತದೆ.
ಮೂರ್ಛೆರೋಗ ಮೆದುಳಿನಲ್ಲಿ ಉಂಟಾಗುವ ವಿದ್ಯುತ್ ತರಂಗಗಳ ವ್ಯತ್ಯಾಸದಿಂದ ಮತ್ತು ರಾಸಾಯನಿಕ ಪ್ರಕ್ರಿಯೆಗಳ ಬದಲಾವಣೆಗಳಿಂದ ಕಾಣಿಸಿಕೊಳ್ಳುತ್ತದೆ.ಈ ದೋಷದಿಂದ ಮೆದುಳಿನ ಪ್ರಕ್ರಿಯೆಯಲ್ಲಿ ಬದಲಾವಣೆಯುಂಟಾಗಿ ಮೂರ್ಛೆ ಬರುತ್ತದೆ.
ಪ್ರಥಮ ಚಿಕಿತ್ಸೆ :
ಮೂರ್ಛೆರೋಗ ಬಂದ ವ್ಯಕ್ತಿಯನ್ನು ಬಾಗಿಸುವುದಾಗಲಿ, ಅವರ ತಕ್ಷಣದ ಚಲನೆಗಳನ್ನು ನಿಯಂತ್ರಿಸುವುದಾಗಲಿ, ಅವರ ಬಾಯಿಗೆ ಯಾವುದಾದರೂ ವಸ್ತುಗಳನ್ನು ಅಡ್ಡ ಇಡುವುದಾಗಲೀ ಮಾಡಕೂಡದು. ಅವರನ್ನು ಒಂದೆಡೆ ಮಲಗಿಸಿ ಚೆನ್ನಾಗಿ ಗಾಳಿ, ಬೆಳಕು ಅವನಿಗೆ ಸಿಗುವಂತೆ ನೋಡಿಕೊಳ್ಳಬೇಕು. ಆ ವ್ಯಕ್ತಿಯ ಉಸಿರಾಟಕ್ಕೆ ತೊಂದರೆಯಾಗದಂತೆ ನೋಡಿಕೊಳ್ಳಬೇಕು. ಶಾಂತತೆಯನ್ನು ಕಾಯ್ದುಕೊಳ್ಳಬೇಕು. ಯಾರೂ ಗಾಬರಿಯಾಗಿ ಆ ವ್ಯಕ್ತಿಯನ್ನು ಸುತ್ತುಗಟ್ಟಬಾರದು. ಅಪಾಯಕಾರಿ ವಸ್ತುಗಳನ್ನು ದೂರವಿರಿಸಿ ಧರಿಸಿದ ಬಟ್ಟೆಯನ್ನು ಸಡಿಲಿಸಬೇಕು. ಕೆಳಗೆ ಬೀದ್ದ ವ್ಯಕ್ತಿಯನ್ನು ಮಗ್ಗುಲಾಗಿ ಮಲಗಿಸಿ ತಲೆಯ ಕೆಳಗೆ ಮೆತ್ತನೆಯ ದಿಂಬನ್ನು ಇರಿಸಬೇಕು. ಸಾಧ್ಯವಾದಸ್ಟು ಮಟ್ಟಿಗೆ ಎಷ್ಟು ನಿಮಿಷ ಮೂರ್ಛೆ ಇತ್ತು ಎಂಬುದನ್ನು ಕರಾರುವಾಕ್ಕಾಗಿ ಗಮನಿಸಬೇಕು. ಸಾಮಾನ್ಯವಾಗಿ ಕೆಲವೇ ನಿಮಿಷಗಳಲ್ಲಿ ಮೂರ್ಛೆ ತಾನಾಗಿಯೇ ನಿಲ್ಲುತ್ತದೆ. ಅಲ್ಲಿಯವರೆಗೆ ಸುತ್ತಲಿದ್ದವರು ಶಾಂತಿಯಿಂದ ಆ ವ್ಯಕ್ತಿಯನ್ನು ಮತ್ತು ಮೂರ್ಛೆ ನಿಲ್ಲುವ ಸಮಯವನ್ನು ಕಾಯಬೇಕು. ಆ ವ್ಯಕ್ತಿಗೆ ಪೂರ್ಣ ಪ್ರಜ್ಞೆ ಬರುವ ತನಕ ಕುಡಿಯಲು ಅಥವ ತಿನ್ನಲು ಏನನ್ನೂ ಕೊಡಬಾರದು. ಮೂರ್ಛೆ ಬಂದಾಗ ಚಿಟಿಕೆ ಹಾಕುವುದು,ಕೈಗೆ ಕಬ್ಬಿಣ ಹಿಡಿಸುವುದು, ಈರುಳ್ಳಿ ಅಥವ ಚಪ್ಪಲಿಯನ್ನು ಮೂಸಿಸುವುದು ಇತ್ಯಾದಿಗಳನ್ನು ಮಾಡಬಾರದು.ಇವುಗಳಿಂದ ಆ ವ್ಯಕ್ತಿಯು ಎಚ್ಚರಗೊಳ್ಳುತ್ತಾನೆಂಬುದು ಮೂಢನಂಬಿಕೆಯಷ್ಟೆ
ಐದು ನಿಮಿಷಗಳಲ್ಲಿ ಮೂರ್ಛೆ ನಿಲ್ಲದಿದ್ದಲ್ಲಿ ರೋಗಿಯನ್ನು ವ್ಯವಸ್ತಿತವಾಗಿ ವೈದ್ಯರ ಬಳಿ ಕೊಂಡೊಯ್ಯಬೇಕು. ಇದು ಅತಿ ಮುಖ್ಯ.
ಈ ರೋಗ ಹಲವಾರು ರೂಪಗಳಲ್ಲಿ ಕಾಣಿಸಿಕೊಳ್ಳುತ್ತದೆ.ಮೂರ್ಛೆಯ ಲಕ್ಷಣಗಳನ್ನು ಗಮನಿಸಿ ಇದನ್ನು ಎರಡು ವಿಧಗಳನ್ನಾಗಿ ವಿಂಗಡಿಸಲಾಗಿದೆ.
1 .ಪೂರ್ಣ ಪ್ರಮಾಣದ ಮೂರ್ಛೆ :
ಮೆದುಳಿಗೆ ಪೂರ್ಣಪ್ರಮಾಣದಲ್ಲಿ ಉಂಟಾಗುವ ವಿದ್ಯುತ್ ತರಂಗಗಳ ದೋಷದಿಂದ ಈ ರೀತಿ ಮೂರ್ಛೆ ಸಂಭವಿಸುತ್ತದೆ. ಇಂಥಹವರಲ್ಲಿ ರೋಗದ ಬಗ್ಯೆ ಯಾವುದೇ ತರಹದ ಮುನ್ಸೂಚನೆ ಕಾಣುವುದಿಲ್ಲ. ಈ ರೀತಿಯ ಪೂರ್ಣ ಪ್ರಮಾಣದ ಮೂರ್ಛೆರೋಗದಲ್ಲಿಯೂ ಸುಮಾರು ನಾಲ್ಕು ವಿಧಗಳಿವೆ. A ) .Toniclonic seizure . B ) .Absence seizure . C ) .Myoclonic seizure . D ) .Atonic seizure .
2 . ಪಾರ್ಶ್ವಿಕ ಮೂರ್ಛೆ :
ಮೆದುಳಿನ ಯಾವುದಾದರೂ ಒಂದು ಭಾಗದಲ್ಲಿ ಮಾತ್ರ ವಿದ್ಯುತ್ ತರಂಗಗಳ ದೋಷ ಉಂಟಾಗುವುದರಿಂದ ಇದು ಸಂಭವಿಸುತ್ತದೆ. ಈ ತರಹದ ಮೂರ್ಛೆರೋಗ ಇರುವವರಿಗೆ ಮೂರ್ಛೆ ಬರುವ ಮೊದಲು ಮುನ್ಸೂಚನೆಯ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಒಮ್ಮೆ ಕೆಲವು ರೋಗಿಗಳಿಗೆ ಮುನ್ಸೂಚನೆಯ ಅರಿವಾಗದಿದ್ದರೂ ಅವರನ್ನು ಗಮನಿಸುತ್ತಿರುವವರು ಮುನ್ಸೂಚನೆಯನ್ನು ಗಮನಿಸಲು ಸಾಧ್ಯವಾಗುತ್ತದೆ. ಈ ತರಹದ ಪಾರ್ಶ್ವಿಕ ಮೂರ್ಛೆಯಲ್ಲಿ ಎರಡು ವಿಧಗಳಿವೆ.
A ) ಸರಳ ಪಾರ್ಶ್ವಿಕ ಮೂರ್ಛೆ. B ) ಮಿಶ್ರ ಪಾರ್ಶ್ವಿಕ ಮೂರ್ಛೆ.
ಮೂರ್ಛೆರೋಗವನ್ನು ಮತ್ತು ಅದರ ಬಗೆಯನ್ನು ಕೇವಲ ರೋಗ ಲಕ್ಷಣಗಳಿಂದ ಮಾತ್ರ ನಿರ್ಧರಿಸಲಾಗುತ್ತದೆ. ಆದ್ದರಿಂದ ಯಾವುದೇ ವ್ಯಕ್ತಿಯಲ್ಲಿ ಮೂರ್ಛೆರೋಗದ ಲಕ್ಷಣ ಕಂಡಾಗ ಜೊತೆಯಲ್ಲಿದ್ದವರು ಗಾಬರಿಯಾಗದೆ ಆ ಸಂದರ್ಭದಲ್ಲಿ ಆವ್ಯಕ್ತಿಯಲ್ಲಿ ಕಂಡುಬರುವ ಲಕ್ಷಣಗಳನ್ನು ಸೂಕ್ಷ್ಮವಾಗಿ ಗಮನಿಸಬೇಕು. ಅದನ್ನು ವೈದ್ಯರ ಹತ್ತಿರ ವಿವರಿಸಿದರೆ ಅದು ಮೂರ್ಛೆರೋಗವೋ, ಹೌದಾದರೆ ಅದು ಯಾವ ಬಗೆಯದು ಎಂದು ವೈದ್ಯರು ನಿರ್ಧರಿಸಲು ಸುಲಭವಾಗುತ್ತದೆ. ಇಂದಿನ ಮೊಬೈಲ್ ಯುಗದಲ್ಲಿ ಅ ಸಂದರ್ಭದಲ್ಲಿ ವ್ಯಕ್ತಿಯಲ್ಲಿ ಕಂಡುಬರುವ ಬದಲಾವಣೆಗಳನ್ನು ಚಿತ್ರೀಕರಿಸಿ ವೈದ್ಯರಿಗೆ ತೋರಿಸುವುದರಿಂದ ರೋಗದ ಖಚಿತತೆಯನ್ನು ನಿರ್ಣಯಿಸಲು ಸಹಾಯವಾಗುತ್ತದೆ.
ಮೂರ್ಛೆ ರೋಗಿಗಳಲ್ಲಿ ಕಾಯಿಲೆಗೆ ಕಾರಣವನ್ನು ಪತ್ತೆ ಹಚ್ಚಲು ಮತ್ತು ಆ ರೋಗ ಯಾವ ತರಹದ್ದೆಂದು ಗುರುತಿಸಲು ಕೆಲವು ಪರೀಕ್ಷೆಗಳನ್ನು ಮಾಡಬೇಕಾಗುತ್ತದೆ. ಅವೆಂದರೆ 1 .ರಕ್ತ ಪರೀಕ್ಷೆ. 2 .ಇ. ಇ. ಜಿ. 3 . ಮೆದುಳಿನ ಸ್ಕ್ಯಾನಿಂಗ್ 4 . C . S . F Analysis .
ಮೂರ್ಛೆರೋಗಕ್ಕೆ ಸಂಬಂಧಿಸಿದ ವೈದ್ಯರ ಸಲಹೆಯಂತೆ ಸೂಕ್ತ ಔಷಧ ಸೇವನೆ ಮುಖ್ಯವಾದ ಚಿಕಿತ್ಸೆ. ಔಷಧಗಳಿಂದ ರೋಗ ಹತೋಟಿಗೆ ಬಾರದವರಲ್ಲಿ [ ಇದು ಅತಿ ಕಡಿಮೆ ] ಅಂಥಹ ರೋಗಿಗಳಿಗೆ ಶಸ್ತ್ರಚಿಕಿತ್ಸೆಯಿಂದ ರೋಗವನ್ನು ಹತೋಟಿಗೆ ತರಬಹುದು.
ಈ ಕಾಯಿಲೆಯು ಯಾವುದೇ ವಯಸ್ಸಿನಲ್ಲಾದರೂ ಕಾಣಬಹುದು. ಇದು ಮಕ್ಕಳಲ್ಲಿ ಸ್ವಲ್ಪ ಹೆಚ್ಚು. ಹಾಗೆಂದು ಬಾಲಗ್ರಹದ ವಿಚಾರ ಬೇರೆ.ಅದನ್ನೂ ತಕ್ಕ ಚಿಕಿತ್ಸೆಯಿಂದ ಗುಣಮಾಡಬಹುದು. ವೃಧ್ಯಾಪ್ಯದಲ್ಲಿ ಈ ಕಾಯಿಲೆ ಸ್ವಲ್ಪ ಕಡಿಮೆ. ಇದು ಅಂಟುರೋಗವಲ್ಲ. ಈ ರೋಗವಿದ್ದವರು ಈಜುವುದು, ವಾಹನ ಚಾಲನೆ ಮುಂತಾದುವುದರಲ್ಲಿ ಜಾಗರೂಕರಾಗಿರಬೇಕು. ಕೆಲವು ವಿಧದ ಮೂರ್ಛೆರೋಗಗಳು ಆನುವಂಶಿಕವಾಗಿ ಬರಬಹುದು. ಆದರೆ ಹೆಚ್ಚಿನ ಪ್ರಸಂಗಗಳಲ್ಲಿ ಇದು ಅನುವಂಶಿಕವಲ್ಲ ಎಂಬುದು ಮುಖ್ಯ. ಈ ರೋಗದಿಂದ ಬಳಲುವ ಎಲ್ಲರೂ ಸಮಾಜದ ಎಲ್ಲರಂತೆ ಜೀವನ ನಡೆಸಬಹುದು. ಮುಖ್ಯವಾಗಿ ಹೇಳುವುದಾದರೆ ಈ ರೋಗವಿರುವ ಗರ್ಭಿಣಿ ಸ್ತ್ರೀಯರು, ಬಾಣಂತಿಯರು ಕೂಡ ವೈದ್ಯರ ಸಲಹೆಯಂತೆ ಮಾತ್ರೆ ಸೇವನೆ ಮಾಡುತ್ತ ಇದ್ದರೆ, ಆ ಸಂದರ್ಭದಲ್ಲಿ ಅನುಸರಿಸಬೇಕಾದ ವೈದ್ಯರ ಸಲಹೆಯನ್ನು ಪಾಲಿಸಿದರೆ ಎಲ್ಲರಂತೆ ಇರಬಹುದು
ಮೂರ್ಛೆರೋಗವಿದ್ದವರು ಪಾಲಿಸಬೇಕಾದ ಅಂಶಗಳು. :
+ ಈ ರೋಗವಿದ್ದವರು ಸಂಬಂಧಿಸಿದ ವೈದ್ಯರ ಸಲಹೆಯ ಪ್ರಕಾರವೇ ಔಷಧವನ್ನು ಸೇವಿಸುವುದರಲ್ಲಿ ತಪ್ಪಬಾರದು. + ಕ್ರಮ ತಪ್ಪದೆ ಪ್ರತಿನಿತ್ಯ ಔಷಧವನ್ನು ಸೇವಿಸಬೇಕು.
+ ವೈದ್ಯರ ಸೂಚನೆಯಿಲ್ಲದೆ ಔಷಧವನ್ನು ಮತ್ತು ಅದರ ಪ್ರಮಾಣವನ್ನು ಬಲಿಸಬಾರದು.
+ ಯಾವುದೇ ಕಾರಣಕ್ಕೂ ವೈದ್ಯರು ಸಲಹೆ ಮಾಡಿದ ಮಾತ್ರೆಗಳನ್ನು ದಿಢೀರನೆ ನಿಲ್ಲಿಸಬಾರದು. ಹೀಗೆ ಮಾಡಿದಲ್ಲಿ ಮೂರ್ಛೆರೋಗ ಮರುಕಳಿಸುವ ಸಾಧ್ಯತೆ ಇದೆ. ಅಲ್ಲದೆ ಹಾಗೆ ಬರುವ ರೋಗ ಇನ್ನೂ ತೀವ್ರ ಸ್ವರೂಪದ್ದಾಗಬಹುದು.
ತಾರೀಖು :25 - 11 - 2014
ಮಾಹಿತಿಯ ಕೃಪೆ : ಡಾ ||. ಎ. ಶಿವರಾಮಕೃಷ್ಣ . ನರರೋಗತಜ್ಞರು. ಶಿವಮೊಗ್ಗ. [ ಅವರ "ಮೆದುಳಿನ ಕಾಯಿಲೆಗಳು" -- ಪುಸ್ತಕದಿಂದ ]

ಸಂಕ್ರಮಣದ ಸ್ಥಿತಿಯಲ್ಲಿ ಇಂದಿನ ನವದಂಪತಿಗಳ ಬದುಕು

~~~~~~ ಎಂ.ಗಣಪತಿ. ಕಾನುಗೋಡು

ಇಂದಿನ ತೀವ್ರಗಾಮಿ ಚಲನೆಯ ಸಮಾಜದಲ್ಲಿ ಯುವತಿಯರು ಯುವಕರಿಗೆ ಸರಿಸಮನಾಗಿ ವಿದ್ಯಾರ್ಹತೆ, ಸ್ವಂತ ದುಡಿದು ಹಣ ಗಳಿಸಬೇಕೆನ್ನುವ ಹಪಾಹಪಿ, ಗಂಡಿನ ಆಧಾರವಿಲ್ಲದೆ ಒಬ್ಬಂಟಿಯಾಗಿ ಮುನ್ನುಗ್ಗುವ ದಾಷ್ಟ್ಯ ...... ಈ ಎಲ್ಲವನ್ನು ಹೊಂದಿದ್ದಾರೆ. ಇದರ ಪರಿಣಾಮವಾಗಿ ಹೆಚ್ಚಿನ ಭಾಗದ ಯುವತಿಯರಿಗೆ ಜೀವನೋಪಾಯಕ್ಕಾಗಿ ಹಿಂದಿನಂತೆ ಪುರುಷನನ್ನು ಅವಲಂಬಿಸುವ ಅಗತ್ಯವಿಲ್ಲ. ಇದಕ್ಕೆಲ್ಲ ಕಾರಣ ಅವರು ಹೊಂದಿರುವ ಆರ್ಥಿಕ ಸ್ವಾವಲಂಬನೆ.

ಇಲ್ಲಿ ಒಂದು ಪ್ರಶ್ನೆ ಇದೆ. ಪುರುಷನಿಗೆ ಆಗಲಿ ಮಹಿಳೆಗೆ ಆಗಲಿ, ಹಣವೊಂದೇ ಜೀವನದ ಏಕಮೇವ ಪೂರೈಕೆಯೇ? ಅಲ್ಲ. ಬದುಕಿನ ಅನೇಕ " ಬೇಕು " ಗಳಲ್ಲಿ ಹಣವು ಒಂದು ಅಷ್ಟೆ. ಆದರೆ ಹಣವೊಂದರಿಂದಲೇ ಬದುಕಿನ ಎಲ್ಲ ಬಯಕೆಗಳನ್ನು ನಿಭಾಯಿಸಿಕೊಳ್ಳಲು ಸಾಧ್ಯವಿಲ್ಲ. ಮನುಷ್ಯನ ಅನೇಕ " ಬೇಕು " [ Wants ] ಗಳಲ್ಲಿ ಒಂದು ಹೆಣ್ಣಿಗೆ ಒಂದು ಗಂಡು, ಒಂದು ಗಂಡಿಗೆ ಒಂದು ಹೆಣ್ಣು ಬೇಕು ಎನ್ನುವುದು ಪ್ರಮುಖ. ಈ 'ಬೇಕು' ಅನೇಕ ಕಾರಣಗಳಿಂದ ಒಂದು ಅಗತ್ಯ. ಇದರಿಂದಾಗಿಯೇ ' ವಿವಾಹದ ಪರಿಕಲ್ಪನೆ ' ಹುಟ್ಟಿಕೊಂಡಿದ್ದು.

ಇವತ್ತಿನ ದುಡಿಮೆಯ ಸುಪತ್ತಿಗೆಯಲ್ಲಿ ಆ ಕ್ಸೇತ್ರದಲ್ಲಿರುವ ಎಲ್ಲ ಯುವಜನರಿಗೂ ಹಣದ ಜಲದ ಬುಗ್ಗೆ [ Foutain ] ಅವರ ಅಂಗೈಯಲ್ಲೇ ಇದೆ. ಈ ಅಮಲಿನಲ್ಲಿ ದಾಂಪತ್ಯದ ಬಾಂಧವ್ಯ ಬಹುತೇಕ ಯುವಜನರಲ್ಲಿ ಶಿಥಿಲವಾಗುತ್ತಿದೆ. ಯಾರಿಗೆ ಯಾರೂ ಕೇರ್ ಮಾಡುವ ಸ್ಥಿತಿಯಲ್ಲಿಲ್ಲ. ಏಕೆಂದರೆ ತನ್ನ ಹೊಟ್ಟೆಗೆ ಯಾರೂ ಏನು ದುಡಿದು ಹಾಕುವ ಅನಿವಾರ್ಯತೆ ಇಲ್ಲ. ಹಣದ ಎದುರು ಬದುಕಿನ ಉಳಿದ ಎಲ್ಲಾ 'ಬೇಕು 'ಗಳು ಅವರಿಗೆ ಈಗ ಗೋಚರಿಸುವುದಿಲ್ಲ.

ಇದರ ಪರಿಣಾಮ ವಿಚ್ಚೇದನ . ನಂತರ ತನ್ನ ಮಾತನ್ನೇ ಕೇಳುವಂಥಹ ಸಂಗಾತಿಗಾಗಿ ಶೋಧನೆ, ಅಂಥಹವರು ಸಿಕ್ಕಿದರೆ ತನ್ನ ಕರಾರುಗಳನ್ನು ಮುಂಚೆಯೇ ಮಂಡಿಸಿ ಅದು ಓ. ಕೆ . ಆದರೆ ನಂತರ ಮದುವೆ. ಆ ಮದುವೆಯಿಂದಾದ ದಾಂಪತ್ಯವೂ ಸಾಪ್ರದಾಯಿಕವಾದುದಲ್ಲ. ಅದು " Get together " ಮಾದರಿ. ಇದೇ ಸಂಕ್ರಮಣದ ಸ್ಥಿತಿಯಲ್ಲಿ ಇಂದಿನ ನವದಂಪತಿಗಳ ಬದುಕು.

ಒಮ್ಮೆ ವಿಚ್ಚೇದನವಾಗದಿದ್ದರೂ ಬಹು ದಂಪತಿಗಳಲ್ಲಿ ಸಾಮರಸ್ಯವಿರುವುದಿಲ್ಲ. ಅದು ಶಿಥಿಲ ದಾಂಪತ್ಯ. ಪರಸ್ಪರ ಭಿನ್ನಾಭಿಪ್ರಾಯ, ಬದ್ಧತೆಯ ಕೊರತೆ, ಯಾರಿಗೆ ಯಾರೂ ಸೋಲುವುದಿಲ್ಲ. ಪರಸ್ಪರರ ಮೇಲೆ ಮಕ್ಕಳನ್ನೇ ಅಸ್ತ್ರವನ್ನಾಗಿ ಪ್ರಯೋಗಿಸುವುದು, ಮಕ್ಕಳಲ್ಲಿಯೂ ತಂದೆ ಅಥವಾ ತಾಯಿಯ ಮೇಲೆ ದ್ವೇಷ ಹುಟ್ಟುವಂತೆ ಪರಸ್ಪರರು ಮಾಡುವುದು, ಇದರಿಂದಾಗಿ ಮಕ್ಕಳ ಭವಿಷ್ಯ ಅಧೋಗತಿಗೆ ಹೋಗುವುದು ಮುಂತಾದುವು ಇಂಥಹ ಶಿಥಿಲ ದಾಂಪತ್ಯದಲ್ಲಿ ಕಂಡು ಬರುತ್ತವೆ.

ಗಂಡು - ಹೆಣ್ಣು ಜೊತೆಗಿರಬೇಕು ಎಂದರೆ ಮದುವೇನೆ ಆಗಬೇಕಾ ?. ಏನೂ ಮಾಡ್ಕೊಳ್ಳದೆ ಸುಮ್ಮನೆ ಕೂಡಿಕೊಂಡಿದ್ದರೆ ಆಗಲ್ವಾ ?. ಗಂಡು ಮತ್ತು ಹೆಣ್ಣು ಸರಿಸಮಾನವಾಗಿ ಕೈತುಂಬಾ ಹಣವನ್ನು ಕಿವುಚುವ ಇಂದಿನ ಕಾಲದಲ್ಲಿ, ಎಲ್ಲರೂ ಅಲ್ಲದಿದ್ದರೂ, ಬಹಳ ಹೆಣ್ಣು - ಗಂಡುಗಳು ತಮ್ಮಲ್ಲಿಯೇ ಕೇಳಿಕೊಳ್ಳುತ್ತಿರುವ ಪ್ರಶ್ನೆಗಳು ಇವು.

ಈ ಗೋಜಲಿನಲ್ಲಿ ವರ್ಷಗಳು ಉರುಳುತ್ತವೆ. ಯೌವನವೂ ಅದರ ಜೊತೆಗೆ ಸಾಗುತ್ತಿರುತ್ತದೆ. ಮುಪ್ಪು ಹತ್ತಿರ ಬಂದಿರುತ್ತದೆ. ಹುಳಿ ಮುಪ್ಪಾಗುತ್ತದೆಯೋ ಇಲ್ಲವೋ ಗೊತ್ತಿಲ್ಲ. ಮರವಂತೂ ಮುಪ್ಪಾಗುತ್ತದೆ. ಯುವಕ ತನ್ನ ಹಳೆತನಕ್ಕೆ ತಲುಪಿ ಚರ್ಮ ಸುಕ್ಕುಗಟ್ಟುತ್ತಿರುವುದನ್ನು ಅನುಭವಿಸುತ್ತಾನೆ. ಯುವತಿಗೆ ಮುಟ್ಟು ಸಾವರಿಸುವ ಹಂತ ಬಂದಿರುತ್ತದೆ.

ಈ ಹಂತದಲ್ಲಿ ಬದುಕಿನ ವಾಸ್ತವಾಂಶ ಅರಿವಿಗೆ ಬರುತ್ತದೆ. ಈ ಸಮಯದಲ್ಲಿ ಮನುಷ್ಯನ ಬಯಕೆಗಳನ್ನು ನಿಭಾಯಿಸಿಕೊಳ್ಳಲು ' ಹಣ ' ವೊಂದೇ ಸಾಲದು. ಜೀವನದಲ್ಲಿ ಒಬ್ಬ ಮನುಷ್ಯನಿಗೆ ಮತ್ತೊಬ್ಬ ಮನುಷ್ಯ ಬೇಕು. ಯಾರೂ ಪರಿಪೂರ್ಣ ಸಾಮರ್ಥ್ಯವನ್ನು ಹೊಂದಿಲ್ಲ. ಅದರ ಪೂರೈಕೆಗಾಗಿ ಮತ್ತೊಬ್ಬರನ್ನು ಅವಲಂಬಿಸುವುದು ಅಗತ್ಯ. ಅದರಂತೆಯೇ ಕೌಟುಂಬಿಕ ಜೀವನದಲ್ಲಿ ಒಂದು ಹೆಣ್ಣಿಗೆ ಗಂಡು ಬೇಕು. ಒಂದು ಗಂಡಿಗೆ ಒಂದು ಹೆಣ್ಣು ಬೇಕು. ಭೌತಿಕ ಅವಲಂಬನೆ ಎನ್ನುವುದು ಒಂದು ಅನಿವಾರ್ಯ ಸಂಗತಿ. ಸರಿಯಾದ ದಾಂಪತ್ಯವನ್ನು ರೂಪಿಸಿಕೊಳ್ಳಬೇಕು. ಬದ್ಧತೆ, ಒಡಂಬಡಿಕೆ, ನೆಮ್ಮದಿ, ಸುಗಮ ಸಾಂಗತ್ಯ ಇರಬೇಕು ಎಂದು ಅರಿವಾಗುವುದು. ಈ ಸೌಹಾರ್ದತೆಯಲ್ಲಿ ಸಂಸಾರ, ಮಕ್ಕಳು .... ಇವನ್ನೆಲ್ಲ ರೂಪಿಸಿಕೊಳ್ಳಬೇಕಾಗಿತ್ತು, ತಾವು ತಮ್ಮ ದಾಂಪತ್ಯದ ಪ್ರಥಮದಲ್ಲಿ ಮಕ್ಕಳನ್ನು ಹೊಂದಿ ನಾವು ಪೋಷಿಸಬೇಕಾಗಿತ್ತು. ತಮ್ಮ ಸುಗಮ ದಾಂಪತ್ಯದ ಮಾತ್ರದಿಂದ ಮಾಡಿದ ಪೋಷಣೆಯಿಂದ ಬೆಳೆದ ಮಕ್ಕಳು ಸಮರ್ಥರಾಗಿ ಇಳಿವಯಸ್ಸಿನಲ್ಲಿ ತಮಗೆ ಪೋಷಕರಾಗಲು ಸಾಧ್ಯವಾಗಿತ್ತು ಎಂಬ ಪ್ರಜ್ಞೆ ಕಾಲ ಮೀರಿದ ಮೇಲೆ ಅವರಿಗೆ ಬರುತ್ತದೆ. ಅಲ್ಲಿಯವರೆಗೂ ಯೌವನದ ಅವಧಿ ಅಲ್ಪ, ಅದು ಬೇಗ ಕಳೆದುಹೋಗುತ್ತದೆ, ಯಾವುದಕ್ಕೂ ಕಾಲವನ್ನೇ ಅನುಸರಿಸಿಕೊಂಡು ಜೀವನದ ಮಿತ ವಿಸ್ತಾರವನ್ನು ಅರಿತು ಮುನ್ನಡೆಯಬೇಕು ಎಂಬ ಸತ್ಯವನ್ನು ಗಮನಿಸುವ ಗೋಜಿಗೆ ಅವರು ಹೋಗಿರುವುದಿಲ್ಲ. ಈ ಸತ್ಯಗಳನ್ನು ತಿಳಿಯುವ ಹೊತ್ತಿಗೆ ಅವರಿಗೆ ಹಲ್ಲು ಬೀಳುವ ಕಾಲ ಬಂದಿರುತ್ತದೆ.

ಆದ್ದರಿಂದ " ಮದುವೆ " ಎನ್ನುವುದು ಹೆಣ್ಣು ಮತ್ತು ಗಂಡು ಈ ಎರಡು ಜೀವಗಳನ್ನು ಮಾನಸಿಕವಾಗಿ, ದೈಹಿಕವಾಗಿ, ಭಾವನಾತ್ಮಕವಾಗಿ, ಹೃದಯ ಪೂರ್ವಕವಾಗಿ ಬೆಸೆಯುವಂಥಹ ಒಂದು ವಿಶೇಷ ಘಟನೆ. ಇದು ಒಬ್ಬರಿಗೊಬ್ಬರು ಸರಿಯಾಗಿ ಅರ್ಥ ಮಾಡಿಕೊಂಡು ಪರಸ್ಪರ ಪರಿಪೂರ್ಣ ಸಮರ್ಪಣೆ ಮಾಡಿಕೊಳ್ಳುವಲ್ಲಿ ಸಹಕಾರಿಯಾಗಬೇಕು. ಕೇವಲ "JUST GET TOGETHER " ಪದ್ಧತಿಯಲ್ಲಿ ಇದು ಸಾಧ್ಯವಾಗುವುದಿಲ್ಲ. ಸಾಂಪ್ರದಾಯಿಕ ಮದುವೆಯ ಮಹತ್ವ ಇರುವುದೇ ಇಲ್ಲಿ. ಅದನ್ನು ಹರಿದುಕೊಂಡು ಹದ್ದು ಮೀರಿದರೆ ಈಗಾಗಲೇ ಹೇಳಿದ ಗೊಂದಲಗಳನ್ನು ಅನುಭವಿಸಬೇಕಾಗುತ್ತದೆ.

ಮಾಡಿಕೊಂಡ ಮದುವೆಯನ್ನು ಮುರಿದುಕೊಂಡು ಇದಕ್ಕಿಂತ ಒಳ್ಳೆಯ ಸಂಗಾತಿಯನ್ನು ಪಡೆಯುತ್ತೇನೆ ಎಂದು ಕನವರಿಸಿ ಮತ್ತೊಬ್ಬನನ್ನು \ ಮತ್ತೊಬ್ಬಳನ್ನು ಕಟ್ಟಿಕೊಂಡರೆ ಸಾಂಗತ್ಯವನ್ನು ಪ್ರಯತ್ನ ಪೂರ್ವಕವಾಗಿ ನಿರ್ಮಿಸಿಕೊಳ್ಳದಿದ್ದರೆ ಅಲ್ಲಿಯೂ ದುರಂತವೇ.

ಇದ್ದಲ್ಲಿಯೇ ಕಾಡಿ ಕೂಡಿಕೊಂಡು ಹೋಗದವರು ಎಲ್ಲಿಯೂ ಹೊಂದಿಕೊಳ್ಳಲು ಕಷ್ಟಸಾಧ್ಯ. ಏಕೆಂದರೆ ಮನುಷ್ಯನ ಮನಸ್ಸು ಮತ್ತು ಸ್ವಭಾವ ಹೇಗಿರುತ್ತದೆಯೆಂದರೆ ಮತ್ತೊಬ್ಬನಿಗೆ ನಾವು ಹೊಂದಿಕೊಂಡು ಮುಂದೆ ಸಾಗಬೇಕೇ ವಿನಃ ಮತ್ತೊಬ್ಬನು ನಮಗೆ ಎಂದೂ, ಎಲ್ಲಿಯೂ, ಹೇಗೂ ಹೊಂದಿಕೊಳ್ಳುವುದಿಲ್ಲ.

@ ಮನೆ ಮದ್ದು : ಬಾಳೆಹಣ್ಣು ಉಪಯೋಗ

~~~~~~~~ ಸಂಗ್ರಹ : ಎಂ.ಗಣಪತಿ.ಕಾನುಗೋಡು.
ಸುಲಭ ಬೆಲೆಯಲ್ಲಿ ಎಲ್ಲರ ಕೈಗೂ ದೊರಕುವ ಫಲ ಬಾಳೆಹಣ್ಣು. ಇದರ ಸಿಪ್ಪೆಗೆ ಕ್ರಿಮಿ, ಕೀಟಗಳ ನಿರೋಧಕ ಶಕ್ತಿ ಇದೆ. ಆದ್ದರಿಂದ ಕ್ರಿಮಿ ಈ ಹಣ್ಣನ್ನು ಭೇದಿಸಿ ಒಳಹೋಗಲಾರದು. ಒಮ್ಮೆ ಒಳಕ್ಕೆ ಹೋದರೂ ಬಾಳೆಹಣ್ಣಿನ ತಿರುಳು ಕ್ರಿಮಿನಾಶಕ ಶಕ್ತಿಯನ್ನು ಪಡೆದಿದೆ. ಯಾವುದೇ ಕಾರಣಕ್ಕೂ ಇದನ್ನು ಫ್ರಿಜ್ ನಲ್ಲಿ ಇಡಬಾರದು.
ಉಪಯೋಗ :
+ ಬಾಳೆಹಣ್ಣು ಎ, ಬಿ, ಸಿ ಮತ್ತು ಬಿ 6 ಜೀವಸತ್ವದಿಂದ ಸಮೃದ್ಧವಾಗಿದೆ.
+ ಬಾಳೆಹಣ್ಣಿನಲ್ಲಿ ಡೆಕ್ಸ್ ಟ್ರಿನ್ ಇದೆ. ಇದು ಜೀರ್ಣಶಕ್ತಿಗೆ ನೆರವಾಗುತ್ತದೆ. ದೇಹದ ತೂಕವೂ ಹೆಚ್ಚಾಗುತ್ತದೆ. ಆದ್ದರಿಂದ ಇದು ಉತ್ತಮ ಆಹಾರ.
+ ಚೆನ್ನಾಗಿ ಹಣ್ಣಾದ ಬಾಳೆಹಣ್ಣು ಮತ್ತು ಒಂದು ಲೋಟ ಹಾಲು ಸಣ್ಣ ಮಕ್ಕಳ ಒಂದು ದಿನದ ಪರಿಪೂರ್ಣ ಆಹಾರವಾಗುತ್ತದೆ.
+ ಹಾಲು ಮತ್ತು ಜೇನುತುಪ್ಪದೊಡನೆ ಬಾಳೆಹಣ್ಣನ್ನು ಎಳೆಮಕ್ಕಳಿಗೆ ಕೊಡುವುದರಿಂದ ಬೆಳವಣಿಗೆ ಚೆನ್ನಾಗಿ ಆಗುತ್ತದೆ. ರಕ್ತ ಪುಷ್ಟಿಯಾಗುತ್ತದೆ.
+ ಎಲುಬು ರೋಗಗಳಿಂದ ನರಳುತ್ತಿರುವ ಮಕ್ಕಳಿಗೆ ಬಾಳೆಹಣ್ಣು ಉತ್ತಮ ಆಹಾರ.
+ ಸಕ್ಕರೆ ಮತ್ತು ಜೇನುತುಪ್ಪದೊಂದಿಗೆ ಬಾಳೆಹಣ್ಣನ್ನು ಸೇವಿಸಿದರೆ ಎದೆನೋವು ಮತ್ತು ಕೆಮ್ಮು ಕಡಿಮೆಯಾಗುತ್ತದೆ. ಆದರೆ ಉಷ್ಣ ಪ್ರಕೃತಿಯವರು ಒಣಕೆಮ್ಮು ಇದ್ದರೆ ಸ್ವಲ್ಪ ಪ್ರಯೋಗಿಸಿ ತಿನ್ನುವುದು ಅನುಕೂಲ. ಏಕೆಂದರೆ ಜೇನುತುಪ್ಪ ಉಷ್ಣಪ್ರೇರಿತವಾದದ್ದು. ಸಕ್ಕರೆಯೂ ಸ್ವಲ್ಪ ಉಷ್ಣವೇ. ಜೋನಿ ಬೆಲ್ಲ ತಂಪು. ಆದರೆ ಅಚ್ಚಿನ ಬೆಲ್ಲ ಉಷ್ಣ.
+ ಊಟದ ನಂತರ ಪ್ರತಿದಿನ ರಾತ್ರಿ ಬಾಳೆಹಣ್ಣನ್ನು ಹಾಲಿನೊಂದಿಗೆ ಸೇವಿಸಿದರೆ ಲೈಂಗಿಕ ಶಕ್ತಿ ವೃದ್ಧಿಯಾಗುತ್ತದೆ. ಬಾಳೆಹಣ್ಣಿನಲ್ಲಿ ಗಂಧಕ ಮತ್ತು ಕಬ್ಬಿಣದ ಅಂಶವಿರುವುದರಿಂದ ಬಲವರ್ಧಕವೂ ಮತ್ತು ವೀರ್ಯವರ್ಧಕವೂ ಆಗಿದೆ.
+ ಗರ್ಭಿಣಿಯರು ಬಾಳೆಹಣ್ಣನ್ನು ಪ್ರತಿದಿನ ಸೇವಿಸಿದರೆ ರಕ್ತಪುಷ್ಟಿ ಹೆಚ್ಚಾಗುತ್ತದೆ. ಅಲ್ಲದೆ ಹೆರಿಗೆಯೂ ಬಹುಸುಲಭವಾಗಿ ಆಗುತ್ತದೆ.
+ ಪ್ರತಿದಿನವೂ ಕ್ರಮವಾಗಿ ಬಾಳೆಹಣ್ಣನ್ನು ತಿನ್ನುವುದರಿಂದ ಮೈಯಲ್ಲಿನ ಮಾಂಸ ವೃದ್ಧಿಯಾಗುತ್ತದೆ. ಹೀಗೆ ತಿನ್ನುವುದರಿಂದ ಮಲಬದ್ಧತೆ ನಿವಾರಣೆಯಾಗುತ್ತದೆ. ಇದರಲ್ಲಿರುವ ನಾರಿನ ಅಂಶವು ಮಲಬದ್ಧತೆಯ ನಿವಾರಣೆಗೆ ಸಹಕಾರಿ.
+ ಬಾಳೆಹಣ್ಣಿನ ತಿರುಳನ್ನು ಹಸುವಿನ ಹಾಲಿನಲ್ಲಿ ಚೆನ್ನಾಗಿ ಅರೆದು [ಮೆದ್ದು] ಅದಕ್ಕೆ ಬಾಳೆಹೂವಿನ ರಸ ಸೇರಿಸಿ ಸುಮಾರು ಐವತ್ತು ದಿನಗಳ ಕಾಲ ಪ್ರತಿದಿನ ಒಂದು ಚಮಚ ಸೇವಿಸಿದರೆ ಶರೀರದ ತೂಕ ಇಳಿಯುತ್ತದೆ. ಸ್ಥೂಲಕಾಯರು ತೆಳ್ಳಗಾಗುತ್ತಾರೆ.
+ ಬಾಳೆಹಣ್ಣನ್ನು ಮೊಸರಿನಲ್ಲಿ ಕಿವಿಚಿಕೊಂಡು ತಿಂದರೆ ಕಣ್ಣು ಉರಿ, ಅಂಗಾಲು ಉರಿ ಶಾಂತವಾಗುವುದು.ಮತ್ತು ಮಲಬದ್ಧತೆಯು ನಿವಾರಣೆಯಾಗುವುದು. ಕರುಳಿನ ತೊಂದರೆಗಳು ನಿವಾರಣೆಯಾಗುತ್ತವೆ.
+ ಗಾಂಜಾ, ಆಫೀಮು ಸೇವಿಸಿ ಉಂಟಾಗಿರುವ ಹಾನಿಯನ್ನು ನಿವಾರಿಸಲು ಬಾಳೆದಿಂಡಿನ ರಸವನ್ನು ಸೇವಿಸಬೇಕು. [ ಬಂಗೀಪಾನಕದ ಅಮಲನ್ನು ಇಳಿಸಲು ಇದು ಅನುಕೂಲ ]
+ ಬಾಳೆ ಎಳೆಯ ಭಸ್ಮವನ್ನು ಜೇನುತುಪ್ಪದೊಂದಿಗೆ ಸೇವಿಸಿದರೆ ಭಿಕ್ಕಳಿಕೆ ದೂರವಾಗುತ್ತದೆ.
+ ಮೈನೆರೆದ ಹುಡುಗಿಯರಲ್ಲಿ ಹೆಚ್ಚು ರಕ್ತಸ್ರಾವವಾಗುತ್ತಿದ್ದರೆ ಬಾಳೆಹೂವಿನ ರಸವನ್ನು ಮೊಸರಿನಲ್ಲಿ ಕೊಡುವುದರಿಂದ ಬಹುಬೇಗ ಗುಣವಾಗುತ್ತದೆ.
+ ಬಾಳೆಕಾಯಿಯನ್ನು ಬಿಸಿಬೂದಿಯಲ್ಲಿ ಸುಟ್ಟು ತಿನ್ನುವುದರಿಂದ ರಕ್ತಭೇದಿ ತಕ್ಷಣ ನಿಲ್ಲುತ್ತದೆ
+ ಉಪವಾಸವಿದ್ದು ದೇಹವು ದಣಿದಿದ್ದರೆ ಒಂದು ಬಾಳೆಹಣ್ಣು ತಿಂದರೆ ಸಾಕು. ಅದರಲ್ಲಿರುವ ಗ್ಲೂಕೋಸ್, ಸಕ್ಕರೆ ಅಂಶವು ದೇಹದಲ್ಲಿ ಶಕ್ತಿಯನ್ನು ಹೆಚ್ಚಿಸುತ್ತದೆ.
+ ಅನಿಮೀಯಾದಿಂದ ನರಳುತ್ತಿರುವವರಿಗೆ ರಕ್ತದಲ್ಲಿ ಹಿಮೋಗ್ಲೋಬಿನ್ ಹೆಚ್ಚಾಗುವಂತೆ ಮತ್ತು ಬೆಳಗ್ಯಿನ ಸುಸ್ತನ್ನು ಕಡಿಮೆ ಮಾಡಲು ಇದು ಸಹಕಾರಿ.
+ ಮಾನಸಿಕ ಒತ್ತಡದಿಂದ ನರಳುತ್ತಿದ್ದರೂ ಸಹ ಬಾಳೆಹಣ್ಣನ್ನು ತಿನ್ನುವುದರಿಂದ ನಮ್ಮ ಮನಸ್ಸಿಗೆ ರಿಲ್ಯಾಕ್ಸ್ ದೊರೆಯುತ್ತದೆ. ಬಾಳೆಹಣ್ಣಿನಲ್ಲಿರುವ ಬಿ 6 ಜೀವಸತ್ವವು ನಮ್ಮ ಮನಸ್ಸು ಉಲ್ಲಾಸದಿಂದ ಇರುವಂತೆ ಮಾಡುತ್ತದೆ.
+ ಸೊಳ್ಳೆ ಕಚ್ಚಿದ ಭಾಗಕ್ಕೆ ಬಾಳೆಹಣ್ಣನ್ನು ಉಜ್ಜಿದರೆ ನವೆ ಮತ್ತು ಉರಿ ಕಡಿಮೆಯಾಗುತ್ತದೆ.
ತಾರೀಖು : 29 - 10 - 2014
ಮಾಹಿತಿಯ ಕೃಪೆ : ನುರಿತ ನಾಟಿ ವೈದ್ಯರು.

ಮೈಗ್ರೇನ್ ತಲೆನೋವು ಎಂದರೆ ಏನು ? ಹೇಗೆ ? ಏಕೆ ?.

                                                       

                                                           ಸಂಗ್ರಹ : ಎಂ. ಗಣಪತಿ. ಕಾನುಗೋಡು.


ಮೈಗ್ರೇನ್  [ Mygraine ] ಎನ್ನುವುದು ತಲೆನೋವಿನ ಒಂದು ಪ್ರಾಕಾರ. ಇದು ಇರುವವರಿಗೆ ತಲೆನೋವು ಯಾವುದೇ ರೀತಿಯ ದೈಹಿಕ ಅಥವಾ ಮಾನಸಿಕ ಆಯಾಸದ ಸಂದರ್ಭಗಳಲ್ಲಿ ಕಂಡುಬರುತ್ತದೆ.

ಹಾಗೆಂದು ಎಲ್ಲಾ ತಲೆನೋವುಗಳೂ ಮೈಗ್ರೇನ್ ಅಲ್ಲ. ದೃಷ್ಟಿದೋಷ, ನೆಗಡಿಗೆ ಸಂಬಂಧಿಸಿದ ತೊಂದರೆಗಳು, ಜ್ವರ ಇತ್ಯಾದಿ ಕಾರಣಗಳಿಂದಲೂ ತಲೆನೋವು ಬರುತ್ತದೆ. ಆದರೆ ಅದು ಮೈಗ್ರೇನ್ ಅಲ್ಲ. ಆದರೆ ಮೈಗ್ರೇನ್ ತಲೆನೋವು ಅತ್ಯಂತ ಸಾಮಾನ್ಯವಾದದ್ದು.

ಮೈಗ್ರೇನ್ ಎಂದರೇನು ?.

ಕೆಲವು ಕಾರಣಗಳಿಂದ ಒಂದು ವ್ಯಕ್ತಿಯ ತಲೆಯೊಳಗಿನ ರಕ್ತನಾಳಗಳ ಗಾತ್ರದಲ್ಲಿ ಅಸ್ತಿರತೆಯುಂಟಾಗಿ, ಅವು ಮೊದಲು ಸಂಕುಚಿತವಾಗಿ ನಂತರ ವಿಕಸಿತವಾಗುತ್ತದೆ.ಆಗ ರಕ್ತನಾಳಗಳಿಗೆ ಸಂಬಂಧಿಸಿದ ಸೂಕ್ಷ್ಮ ನರಗಳು ಉದ್ರೇಕಗೊಂಡು ತಲೆಯಲ್ಲಿ ನೋವು ಕಾಣಿಸಿಕೊಳ್ಳುತ್ತದೆ. ಅದೇ ಮೈಗ್ರೇನ್.

ಇದರ ಲಕ್ಷಣಗಳು :-

ಈ ತರಹೆಯ ನೋವು ತಲೆಯ ಯಾವ ಭಾಗದಲ್ಲಾದರೂ ಕಾಣಿಸಿಕೊಳ್ಳಬಹುದು  ಹಾಗೂ  ಬೇರೆ ಬೇರೆ ದಿನಗಳಲ್ಲಿ ಬೇರೆ ಬೇರೆ ಭಾಗದಲ್ಲಿ ಕಾಣಿಸಿಕೊಳ್ಳಬಹುದು. ಕೆಲವರಿಗೆ ಕೇವಲ ಕಣ್ಣಿನ ಸುತ್ತ ಮಾತ್ರವೇ ಕಾಣಿಸಿಕೊಳ್ಳಬಹುದು. ಕೆಲವರಿಗೆ ಹಿಂಭಾಗದಲ್ಲಿ ಕುತ್ತಿಗೆಯವರೆಗೂ ನೋವು ಕಾಣಿಸಿಕೊಳ್ಳಬಹುದು. ಹೆಚ್ಚಾಗಿ, ತೀವ್ರವಾದ ತಲೆನೋವು ತಲೆಯ ಎಡ ಅಥವಾ ಬಲ ಭಾಗದಲ್ಲಿ ಇರುತ್ತದೆ.

ಈ ಮೇಲಿನ ಲಕ್ಷಣಗಳಲ್ಲದೆ ವಾಂತಿ, ಹೊಟ್ಟೆ ತೊಳಸಿದಂತೆ ಆಗುವುದು, ತಲೆ ಸುತ್ತಿದಂತೆ ಆಗುವುದು,  ಕೆಲವರಿಗೆ  ಹೆಚ್ಚು ಶಬ್ದ, ವಾಸನೆ, ಬೆಳಕುಗಳಿಂದ ಅಸಹನೆ ಹೆಚ್ಚಾಗಬಹುದು, ಮಾತನಾಡಲು ಕಷ್ಟವಾಗಬಹುದು, ಕೈ ಅಥವಾ ಕಾಲು ಮರಗಟ್ಟಿದ / ಬಿಗಿಯಾದ ಅನುಭವವಾಗಬಹುದು. Classic Migraine ಎಂಬ ರೀತಿಯಲ್ಲಿ  ತಲೆನೋವು ಬರುವ ಮುನ್ನ ದೃಷ್ಟಿ ಮಂಜಾದಂತೆ, ಮಿಂಚಿದಂತೆ ಅಥವಾ ಬಣ್ಣ ಬಣ್ಣದ ಅಲೆಗಳು ಕಾಣಿಸಿದಂತೆ ಸಹ ಆಗಬಹುದು.

ಇದಕ್ಕೆ ನಿರ್ಧಿಷ್ಟ ಕಾರಣವನ್ನು ಹೇಳಲಾಗದಿದ್ದರೂ ಈ ಕೆಲವು ಸಾಮಾನ್ಯ ಕಾರಣಗಳನ್ನು ಹೇಳಬಹುದು.

1  ಹೆಚ್ಚು ಕೆಲಸದಿಂದಾಗಿ ಮಾನಸಿಕ ಒತ್ತಡ ಇರುವ ಸಾಫ್ಟ್ವೇರ್ ಎಂಜಿನಿಯರುಗಳಿಗೆ ಇದು ಸಾಮಾನ್ಯ. ಅವರಿಗೆ ದಿನದ ಹೆಚ್ಚುಕಾಲ  ಒತ್ತಡದ ಕೆಲಸ ಮತ್ತು ನಿದ್ರೆ ಕಡಿಮೆ, ಅನಿಯಮಿತ ಆಹಾರದ ಸೇವನೆ ಇರುತ್ತದೆ.

2 . ಮಾನಸಿಕ ಒತ್ತಡಗಳಾದ ಕೋಪ,ಚಿಂತೆ, ಖಿನ್ನತೆ,ಗಾಬರಿಗಳಿಂದ ತಲೆನೋವು ಉದ್ರೇಕವಾಗಬಹುದು.

3 .ಆಹಾರ ಸೇವನೆಯಿಂದ ವ್ಯತ್ಯಾಸವಾದ ಹಸಿವೆ, ಮದ್ಯ ಸೇವನೆ, ಕಡಿಮೆ ನೀರು ಕುಡಿಯುವುದರಿನ್ದಲೂ ತಲೆನೋವು ಉದ್ರೇಕವಾಗುತ್ತದೆ.

4 . ನಿದ್ರೆ ಮಾತ್ರೆ ಸೇವನೆ,  ಬಿ. ಪಿ.,  ಹಲ್ಲು ನೋವು, ಕಣ್ಣಿನ ತೊಂದರೆ, ತಂಬಾಕು ಅಥವಾ ಸಿಗರೇಟು ಸೇವನೆ, ಗರ್ಭನಿರೋಧಕ ಮಾತ್ರೆ, ಮೂಗಿನ ಉಸಿರಾಟದ ತೊಂದರೆ, ಸಂಸ್ಕರಿಸದ ಆಹಾರ ಸೇವನೆ, ಅತಿ ಮುಖ್ಯವಾಗಿ ನಿದ್ರಾಹೀನತೆ ಮುಂತಾದುವುಗಳಿಂದ ಸಹ ತಲೆನೋವು ಉದ್ರೇಕಗೊಳ್ಳಬಹುದು.

5 . ಹೆಚ್ಚು ಕಾಲ ಬಿಸಿಲಿನಲ್ಲಿ ಇರುವುದು, ದೀರ್ಘಕಾಲ ಪ್ರಯಾಣ ಮಾಡುವುದು, ಮದುವೆ ಅಥವಾ ಇತರೆ ಗಲಾಟೆ ಇರುವ ಸಮಾರಂಭದಲ್ಲಿ ಹೆಚ್ಚು ಹೊತ್ತು ಭಾಗವಹಿಸುವುದು, ಕೆಲವರಿಗೆ  ಹೆಚ್ಚಾಗಿ ಓದುವುದು, ಹೆಚ್ಚು ಕಾಲ ಸಿನೆಮಾ / ಟಿ. ವಿ, ನೋಡುವುದು ಇವುಗಳಿಂದ ತಲೆನೋವು ಉದ್ರೇಕಗೊಳಬಹುದು.

6 . ಕೆಲವು ಸ್ತ್ರೀಯರಿಗೆ ಋತುಚಕ್ರದ ಏರುಪೇರುಗಳಿಂದ ತಲೆನೋವು ಉದ್ರೇಕಗೊಳ್ಳಬಹುದು.

ಒಟ್ಟಿನಲ್ಲಿ ಈ ಕಾರಣಗಳು ಒಬ್ಬರಿಗಿಂತ ಮತ್ತೊಬ್ಬರಿಗೆ ವ್ಯತ್ಯಾಸವಾಗುತ್ತವೆ.

ಮೈಗ್ರೇನ್ ನ ನಿವಾರಣೆ :-

1 . ಮೈಗ್ರೇನ್ ತಲೆನೋವು ಬಂದಾಗ ಕೆಲವರಿಗೆ ಯಾವುದಾದರೂ ನೋವು ನಿವಾರಕ ಮಾತ್ರೆಯನ್ನು [ Pain killer ] ತೆಗೆದುಕೊಂಡರೆ ಸ್ವಲ್ಪ ಸಮಯದ ನಂತರ ನೋವು ಕಡಿಮೆಯಾಗುತ್ತದೆ.

2 . ಇನ್ನು ಕೆಲವರಿಗೆ ಏನನ್ನೂ ಉಪಯೋಗಿಸದೆ ನಿಷ್ಯಬ್ದವಾದ ಕೊಠಡಿಯಲ್ಲಿ ಕೆಲವು ಕಾಲ ವಿಶ್ರಾಂತಿ ತೆಗೆದುಕೊಳ್ಳುವುದರಿಂದಲೇ ತಲೆನೋವು ಕಡಿಮೆಯಾಗುತ್ತದೆ.

3 . ಇದಲ್ಲದೆ ಜೀವನ ಶೈಲಿಯನ್ನ್ನು ಬದಲಾಯಿಸಿಕೊಳ್ಳುವುದರಿಂದ ಈ ತೆರನ ತಲೆನೋವನ್ನು ನಿಯಂತ್ರಿಸಿಕೊಳ್ಳಬಹುದು. ಅ ) ಸರಿಯಾದ ಸಮಯಕ್ಕೆ ನಿದ್ರೆ ಮಾಡುವುದು. ಬ ) ನಿತ್ಯ ವ್ಯಾಯಾಮ. ಕ ) ಸರಿಯಾದ ಊಟದ ಕ್ರಮ. ಪೌಷ್ಟಿಕ ಆಹಾರದ ಸೇವನೆ. ಡ ) ತಂಬಾಕು, ಮದ್ಯ ಸೇವನೆಯಿಂದ ದೂರ ಇರುವುದು. ಕಾಫಿ ಕುಡಿಯುವುದನ್ನು ಕಡಿಮೆ ಮಾಡುವುದು. ಇ ) ಜೀವನದ ಬಗ್ಯೆ ಸಕಾರಾತ್ಮಕ ಮನೋಭಾವ.


ಮೈಗ್ರೇನ್ ತಲೆನೋವಿಗೆ ಹೆಚ್ಚಿನ ಚಿಕಿತ್ಸೆ :-

---  ಮೈಗ್ರೇನ್ ತಲೆನೋವಿಗೆ ಶಾಶ್ವತ ಪರಿಹಾರ ಇಲ್ಲ. ಆದರೆ ಈ ತರಹೆಯ ತಲೆನೋವನ್ನು ಅದಕ್ಕೆ ಸಂಬಂಧಿಸಿದ ಔಷಧಗಳನ್ನು ಉಪಯೋಗಿಸುವುದರಿಂದ ಸಾಕಷ್ಟು ನಿಯಂತ್ರಿಸಬಹುದು.

---  ಮೈಗ್ರೇನ್ ನಿವಾರಣ ಔಷಧಗಳಲ್ಲಿ ಎರಡು ತರಹೆಗಳಿರುತ್ತವೆ. ಒಂದು ನೋವು ಬಂದಾಗ ಮಾತ್ರ ಉಪಯೋಗಿಸುವ ಔಷಧಗಳು. ಮೈಗ್ರೇನ್ ತಲೆನೋವು ತಿಂಗಳಿಗೆ 4 - 6 ಕ್ಕಿಂತ ಕಡಿಮೆ ಸಾರಿ ಬರುತ್ತಿದ್ದರೆ ಆ ದಿನಗಳಲ್ಲಿ ಮಾತ್ರ ನೋವು ನಿವಾರಕ ಮಾತ್ರೆ ಉಪಯೋಗಿಸುತ್ತಿದ್ದರೆ ಸಾಕು.

---  ಆದರೆ ಅದು ತಿಂಗಳಲ್ಲಿ ನಾಲ್ಕಾರು ಭಾರಿಗಿಂತಲೂ ಹೆಚ್ಚು ಬರುತ್ತಿದ್ದರೆ ಅದನ್ನು ತಡೆಗಟ್ಟುವ ಔಷಧವನ್ನು ನಿತ್ಯವೂ ಕೆಲವು ವಾರಗಳವರೆಗೆ ತೆಗೆದುಕೊಳ್ಳಬೇಕಾಗುತ್ತದೆ.ಇದರಿಂದ ತಲೆನೋವು ಬರುವ ಶೀಘ್ರತೆ ಹಾಗೂ ತೀವ್ರತೆ ಕಡಿಮೆಯಾಗುತ್ತದೆ.

ಹೆಚ್ಚುವರಿ ಪರೀಕ್ಷೆಗಳು :-

ಮೈಗ್ರೇನ್ ತಲೆನೋವನ್ನು ಖಚಿತಪಡಿಸುವ ಪರೀಕ್ಸ್ಶೆಗಳಿಲ್ಲ ಎನ್ನುವ ಅಭಿಪ್ರಾಯವೂ ಇದೆ. ಆದರೆ ಇಂಥಹ ತೊಂದರೆಗಳಿಗೆ C . T .scan , ಕ್ಷ ಕಿರಣ , ರಕ್ತ ಪರೀಕ್ಷೆ ಮುಂತಾದುವುಗಳನ್ನು ಮಾಡಿಸಬೇಕಾಗುತ್ತದೆ.ಈ ಬಗ್ಗ್ಯೆ ವೈದ್ಯರು ತಲೆನೋವಿನ ವಿವರ ಹಾಗೂ ಸಂಪೂರ್ಣ ಪರೀಕ್ಷೆಗಳನ್ನು ಮಾಡಿದ ನಂತರ ಸಲಹೆ ಮತ್ತು ಚಿಕಿತ್ಸೆಯಯನ್ನು ನೀಡುತ್ತಾರೆ. ಆದರೆ ಕನ್ನಡಕ ಉಪಯೋಗಿಸುವುದರಿಂದ ಈ ರೀತಿಯ ತಲೆನೋವು ಹೋಗುವುದಿಲ್ಲ.

~~~~~ ಸಂಗ್ರಹಿಸಿ ಪ್ರಸ್ತುತಪಡಿಸಿದವರು : ಎಂ.ಗಣಪತಿ. ಕಾನುಗೋಡು.
                                                 
                                                   ತಾರೀಖು : 23 - 10 - 2014

ಮಾಹಿತಿಯ ಕೃಪೆ : ' ಆರೋಗ್ಯದತ್ತ ನಮ್ಮ ಪಯಣ ' ಪುಸ್ತಕ. ಸಂಗ್ರಹ : ಹುಲಿಕಲ್ ನಟರಾಜ್

ಸೂಚನೆ : ಇದು ಸಾಮಾನ್ಯ ತಿಳಿವಳಿಕೆಗಾಗಿ ಮಾತ್ರ. ಕರಾರುವಾಕ್ಕು ಮಾಹಿತಿಗೆ ಸಂಬಂಧಪಟ್ಟ ವೈದ್ಯರನ್ನು ಸಂಪರ್ಕಿಸತಕ್ಕದ್ದು.